Sanja’na Maswadi Kama; Du’a Pamongkas

Sorop ngapote e sagara

omba’ sajan raja

namong dhalem dhadha

pangabakte ta’ gellem lendha

Angen matako’an

lajar-lajar agulung e attas sampan

maske dusa nanjur

pangaporana Guste mandara lebbur

Pancer eparempen

pajang eajum sekken

namong sojudda ate gi’ ta’ karem

Lu’-gulu’, 2024

………………………………..

Baca Juga: Puisi Naufalul Ihya’ Ulumuddin; Deskripsi

Dhupolo Pornama

Bulan se tapongkor

badha sonar ngalotor

nompa e dhalem tera’na damar kambang

Meltas dhupolo pornama

lebat mesemma

lebat tajem socana

ngarambai ngobbar

daddi masteka alam

ngellap tar-kataran

Lu’-gulu’, 2024

………………………………..

Baca Juga: Sanja’na Agus Widiey; Bula Paggun Mole

Saebu Kerrong

Bula makerem saebu kerrong lebat angen

aesse dhulembar mesem, pangarep, ban esto

nape dika narema ta’ kalaban tobang?

Pornama malem sanonto

ta’ bisa agulung kerrong

sanajjan epako serret

kantos aleppet raket

barna-barna akadiya jarum

nyocco sadaja pangoladan

maelang paddhang kadaddiyan

mekol peddang kajembaran

Bula makerem saebu kerrong lebat angen

aesse dhulembar mesem, pangarep, ban esto

nape dika narema ta’ kalaban tobang?

Lu’-gulu’, 2024

………………………………..

Baca Juga: Sanja’na Aqil Husein Almanuri; Tase’ Badhur

Du’a Pamongkas

samoga’a pangesto neko

daddiya bato kene’ e atena

langkong mowang alar alangan

ban paddhang ngembangnga penang.

Pangesto bakal naccek

apale’ tor arajek

dhalem okeranna otek

dhalem pekkeran se mantep

Lu’-gulu’, 2024

………………………………..

Baca Juga: Sanja’na Maswadi Kama: Tanges Ngasowar

Tase’ Lao’anna

Settong careta mekkar

adhaun ro’om malantar

E tase’ lao’anna

badha macan abulu manes

e seongnga alampat maddu

ban matana mellok salaka, apajung naong

Sokona ngarkar ce’ tajemma

e balikadda bula, agaris tandha

alenglenge ate, abughel e dhadha

E tase’ lao’anna

badha takat paleng dhalem

agabay aba’ tasellem

amarga macanna ampon mesem

Lu’-gulu’, 2024

………………………………..

*)Santre PP Annuqayah Lubangsa kalaheran Gili Iyang. Ajar noles e Komunitas Persi (Penyisir Sastra Iksabad), Komunitas Teras (Tenda Literasi), Teater Akad, Paduka (Pasukan Santri Dungkek Area), Komunitas Damar Talpe’, tor LPM-Fajar Universitas Annuqayah.

Baca artikel dan berita menarik dari RadarMadura.id lainnya di Google News