Carpan AMJUN*
DHARI jau Bu’ Mae ajalan enga’ se berka’. Ajalan kaburu dhapa’a. Ajalan enga’ se etabang oreng gila. Onggu kaburu se terro dhapa’a dha’ toko Pangesto, andhi’na Sadiro se dhari romana dha’ toko kasebbut korang lebbi 400 meter. Estona semma’ manabi dha’ oreng Madura se biyasa ajalan soko, tape paggun jau amarga jalanna lecen bak abalet. Kadhang toronan lanjang, kadhang jugan ongga’an tenggi.
Korang lebbi 50 meter dhari toko, Bu’ Mae la padha ngangsor ngos-ngosan sakeng terro lekkas dhapa’ dha’ tokona Sadiro. Mekkere se e budhi tako’ ta’ sarapan amarga tabung gas komporra padha tadha’. Sossa onggu Bu’ Mae ngabas kabadha’an se samenggu, tabung gas 3 kg sajan elang dhari toko-toko.
”Dhu, baramma reya ma’ pas enga’ reya kabadha’an ra’yat baba?” pertanyana Bu’ Mae e dhalem atena.
Saellana la dhapa’ dha’ toko Pangesto, Bu’ Mae laju nyare poroban gas. Se esare ta’ bisa etemmo amarga lakar la samenggu elang dhari Pangkalan Gas Eceran se biyasa madhateng gas 3 kg dha’ toko-toko kene’ paracangan.
”Ponapa se esare Bu’ Mae?” petanya Sadiro.
”Oh, iya, Cong. Sengko’ nyare gas. E dhimma esaba’ ban ba’na, Cong?” Bu’ Mae atanya jugan.
”Addhu, Bu’. Lakar ampon samenggu gas kasebbut tadha’ e Pangkalan Gas Eceran. Ca’epon Pa’ Tona, se ngagunge toko pangkalan kasebbut, lakar stok barang ta’ ekerem sareng pamarenta, Bu’,” ca’epon Sadiro apareng ajarba’agi dha’ Bu’ Mae.
”Ca’na Pa’ Prabowo, oreng kene’ enga’ sengko’ etolonga, Cong. Tape ma’ sabaligga sateya?” ca’na Bu’ Mae peddhes.
”Manabi cara ganeka kaula ta’ oneng, Bu’ Mae. Aponapa ka’dhinto kabijakan Pa’ Prabowo otaba namong e tingkat menteri saos,” Sadiro ajarba’agi pendha’.
”Sengko’ ta’ buto rembak se ramme, Cong. Se penting dha’ sengko’ ban ra’yat kene’ olle tabung gas 3 kg reya kalaban lekkas, modha, ban cocok berra’na. Oddi ba’na atanya dha’ Pa’ Tona soal reya. Pajellas ma’le ra’yat kene’ ta’ gun sala sangka dha’ pamarenta.”
”Mon gi’ ta’ daddi, badha ngakan seyang gratis, buthok epagampanga ban epamodha’a, ra’yat kene’ olle tamba’an listrik sabban bulan, ban en-laen janji. Dhu, Cong, ding la daddi pas enga’ reya,” jarba’an lanjang Bu’ Mae. ”Ya’ tang tabung esaba’an e dhinna’ gallu. Ja’ kaloppae mon badha duli nelpon sengko’,” ca’epon Bu’ Mae.
”Enggi, Bu’,” jawabba Sadiro. Dhalem pekkeran Sadiro, onggu lowar biyasa pekkeran Bu’ Mae. Oreng kene’, oreng tane, bannya’ ana’, tape pekkeranna eajum kalaban bagus. Gi’ bisa mekkeren nagara ma’le olle nanggama dha’ ra’yat kene’.
***
E toko Pangkalan Gas Eceran Pa’ Tona, Sadiro nyoba’ nangga’ gas pole. Saonggunna, Sadiro la tello kale entar kaangguy nangga’, tape Pa’ Tona ta’ aberri’ edi amargha elarang sareng pamarenta. Pa’ Tona ajellassagi dha’ Sadiro saonggunna toko-toko paracangan kene’ molae tanggal 1 Februari la ta’ bisa melle otaba nangga’ langsung dha’ pangkalan, ban pangkalan ta’ olle makalowar gas 3 kg dha’ barung ban toko-toko kene’.
”Ganeka dhalem kabadha’an ma’le gu-onggu gas kasebbut etarema ra’yat kene’. Kadiya Bu’ Mae, Bu’ Yanto, Bu’ Sana, tor en-laenna se lakar oreng kene’ ban randha. Dika paste oneng dibi’, se nyaman molae lamba’ reng-oreng se sogi. Kalaban cara anyar manabi melleya ngangguy KTP (kartu tanda penduduk) eyarep gas 3 kg neka onggu tepa’ dha’ oreng se mesken,” Pa’ Tona ajellassagi dha’ Sadiro. Se narema jajarba’an gun gu’-onggu’an tandha ta’ pate ngarte dha’ dhabuna Pa’ Tona.
”Badha pole se korang parjuga dha’ pamarenta, enggi ka’dhinto juwalan dhari barung tor toko-toko paracangan gi’ ngala’ bathe se raja. Biyasana ejuwal Rp 17 ebu e pangkalan. Dhapa’ dha’ toko-toko kasebbut ejuwal Rp 20 ebu sampe’ Rp 25 ebu. Ganeka ampon korang kappra,” ca’epon Pa’ Tona pole.
