Tanges Ngasowar
Satengkes kadaddiyan
e bakto sabellunna tellasan
tanges se ngasowar
akowak ta’ ekaedhing
amarga ate ampon gerring
dhari jalanna aba’ kadiya ladding
Cope’ pangabasan
oreng-oreng gumbira
saellana parcaja
ja’ pangaro ban pangarana padha
Annuqayah 2024
………………………………..
Baca Juga: Sanja’na A. Zakil Asror: Bula Santre III
Somela Potong
Namen pangesto e bandhungan
ta’ sagampang adabu’ potena oban
pangonong se rantep serret
ta’ kenneng padaddi alasan:
tolos ban lorossa bungka
samarena ojan ban kelappa
namong bila ampon somela potong
tadha’ panotop laen
kajabana maburung lalakon
Annuqayah 2024
………………………………..
Sanggerra’ Anyar
kaator dha’ macan bine’
Mesem manessa e parempen
e dhalem settong baddha kasamporna’an
leregga mata terep rassana
ban careta tadha’ laenna
Sanggerra’ anyar ekasango
paleng arga dhalem dhadha
saamponna komancer pacek epena
daddi nyaba saterrossa, saterrosa
sampe’ e Ajunanna Se Kobasa
Annuqayah 2024
………………………………..
Baca Juga: Amala dan Sinar Kelabu di Tepi Pantai
Berta Arongan
Naleka parao ngambang sajan jau
celkong socana paddhang kaburu
kaangguy mega’ kasap mera biru
Ora’ ganganna malantar pello malontor lesso
mergem serret pangarep
kalabangan ngamba’ omba’ nyer-kenyeran
kalaban berta arongan;
se paleng kellem dhalem pekkeran
innalillahi wa inna ilaihi raji’uun
Annuqayah 2024
………………………………..
Baca Juga: Dosen Gaib
Adhasar Kaca
Dhulekor pornama tar-kataran
nyompet serret kalaban gumegil
amarga mesemma se ganjil
taneyan ta’ mangger paemodan
Tale enga’ ta’ aserrat
bangal nabang jang-bajangan
ban ta’ sanggup nabar kadaddiyan
Annuqayah 2024
………………………………..
*)Santre PP Annuqayah Lubangsa, kalaheran Polo Gili Iyang, 19 April 2005. Ajar noles e komunitas Penyisir Sastra Iksabad (Persi), mahasiswa Universitas Annuqayah jurusan Ekonomi Syariah tor ajar e LPM Fajar tor Teater Gendewa.
Baca artikel dan berita menarik dari RadarMadura.id lainnya di Google News
Jadilah pembaca setia, gabung sekarang juga di channel kami!
