Angghidhân: A. Kholil M.
“JÂBBUR…Jâbbur.. Jâbbur…” monyèna aèng tasè’ èkaèḍing sampè’ ka jhâunna. Bâjâ Asar mabâ Imron bân ca-kancana amaèn è pèngghir tasè’.
Bâḍâ sè manḍi, acèbbhungan ajhâr akeddhâl, bâḍâ sè ca’-lonca’an, bâḍâ sè nyarè anca’, bâḍâ polè sè ghun amaèn beḍḍhi.
Samarèna amaèn, Imron bân ca-kancana ajhâlân è pèngghirrâ tasè’ sambi ngabâs pa’anabhân sè ènḍhâ. Ombâ’ sè ros-terros nabâng tèngka’na sokona Imron bân ca-kancana.
Aèng tasè’ sè bârna bhiru, lajârrâ parao sè paḍâ èbhâbbhâr è tengnga tasè’. Beḍḍhi potè sè ngampar, ka’-bhungka’an bân ngalesserra angèn nambâi sennengnga Imron bân ca-kancana saèngghâ ta’ dhuli terro molèya ka romana.
Imron bân ca-kancana segghut amaèn è kassa’. Pangabâsânna Imron ambu è sèttong parao sè bâḍâ neng è pandhuna. Parao jârèya tong-sèttongnga parao sè ta’ alajâr.
“Èyya’ ra... biyasana parao rèya ta’ toman ta’ alako.” Imron akaton atanya ka abâ’na dhibi’.
“Iyyâ, Ron!“ saotta kancana sè laèn. Akantha oréng sé pâḍâ ghetton, “Ma’ bhuru satèya?”
“Cora’en sè enḍi’ parao rèya kan kancana engko’ bi’ bâ’en? Ḍi’en Sofyan ‘kan?” Imron mamastèyaghi ka ca-kancana.
“Iyyâ, Ron! Bhenḍer ta’ sala,” sambhiddhâ O’ong ta’ mekker lanjâng.
“Oooo! Rèng Jem...”
“Ambu, Mat! Jhâ’ paterros!” menḍhek sakejjhâ’, “Sofyan ta’ maso’ asakola. Iyyâ ‘kan?” Imron klabân sowara tèngghi, mastèyaghi polè.
“Iyyâ teppa’.” Ca’en Emmat sambi mateppa’ salebbârrâ.
“Mayu èntarè!” Imron ngajhâk kancana.
”Mayu’!” jâwâbbhâ sampak.
Imron bân ca-kancana lajhu ajhâlân, mangkat ka romana Sofyan. Sakanca’an paḍâ ḍing-ngènḍing. Paḍâ kabhuru sè napa’a ka romana Sofyan. Terro taowa kabâḍâ’ânna Sofyan. Arapa Sofyan ra-kèra?
Pa’-ḍâpa’na ka romana Sofyan, Imron bân ca-kancana nyolok salam, “Assalamualaikum! Assalamualaikum!”
“Waalaikumsalam!” sowarana Sofyan meddhâl ḍâri labâng sè abukka’ on-laonan, “Sapa, yâ?”
“Engko’ Imron, Yan. Èyya’ bân ca-kanca. Kerrong!” jâwâbbhâ Imron sambi mèsem aghâjâ’i Sofyan.
Sofyan mokka’ labângnga romana, èḍârḍâr. Nyoro Imron bân ca-kancana maso’.
Imron ta’ sabbhâr, agher sè terro taowa bertana Sofyan, “Bâ’na ma’ ta’ maso’ asakola?”
“Tao, Ron. La bârâmpa arè eppa’en engko’ sakè’. Engko’ arabât eppa’.” Saotta Sofyan klabân sowara ngara’nga’, seḍḍhi.
“Nèserra bâ’na. Mandhârâ lekkas bârâs eppa’en yâ.” Imron angaḍâ’i ḍâri ca-kancana sè laèn.
