Bula Santre III
Banne taresna kancana santre
Tape ketab se malonyo ate
Ngereng pagaridhu namen mempe
Ngarep ontong samarena pate
”Astagfirullah Rabbal baroya
Astagfirullah minal khotoya”
Asapora tadha’ jamanna
Salaggi’na agili sadaja dhara
Pabannya’ malem seram kalaban istigfar
Olle odhi’ akadiya mabar se mekkar
Salanjangnga bula santre
Bula ta’ bakal mardika
Kajabana guru se marenta.
Nurul Jalil, 07-01-2024.
……………………………………….
Bula Santre IV
Sabban are
Mata epapeddi kalaban omba’na dunnya
Se maancora neyat dhari roma
Sakone’ bula ta’ tagudha
Sabab angen dhari mordhaja
Ngaton pellona oreng towa
Aros pajat badha santa’ lerena
Padhana parao se alajara
Bila santre raja pangaterrona
Sakabbiyanna elmo se epega’a.
2024
……………………………………….
Napso
Sakabbiyanna akkal aramo’ napso
Se lekkas pabudhu’na
Tor malarat pogerranna
Bila seyang
Buwa-buwana se ngocernang materrowan
Dha’ sadaja oreng se kalaparan
Se arassae, bakal terros arassa korang
Sampe’ loppa parentana pangeran
Ongguna
Buwa-buwana aropa’agi jailla setan
Se manes akantha la’ang
Tape babaja akantha raconna olar
Bila malem
Dhaunna siyap daddi sapo’
Oreng se ngangguy arassa ekopo’
Sampe’ sobbuna ecolpe’ mano’.
Battangan, 2024.
……………………………………….
Bakto
Bula posang tor ngalengsang
Mekker robana malem ban seyang
Mata are arangka’ kalaban santa’
Nojju dha’ bara’ ta’ arassa berra’
Pornama alangngoy lebat tase’
Nabang mata are se ta’ adhante’
Reng-oreng ta’ apangrasa
Ja’ bakto emmas salaka
Se ta’ aguna’agi kalaban sepa’
Kaodhi’anna, ta’ kera nemmo teppa’.
Battangan, 2024.
……………………………………….
Kakase Santre
Bula jerra se meleya taresna
Amarga enga’ dha’ dika
Manabuy sadaja essena loka
Le’, bula banne malaekat
Se ta’ ngobu napso tor ta’at
Bula coma santre
Se ngoddi ngajum rassa
Namong ngalotor ta’ karaksa
Sanonto bula atamba’a
Tape banne dha’ mesemma dika
Bula nyareya dhukonna taresna
Olle ngoro’ sakabbiyanna loka.
2023.
……………………………………….
*)Santrena Drs K Mursyidul Umam ka’dhinto ampon para’ lulusa neng MA Nasy’atul Muta’allimin jurusan kaagamaan. Agabung e Komunitas Kolare. Ajar noles dha’ Faidi Rizal Alief, Matroni Muserang, tor Khairul Umam.
Baca artikel dan berita menarik dari RadarMadura.id lainnya di Google News
Editor : Hera Marylia Damayanti