Angghidhânna MUDHAR CH.*
CARÈTA bu-obuwânna è bengkona bi’-dhibi’sèbâng dhâddhi caca sè palèng èkalèburi. È sakola’an otabâ è langghâr pagghun bhâi sè èkacaca. Jhung bânnya’an obuwânna. Jhung locowan tèngkana. Jhung lèburân nyamana.
Ahmat ngobu jhuko’ èsabâ’ è jeḍḍing ènyamaè Nemmo. Sakanca’an ta’ ambu aghellâ’ ngèḍing nyamana jhuko’na Ahmat.
”Pola Nèmo, Mat, bânnè Nemmo?”
”Nèmo ta’ rèng sè è tivi. Sè sèngko’ Nemmo,” jâwâbbhâ Ahmat. Sè laèn pâḍâ aghellâ’ sè ngèḍingngaghi. Terros tong-sèttong nyebbhut bu-obuwânna è bengkona.
Rafli ngobu kocèng Persia ènyamaè Oscar. Sè Fadli kocèngnga anyama Felix bân Jemmi. Kocèngnga Adèl sè lalakè’ èjhulughi Simba, sè bâbinè’ èsebbhut Oca. Laèn polè bân Rais, ngobu ajâm ènyamaè Tuki.
Molè asakola sèngko’ nangngalè kocèng nongtong buḍu’na. Buluna lorèk. Sèngko’ lakar cè’ terrona sè ngobuwâ kocèng. Kèng bân nyaè ta’ ollè ngobu kocèng.
Napa’ ka bengko, sèngko’ acarèta ka nyaè. Nyaè ngèḍingngaghi tang carèta sambi marèngkes bhutol bân bâḍḍhâna sango. To’-malto’ nyaè nyambhidhi tang carèta.
Samarèna asalèn kalambhi, sèngko’ matoron lajângan. Nyaè nyemma’è sèngko’ sè atheng-kètheng maranta lajângan, ”Cong, ta’ ngakan ghâllu? Nas-panas arè bhuru napa’ ma’ èmo’ bân lajângan.”
”Sèngko’ ngonjhughâ lajângan.”
”Mon ta’ ngakan ghâllu pas amaèn, sènga’ èghighiri bân eppa’na.”
”Mara ngakana, bhâi!” Sèngko’ aobâ pèkkèr.
Nyaè mata’ nasè’ ka pèrèng. Ghângan ècèthok mek-kemmek bân nasè’. Jhuko’, sèngko’ èsoro ngala’ dhibi’ saseḍḍhengnga. Nyaè la tao jhâ’ mon sèngko’ ta’ patè dhujân ka jhuko’. Alhamdulillah, èparèng rajhekkè cokop. Eppa’-embu’ ta’ toman nanèng jhuko’, bâriyâ kèya nyaè.
Bâkto sèngko’ ngakan, nyaè acarèta pangalèburânna kaè ka bân-kèbân. Salaèn ngobu ajâm, embi’, sapè, bân mano’, kaè lèbur kèya ngobu kocèng. Kocèng lakè’ obuwânna kaè masthè lempo. Ḍâri sakèng èstona kaè ka bu-obuwân, mon teppa’ ngakan, dhibi’na ghi’ ta’ ngompa’, kocèngnga la èberri’ ka’aḍâ’.
Sèngko’ aghellâ’ ngèḍingngaghi carètana nyaè. Jhâ’ sakènga sèngko’ kacapo’ ka sowarghâna Kaè, sèngko’ tanto ètorot ngobu kocèng. ”Apa’an nyamana kocèngnga, Nyè?”
”Sè bulu celleng potè èyolok Mpus. Sè bâlukbuk ènyamaè Tomang.”
”Arapa ma’ ènyamaè Mpus?”
”Ta’ tao kèya yâ, Cong. Mon sè Tomang, polana buluna bârna bu-abu, bân kaèna pas èsebbhut Tomang. Asalla Abu Tomang, kèng pas ghun èolok Tomang malolo.”