”Enggi, lakar badha se ajuwal kadi ganeka, Pa’. Namong, panjennengngan maste oneng jugan, reng-oreng se ajuwal kadi ganeka lakar nangga’na jau. Ngereng emot, manabi kaula nangga’ e Gandhing se jauna sareng Kampong Tanggulun 20 kilometer, manabi ta’ ngala’ bathe olleya ka’emma bensinnepon?”
”Daddi ngereng, Pa’. Pamarenta mekker jugan ja’ nagara kaula sareng panjennengngan neka lebar onggu tor ta’ rata. Enggi manabi kadi e Jaba se aspalanna ampon rata maso’ dha’ kampong-kampong. Manabi e Madura, dhu sossa, Pa’,” jarna’ Sadiro kalaban mantep jugan.
”Enggi, Ro. Mangkana badha cer-ancer dhari pamarenta, Toko Pangesto kadi kaagunganna panjennengngan, barung tor toko-toko paracangan laenna, ma’le bisa ajuwal bebas dha’ rakyat e disa, padaddhi toko pangkalan kadi gadhuwanna kaula,” Pa’ Tona apareng kajellasan pole.
”Tape, kadiponapa edina? Ka’dhinto bakal tamba ruwet tor sossa, Pa’ Tona. Napapole kaula kobater, distributor ataba truk se ngeba tabung kasebbut bakal ta’ dhapa’ dha’ kampong-kampong se dhalem,” petanya Sadiro.
”Manabi ampon tekat pamarenta kaangguy arata’agi distrubisi dha’ ra’yat kene’, ongguna kaula sareng panjennengngan ta’ mabi kobater. Tor edi mokka’ pangkalan ta’ maposang, karana kaula ampon oneng. Dinggal, kaula se abantowa panjennengngan, Ro,” ca’epon Pa’ Tona agabay mantep Sadiro kaangguy madaddi Toko Pangesto daddi Pangkalan Gas Eceran e Kampong Tanggulun.
***
Kalaguwanna, Bu’ Mae dhateng pole kaangguy atanya kabadha’an tabung gas 3 kg se epatoro’ e tokona Sadiro.
”Cong, baramma kabadha’an tang tabung gas?” petanyana Bu’ Mae ngabidi are gu-laggu.
”Alhamdulillah, Bu’. Bari’ kaula ampon entar pole dha’ toko pangkalan tabung Pa’ Tona e Gandhing,” jawabba Sadiro perak.
”Ba, apana se alhamdulilah, Cong? E dhimma tang tabung ma’ gi’ paggun kosong?” Bu’ Mae onggu ta’ ngarte.
”Alhamdulillahepon, Bu’. Banne amarga kaula olle nangga’ tabung. Tape bakal daddi pangkalan gas eceran e kampong neka. Tor panjennengngan ta’ bakalan sossa pole olle tabung,” ca’epon Sadiro.
”Sih, mon gun acaca’a gampang, Ro. Tape baramma buktena dhaggi’. Senga’ ba’na ban Tona rowa gun enga’ janji-janjina calon-calon se tapongkor. Apa dhi-budhina? Ra’yat kene’ sajan ecekkel,” Bu’ Mae sakone’ mandellik dha’ Sadiro.
”Dhu, Bu’. Masa’ kaula se ra’yat kene’ jugan tega nyekkel same-same ra’yat kene’na? Pa’ Tona apareng cara dha’ ra’yat Kampong Tanggulun. Tor ma’le modha jugan ra’yat ka’dhinto melle tabung,’’ jajarba’an Sadiro dha’ Bu’ Mae.
”Iya, mon dha’iya engko’ nolongana adu’a malar mandar ra’yat e dhinna ta’ sossa pole dhalem ngaolle tabung gas,” Bu’ Mae ngarep.
***
Olle samenggu dhari parembaggan ban Pa’ Tona, e tokona Sadiro badha oreng se nalektegi dhari petugas Pertamina bagiyan tabung gas eceran. Etalektegi kalajagan kaangguy daddi pangkalan gas eceran.
Ta’ sabarampa menggu, dhateng gas tabung 3 kg dha’ Toko Pangesto banya’na 100 tabung. Cokop dha’ kuota dhalem keluarga e Kampong Tanggulun. Banya’ reng-oreng e kampong kasebbut olle kajembaran berkat Toko Pangesto se daddi pangkalan gas eceran se lebbi modha etembang ban-sabban molana. Sadiro tanto daddi oreng se paleng jumambar amarga e kampongnga reng-oreng ta’ sossa pole melleya tabung gas 3 kg.
Tanto, Pa’ Tona noro’ perak tor jembar amarga e kampong se jahu dhari ramme, pamarenta parduli dha’ nasibba reng kene’. Pa’ Tona ngarep dha’ pamarenta ma’le onggu-onggu mamarenta kalaban adil, ngaromat ra’yat kene’ bakal daddi nagara se molja. Daddi nagara baldatun tayyibatun wa rabbun ghafur. (*)
*)Guru Annuqayah se daddi penggerak literasi e MTs 1 Putri Anuqayah tor SMA 3 Annuqayah.
Baca artikel dan berita menarik dari RadarMadura.id lainnya di Google News
Editor : Hera Marylia Damayanti