Santrè Pangarangan
Songennep
Kottha, sabellun sobbhu
Jid-masjid samakta narhèm
Ngadhek sokma
Jhâghât abungo ḍâri sopenna
Sarènna
Èsèngkap kongko’na ajâm
Mongghing bârâ’-lao’ Lapangan Giling
Santrè Pangarangan jhughân samakta
Jhirâp ngadhek
Atahajjud
Ngabhumè ḍâlem sojud
Masjid Aminah dhâddi saksè
Bhindârâ-bhindâri hoso’ parjhughâ
Ngangka’ asta ngajhum kanaka
Meddhellâghi lottrèngngan du’a
Nyèttongngaghi pangabulâ
Jhâghât ka’aghungan sè Maha Kobâsa
Trè-santrè Pangarangan
jân sèghep nyanḍhâng du’a
Abirjhi’ lalaran, agebber muroja’ah
Jughân takhossus kellas tahfidz
Ya Allah...
Ènḍhâ sanalèka nyèsèr pangoladhân
Amè’ pola ka’ḍinto sè èmaksod
Jhejjher hakèkat kabhunga’an
Oḍi’ tarentem dâhir tor bhâtèn
Nadzom Alfiah laon kapèreng
Ḍâri lospèker masjid, malèpor
Nerraghi pangasenneng
Subhanallah,
Cè’ aghungnga caraèpon santrè
Mapak sobbhu tor moncarra arè
Wujud sokkor ḍa’ sè Maha Ghustè
Nadzoman lèrè èlaguwâghi
Cè’ lèburrâ
Kantos maso’, nylosso’ ka ḍâlem atè
Kantos santrè sè ta’ perna
Dhâksakala èlang sossa
Kantos loppa ta’ poron sè palèmana
Kantos asompa
mèsem tarongghu paḍḍhâng raè
Sabâb nyatana
Neng ponḍhuk
Asennengngan so nèng romana
Marghâ monḍhuk ka’ḍinto tirakat
Nyonglèr barokah-èlmo manfa’at
Sè pon perna jhekjheg bhârenteng
Jân sekken nabhung parnyo’on
Makatojjhek sadâjâ pangarep
Mandâr moghâ kaparèng ceppet
Nahwu-sharraf monitoring nancep
Tahfidz lancar barokah nettep
Santrè,
Èngghi santrè Pangarangan
Sè bhumèna ro’om kalabân lampat parjuangan
Kyaè Abdullah bin Husein,
Kè Seppo-Kè Pangolo
Sè ponḍhugghâ assrè jughân ngerrongè
Jhujuk kalonta
Saompama gugusan zamrud
Nojjhek nèra’è jhâghât
Kabidhân angghun Pangarangan
Kottha Songennep, Madhurâ
Moncar asmana
Mathali’ul Anwar pasojudânna
Neng paanabhân soccè
Bhindârâ-bhindâri
Sadâjâ samè ngembhâng bhâko
Ta’ cokbâ ngokèr bâkto
Sèyang-malem a-mujahadah
Mabeccè’ totor bhâsa
Nènḍhâ tata krama
Ḍâri moljâna akhlak Syaikhona
KH. Moh. Abus Suyuf
Kantos kapetthèk buwâna tasawuf
Samporna,
Ongghu samporna
Santrè Pangarangan
Sadhâjâ soghek ghumatè
Ajhâr mellas, sabbhâr èlatè
Ḍâ’ ru-ghuru sareng kyaè
Jhughân ḍâ’ rèng seppo ongghu ngabhâktè.
Songennep, 9 Januari 2025
................................................................................
Baca Juga: Sanja’ Mudhar CH: Tembhȃng Maskumambang
Kètab Ghunḍul
Ajhâjhâr rapè ta’ ajhejjher artè
Namong tanḍhâ titi’ sè ngèngonè
Lafadz-lafadz sobung harkat
Kaserrat,
Nangèng bânnè jhimat
Sanaos jhugân karamat
Aèssè hikmah jhugân manfa’at
Ḍâlem lambârân-lambârân partèla’epon
Sabâb sarat
Kalabân èlmo pangaonèngan
Angghidhân para ulama’
Mapaḍḍhâng hokom sè bellun jhârna’
Kètab ghunḍul
Sebbhudhân lumbra nèng ponḍhughân
Marghâ èssèna namong jhâjhârân
- okara Arab
Sobung ma’na sobung harkat
Èngghi lerres
Kètab konèng jhugân sebbhudhân
Santrè ponḍhuk jhugân langghârân
Marghâ konèng bârna dhâlubâng
Sanaos ta’ sadhâjâna
Kètab ghunḍul dhâddhi bârisân
Èyajhi santrè ghây palanggherrân
Ngonḍhu èlmo sè aca’-ranca’
Kantos hatam khilaf pamangghi
Saèngghâ ta’ ghâmpang ngalèrowaghi
Ponapa polè jâ’-sakejjâ’ abid’ah-aghi
Wallahi, sè kantha ghânèka
Sèkodhânna kalompo’ wâhâbi
Ta’ langkong
Jhâ' toro’, ghi?
Songennep, 13-01-2025
................................................................................
Baca Juga: Puisi BH. Riyanto: Tepi Magrib
Ngajhi Lampat
Jhâman ampon jhâu
Adhingghâllâghi angghun pameddhâlân
Sadhâjâ sè nyanḍhâng romasa
Bhâkal paḍḍhâng abirjhi’ sossa
Nolèya ka bingkèng ampon ta’ nogghâ
Sabâtara asta
Karo bisa araghâ-raghâ
bhâ’ ghi’ bisa’a ajhumbu’ kasta
Èmot dhusa pon tompang-cèccè’
Kama’sèyadhân tambâ macopè’
Alassa bâ’-abâ’ân
Nyara sadhâjâ neppè..
