Lapara’ Katemmona
Osom jan-ojanan sara
kose dhapa’a ka bulan powasa
tadha’ bandingnga ate sennengnga
polana la para’ katemmona
sareng ale’ se abakte e sokma.
Ta’ mekker dhukale
lakar esto ta’ neng gante
sabban bakto sabban are
dika paggun akalemba’ dhalem ate
coma dika se nyonar paste.
Arebban bula dika ngastete
asabab bula ngarep se pote
tor ngacernang socce
sopaja ate cellep egarassa assre
sareng jembar se ngaremmes berse.
Trisiska, 2024
…………………………….
Asandhing Robana
Bila pon mandeng robana
bungana ate arassa kobassa
naleka tadha’ laen nyama.
Lantaran estona ate ta’ bisa loppa
e sabban bakto asandhing e mata
manes e bibir nyapcap barata.
Robana dika agabay taresna
dharina esto se ce’ kerrongnga.
Trisiska, 2024
…………………………….
Baca Juga: Sanja’na Moh. Aqil
Ja’ Mola’a
dika toju’ neng kowade daddi rato
odhi’ abareng neng bengko
taresnana ka bula ta’ lesso
atengka ta’ kalero
tor kenneng tero
ban saterrossa lako esto
ja’ mola’a
Trisiska, 2024
…………………………….
Rot-sorot
Bila pon rop-sorop are
mangger settong mesem
amarga buwana kajembaran
ngeba gambaran se bel-tambellan
saampona nyakse’e robana dika se dhateng
neng ngen-bangennan se aseyol dhalem.
Bula ta’ bisa acareta
naleka kerrongnga mata
etambu rot-sorot taresna
se atalabuyan e mowana dika.
Trisiska, 2024
…………………………….
Saleng Duleng Duwa’
Enga’ bakto lamba’
bula ban dika ju’-toju’ ngabas omba’
e babana kajuwan saleng dulang duwa’.
Bula ban dika tor-catoran
sambi ngaggit okeran
e salanjangnga pekkeran.
Trisiska, 2024
…………………………….
Ngampet kerrong maksa tanges
dharina kasemsem mesemma dika.
Trisiska, 2024
…………………………….
*)Calon santri tugas, siswa SMA Annuqayah kelas XII MIPA 1 dan pustakawan PPA Lubangsa Utara
Baca artikel dan berita menarik dari RadarMadura.id lainnya di Google News
Editor : Hera Marylia Damayanti