Sangkolan Loka
ate bula padhana tase’ kene’
bulan se gerring gaggar agerrung loka se la kerreng
sampe’ karang ancor ban lokan ngalecer
dhu, dhimma pole bula se nyareya
langnge’ se paggun badhek
lamon malem pera’ kare petteng, tase’ elang,
omba’ se eyamba’ tadha’ dhateng
me’ pola dika lakar bujella
sakabbiyanna kasossa’an
sampe’ se paddhang gun pera’ nyelona tolang
ban somsomma oreng kene’
se ranyeng pera’ serrona bertengnga oreng laen
onggu, ate bula padhana tase’ kene’
se ros-terrosan eyojane kasossa’an
tape senga’ pakandel kalambi kerrena dika
sabab loka lebur mabali
omba’ se lebbi raja dhari sabellunna
Gappora, 2023
...................................
Kare Kastana
mon ngabas galadhak lanjang
se macampo dhaja lao’
bula kare neserra ka dika
sabab ta’ bisa mabali pole kabadha’an se
talanjuk eyontal angen santa’
parao epangger jangkar ban kasta ta’ bisa ngetthok
bula ta’ tao pole ba’ gi’ badha’a tanang lanjang
kaangguy ajaring seyang
ngangkes malem se la abit parana nyellem
ka dhalem aeng accen se komel
paleng, tonju’ buru nyedding, omba’ la
agules sake’ ka penggir tase’
abentor to-bato lejjar mara kapo’
e bun dhajana gunong se meyang
bula pera’ kare mandeng galadhak lanjang
apelko’ padhana tanang se agellu’ lesso taonan
Gappora, 2023
...................................
Tana se Loka, Tase’ se Berteng
mon gun kare omba’ se ngalemba’
kapo’ satase’ sakale ekamangmang gampang
nopowe gempella loka sacokla’
tana la abit parana se gerring
tombuwan talebat bannya’ se kerreng
bato aropa teppong
aeng la elang ro’om
tanang kare noles duwa e paser
ngobbar sompa e ker-baliker
tape aeng mata se ngalecer alebadi batessa ojan
nyapowe karena pangarep
se eyarep aoker daddi bujella
kabunga’anna na’ poto
e penggir tase’ bula paggun parao
se tettep ta’ kera lesso ngantos seyang malem
mabali barassa peddi, nopowe lette’na loka
maddha paleng-saleng ngarte, ma’ ta’ tamba
raja peggella omba’
se bisa madhateng sakabbiyanna aros
dhari bun lao’ sampe’ bun dhaja
Gappora, 2023
...................................
Ngantos Bulan se Tasellem
malem ta’ kare malem
ondhem ta’ coma petteng
ta’ kera abit pole tanang bula se neggu’a
tera’na bulan pote e tanangnga dika, Le’
bulan gerring ta’ burung paleng pera’ saejjam
peteng calemot paleng gun sageddebban
etembang lette’na ate
se manyelo tolang, somsom, daging
malejjar aeng mata, maalpo’ ban-sabban duwa
sabban malemma
odhi’ padhna parao rosak
omba’ maske kene’ akantha kokona pate
kor nyedding, pello ngalotor saebu kale
tape sanonto bulan pon nyelbi’
akoleya’ re-lere dhari matana dika, Le’
ja’ asandhakep pole, sabab bula pon
ta’ kowat se mergemma tanangnga dika
se pote, ce’ pote tera’na
Gappora, 2023
...................................
*)Ampon molae nyettong noles sanja’ dhuwa’ basa, Indonesia tor Madura. Kaleburan paneka ekarassa ampon ba’ abit. Molae monduk ka Jogja PP Mahasiswa Hasyim Asy’arie. Bukuna se ampon badha e antarana Pengantar Kebahagiaantor Latar Belakang Kebahagiaan.
Editor : Abdul Basri