Ḍâri abheddhâk dhunnya tor fatamorgana
Èkatèmbhâng nabâng jâng-bâjângan
Ango’ ngajhiyâ lampat
Saèngghâna nyabâ pon para’ totok
Labâng patè pon satèpès labun
Ambuwi,
Ambuh jhâ lèbur maèn!
Kèmpet!
Jhâ’ ghi’ ghibâ agâgâk lâ’-ghellâ’ân
Marghâ ghellâ’ ghâlina atè
Manabi apangrasa segghudhân cengkal
Lampat-lampat pon megghis topo
Kalabân apoy kama’sèyadhân
Hokom Allah ta’ ètoro’
Adigâng adigung norodhi perro’
Adiguna èlompa’ napsona
Cangkolang,
Èyatorè ḍâ’ sè kasokan
Nèka sabates ajhaghân
Ḍâri dân kaulâ sè jhugân
-bucco’
Sèmpen ghupa’na, peltè tangèssa
Ghâssa’è,
Ongghuwâghi tobhâddhâ!
Pola ghi’ bellun lambat
Ka’angghuy nopowè lampat
Kaèmodhi,
Ajal ta’ ngantos bisè’ otabâ sanat
Songennep, 13-01-2025
................................................................................
Kanjeng Rama tor Èbhu
Nyabis pamator, Rama
Kalabân ajhunjhung pangarep
Samoghâ ajunan sareng èbhu
Jhâjâ, bhâjjrâ, tor ghumbirâ
Èstona,
Abdhina ghi’ nyanḍhang toḍus,
-Kanjeng Rama
Nyo’on sapora sabâb abdhina
Kantos mangkèn
Ghi’ bellun bisa nyellebbhi
Pangghâliyânnèpon
Ajunan
Kanjeng Èbhu,
Ajunan
Sè sabbhârrâ langkong lowas ḍâri saghârâ
Samoghâ ajunan sareng rama
Tettep kaghânjhâr sèhat sadhâjâna
Lanjhâng omor, barokah, tor jhejjhek
-ḍâlem islam sareng iman
Anglèbâdhi okara
Songkem abdhina ḍâ’ ajunan
Sanaos,
Abdina romasa ta’ ghâḍhuwân raè
Sè èpanyabisa ḍâ’ ajunan
Tompang-cèccè’ pangatoḍus
Sabâb abdhina segghudhân dhârâka
Nèrtèr bhelling kabhâlengngerran
Bhân arè ta’ cokbâ nabur marḍâ
Mator èngghi
Abdhina, Kanjeng Èbhu
Sè segghut mapelles ghuli enneng
Segghut malobâ ḍâlem okara
Nyongkanè atè tor pangghâliyannèpon
Saèngghâ ajunan
Segghudhân nyapcap aèng socana
Lè-malè,
Abdhina nyo’on sapora, Kanjeng Èbhu
Jhâ’ bhâsto abdhina
Bhâli’ ta’ langkong jhâ’ kantos bhusen
ka’angghuy terros nonton
-abdhina
Sopajâ dhaddhi pènottra sè moljâ
Tor amoljâ’âghi ḍâ’ka ajunan
Jhâjâ dhunnya tor ahèraddhâ
Kanjeng Èbhu
Abdhina lagghi’ terros ajhâr
Sak-ngasak bellâs pètodhu
Ngangghi’â ancak panyabbrângan
Aḍhâjung orèp
Nojjhu saghârâ pangabhâktè
Ya Walidayya,
Kadhi ponapa carana abdhina salamet
Ḍâri bhalâi dhunnya tor sèksa ahèrat
Manabi sobung bellas Ghustè Allah
tor ridâ’èpon ajunan
Ḍhu Kanjeng Rama, Kanjeng Èbhu
Kantos mangkèn,
Ḍâri bhughellân atè sè palèng ḍâlem
Abdhina terros ta’ bhusen
Ngajhiyâ bâb oḍi’ ḍâ’ ka ajunan
Sabâb ajunan
Mènangka kaca kebbhâng tor patapa’an
Kanjeng Rama, Kanjeng Èbhu
Rassaèpon kantos kèyamat
Pangorbhânan tor bellâs asè ajunan
Ta’ kèra mampo abdhina males
Sanaos sacapcap aèng soso
Sanaos sacapcap lekkona pello
Lè-malè,
Pramèla abdhina nyo’on sapora
Sapèsan pamator
Mator sakalangkong atas kasabbhârânnèpon
Kabit ngalahirrâghi, adhulâng, tor aladhin
Masakola, mangajhi kantos mamonḍhuk abdhina
Sanaos sateppong arbhes, abdhina lagghi’ ta’ bisa
Pa-ponapa
Nangèng ḍâri lobuk atè sè palèng ḍâlem
Tarongghu sareng du’a abdhina
Samoghâ dhâddhiya kasamporna’an mongghu ajunan
Rabbighfirli wa liwalidayya
Warhamhuma kama robbayani shaghiro
Songennep, 15-01-2025
................................................................................
*)Alumnus Ponpes Mathali’ul Anwar Pangarangan, Sumenep. Aktif mengajar di SMA Darul Ulum Batang-Batang, Sumenep.
Baca artikel dan berita menarik dari RadarMadura.id lainnya di Google News
Editor : Hera Marylia Damayanti