”Polè apa, Nyè?”
”Bâḍâ sè Sora.”
Nyaè sè nyebbhut nyamana Sora sowarana bâk ngara’nga’. Nyaè nangès. Ènga’ ka Sora. Ènga’ kèya ka kaè sè la taḍâ’ omor 11 taon sè tapongkor. Sambi nangès nyaè nerrossaghi carètana.
Dhullu, kocèng Sora jârèya temmo noro’ buntè’ bâkto ater tajhin ka tatangghâ. Ta’ ètemmo paḍâtengnga. Buluna cè’ lèburrâ.
Napa’ ka roma, kocèng jârèya amonyèyan, ”Mèyong! Mèyong, mèyong, mèyong!” Èpakanè nasè’, kocèng jârèya pagghun bhâi sè yong-mèyongan. Ḍi-buḍina lako bhuru ambu sè amonyè sa’ellana èberri’ tajhin sora.
”Embu’na, nèko kocèng buluna lèbur. Angonna patot. Lalakè’ polè. Ḍimma dhika ollè?” ca’na kaèna.
”Ghellâ’ temmo noro’ bâkto kaulâ ater tajhin, Eppa’na.”
”Obu, Embu’na, nyamaè Sora. Nyama Sora akor bân bulânna. Akor kèya bân dhujânna. Dhujân ka tajhin sora.” Kaèna menḍhek. Kocèng sè bhuru ènyamaè èpandheng.
”Embu’na, Embu’na! Kocèng bulu tello’. Nèko nyoghi’i, Embu’na.”
”Ongghu ghi, Eppa’na? Ma’ èkoca’ bulu tello’, napa’an bârnana?”
Kaèna ngosap’ cèthakka Sora. Sora dhuli nyabâ’ cangkemma ka sokona kaèna, ”Nèko’, neko’. Nèko’ ḍâ’ento, Embu’na!”
Tonjhu’na kaèna nodhuwâghi tello’ macem bârna buluna Sora. ”Kocèng bulu tello’ nèko malarat sè oḍi’â, Embu’na. Biyâsana kocèng nèko èkakan bân korbhina. Sora nèko enten ta’ èkakan sabâb kocèng nèko ngèrrep kalebbiyânna. Nèko, bârna sè kapèng tello’ èyèrrep è ḍinto. Bâḍâ è pè’-keppèna.”
”Terros, Nyè! Bâ’na soghi yâ, Nyè? Satèya bâḍâ è ḍimma kocèngnga?” Sèngko’ addhreng sè atanya terro taowa jâwâbhânna.
Ngèḍing carètana nyaè, sèngko’ tambâ tanjâ’ sè ngobuwâ kocèng. Kocèng ta’ bân-sarombân kocèng, kodhu sè bulu tello’. Bâkto jârèya kèya sèngko’ man-ngoman ka nyaè ka’angghuy ollè èdhi ngobu kocèng.
Nyaè ta’ iyyâ bân ta’ enjâ’. Kèng satèya ta’ ngaranyam ènga’ ri’-bâri’na. Dhinèng sè sèngko’ ta’ èkennèng ḍiḍâ’.
”Tello arè sabellunna aghântè bulân, Sora aloka’an kabbhi. Cèthakka Sora bâḍâ matto’. Èrabât tello arè ḍâri kadhâddhiyân lokana bhâdhân bân cèthak, ahèrra Sora matè’ abhâreng kalabân competta bulân.” Nyaè mèlè nerrossaghi carètana katèmbhâng ajâwâb tang pètanya bân ajâwâb tang pangaterro. (*)
Sampang, 25 Molot 1445 H/11 Oktober 2023 M.
*)Ngabdhi è SMPS Al-Ittihad. Alèbun è Puri Matahari Sampang
Baca artikel dan berita menarik dari RadarMadura.id lainnya di Google News
Editor : Hera Marylia Damayanti