Bula Santre I
Bula se ajaring elmo
Ngel-nongel ta’ etemmo
Padhana pamajang se noro’ aros
Akanca pangorbina aeng se makoros
Sakabbiyanna sagara bula tamoye
Sakabbiyanna juko’ bula rassae
Settong coma se ekamempe
Terro mergemma bulan se socce
Ongguna
E dhadhana bula badha omba’ raja
Se bakal makarem parao-parao napso
Sabab angenna dhari bengko
Se eserrop oreng seppo
Bula santre
Manonggal tale taresna dha’ keyae
Nurul Jalil, 2023
…………………………………..
Bula Santre II
Songko’ pote nopowe dhaunna mempe
Ko’-nongko’ akantha mano’
Mare sobbu nyepsep aengnga sowarga
Bila compet are noro’ mapaddhang Guste
Akadiya tokang ngare’ padhi
Se sabbar narema sengnga’na mata are
Sabban bula eberri’ bintang ban keyae
Yaktena ta’ ngarassa’agi panassa ate
Ketab konyong agudha mata
Sopaja agu’-ganggu’ aksara se gi’ matta
Bula arassae kalaban nyalese
Onggu tadha’ pae’ ban celo’na
Pera’ manes se katela’ rassa.
2023-2024
…………………………………..
Baca Juga: Puisi M. Fuadi
Maenga’ Santre Kalaban Anyanye
Mano’-mano’ padha anyanye
Ca-kanca se tedhung noro’ ngejung
E kennengngan se mamorka’ barnana paste
Bibir bula ta’ kowat
Terro aondhuwa makobar tembang ka paseseran
Kalaban toju’ bula aonggu’
Norodi napso se malolo
”nompa’ parao nyabranga tase’
Ta’ andhi’ elmo rassana pae’”
Bula taserna’ sabab sowara kose santa’
”Terro mergemma bintang e langnge’
Sakeng sayangnga ta’ kenneng gai’
Dha’ sadajana santre lake’ bine’
Angguy elmona tekka’ sakone’”
Serrena sowara bula galargar
Mempena ca-kanca bula gaggar.
Nurul Jalil, 2024
…………………………………..
Baca Juga: Sanja' Zakil Asror
Dha-kandha Asar Maba
Angen nongo’e bannya’ mata
Magiliya arossa sokma-sokma
Tape bula kalaban sowara
Masekken careta dha’ ca-kanca
Settong kanca atanya
”bila dika se akabina?”
Kalaban tennang bula ngangka’ tanang
Nyetthet roko’ se cap tampar
”bila ebuwan bintang nengga’ e pekkeran
bila ate padhana dhaun kolare
buru bula akabina”
Jawabba bula dha’ se atanya.
2023
…………………………………..
Baca Juga: Puisi A. Propbeh FS
Kennengan Saebu Bintang
:Nurul Jalil
Bula mokka’ labang
Tape baroka se paddhang
Amarga aksara-aksarana pangeran
E kajuna bannya’ nyangsang
Dhaun-dhaun daddi pajung
Maodhar mata majembar rassa
Kalaban caddhang koneng konye’
Ro’omma nokduk langnge’
Dineng bubungan lebunna bulan
Paneka kennengan saebu bintang.
Romben Guna, 2023
…………………………………..
Baca artikel dan berita menarik dari RadarMadura.id lainnya di Google News
Editor : Hera Marylia Damayanti