Ja’ Sakenga
Ja’ sakenga ojan ekagabay dhari robana dika
Bula bakal mandhi sampe’ gumegil sabadan
Ja’ sakenga pornama
Ekagabay dhari mesemma dika
Bula bakal atangnge samalem benteng
Tang-gentangan e taneyan
Namong se Kobasa adil
Dika ta’ parlo daddi ojan
Dika ta’ parlo daddi pornama
Sabab, dika ampon daddi bula
Bula ampon daddi dika
Battangan, 2024
………………………………
Tase’ Badhur
Omba’ nojju ka katojuwanna dika ban bula
Ngater ketennangan tor kajembaran
Tadha’ se tao dhatengnga omba’...
kadhang raja kadhang kene’
Saropa masalana odhi’
Mesemma dika agabay ojan e ate
Nyellebbi sadaja du’a se socce
Garis bibirra kadiya jalan pamoleyan
Kaangguy mamole rassa kakerrongan
Battangan, 2024
………………………………
Malem Juma’at
Are ampon calemot
Dikker-dikker mekkar dhari rong-corongnga langgar
Nyan-mennyan nyarendhem, majaga ate se tabar
Rama ban embu’ nyolet pangarep
Yasin ban Qulhu epalebbur
Daddi pangesto ka oreng kobur
Ga-tatangga ter-ater sarabi kowa tangguli
Badha keya se nyaba’ sasajin e attassa paregi
Bannya’ oreng se terro atemmowa pangeranna
Pa’-rapa’ e sabban Juma’at malemma
Sabab, ca’na rama, neko malem se samporna
Kaangguy ngadhep dha’ Se Kobasa
Battangan, 2024
………………………………
Sorat
Bula ngerem sorat...
Baca pateppa’, sampe’ dika nemmo atena bula
Ko’-nongko’ e attas kakerrongan
Battangan, 2024
………………………………
Sabban Laggu
Sabban laggu gi’ bula kana’,
Emma’ maddhai ebbun
Ebacae du’a, astana maenter tasbih
Bula esoro ngenom, bun-embunan eserrop kantos tembus ka ate
Sanonto bula tao,
Emma’ masalamet bula dhari panassa odhi’
Dhari kabudhuwan se maloka
Tor macellep badan, kenengnganna mempe-mempe ajalan
Battangan, 2024
………………………………
*)Agabung e Komunitas Damar Korong, alumnus Nasyatul Muta’allimin
Baca artikel dan berita menarik dari RadarMadura.id lainnya di Google News
Editor : Hera Marylia Damayanti