“Aamiin... sakalangkong yâ. Engko’ mon eppa’ sakè’ ta’ majâng. Hasèlla tang rèng towa ghun ḍâri pajângan. Dhâddhi mon la ta’ majâng ta’ enḍi’ pèssè sè èkasangowa ka sakola’an.
Ḍimma kalambhina engko’ sè takaè’ ka pakona bângku pagghun ta’ èjhâi’. Beḍḍhâna jân ra’ra’.”
Ngèḍing oca’na Sofyan, Imron bân ca-kancana noro’ seḍḍhi. Sofyan ghun oḍi’ wâ’-ḍuwâ’ân bân eppa’en. Embu’en taḍâ’ omor bhuru lowas nyatos.
“Yâ la... mandhârâ bisa’a sabbhâr bâ’en, Yan. Ollè ta’ patè seppè, mon eppa’en la nyaman bâ’en kodhu maso’ asakola.”
“Iyyâ, Yan!” O’ong bân Emmat ajâwâb para’ abhârengnga.
“Neng sakola’an ’kan bisa amaèn bhâreng.” O’ong materros.
“Mon ghun jhâjhân ghâmpang. Ngampong tang sango,” ca’na Imron sambi negghu’ bhâuna Sofyan.
“Teppa’, Yan. Ḍâgghi’ sè kemma sè bâḍâ. Maso’ yâ!” Emmat nyambhit sambi negghu’ kèya ka bhâuna Sofyan. Bâriyâ kèya O’ong.
Na’-kana’ kaempa paḍâ mèsem. Tapè mèsemma Sofyan akaton berrâ’.
Sè katello; Imron, O’ong, bân Emmat; amèt molè. Sofyan satèya karè kadhibi’. Teppa’en ghun wâ’-ḍuwâ’ân bân eppa’en. Pan-bârâmpan kalè eppa’en Sofyan abâto’ lanjhâng. Sofyan ngosar bugghigghâ eppa’en sambi ajhulu aèng ka’angghuy ngènom.
Pèkkèrra Sofyan ajhâlân ḍâ’ man-ḍimman. Terro eppa’en dhuliyâ bârâs ollè bisa maso’ asakola. Tapè kalambhina ghi’ ta’ èjhâi’. Bârâmma? Eppa’en ghun èpangènom aèng konyè’ ghâbây tambhâ ollèna èyaterrè roma bârâ’. Sowara salawât ḍâri loudspeaker masjid bân langghâr la patang santo. Sakejjhâ’ agghi’ napa’ bâkto Isya’.
“Assalamualaikum!” È lowar labâng bâḍâ rèng asalam.
“Sapa polè?” Sofyan aghârendem ka abâ’na dhibi’.
“Bukka’è labâng, Cong, èntarè!” ca’en eppa’en Sofyan.
Labâng dhuli èbukka’. Imron sabhâlâ la jheng-manjheng sambi, “Assalamualaikum!”
“Imron?! Waalaikumsalam.”
Imron abâli polè ka romana Sofyan amarghâ sanapa’na ka romana ghi’ kèr-pèkkèran.
Eppa’-embu’en atanya. Imron acarèta kabâḍâ’ânna Sofyan bi’ eppa’en. Tamaso’ beḍḍhâna kalambhina Sofyan sè ghi’ ta’ èjhâi’. Imron abâli polè ngater rèng towa ḍuwâ’en bân ater kalambhi saragam.
Sofyan ngarep eppa’en dhuliyâ bârâs saèngghâ bisa mellè bherrâs.
Parao bisa dhuli alajâr, tang-otang è bârung bisa lekkas èbâjâr. Sofyan bi’ eppa’en bisa’a abâli mèsem mapak pajjhâr.
*) Ghuru Bhâsa Madhurâ è SMPN 4 Panji Situbondo. Mènangka ghuru Master Revitalisasi Bahasa Madura 2026
Editor : Amin Basiri