Bula Paggun Mole
keng ta’ paste ja’ bila,
tape bula paggun mole.
*
sabab kerrong talebat nganyer
sampe’ e ate ekarassa ngalennyer.
*
nape dika tos-antosan bula
se gi’ ta’ paste ja’ bila?
*
olle dika tao,
e dhinto bula posang.
*
argana berras sajan larang
todhus mon gi’ ngodha raja ka otang.
*
baramma mon pas gi’ mole
tengka e dhalem saare bisa dhukale.
*
dhu, dina ja’ taker antos
mon kerana gun agabay dika talpos!
Jogjakarta, 2024
……………………………
Baca Juga: Sanja’na A. Zakil Asror: Bula Santre III
Sabab-Sabab Kabunga’an tor Kasossa’an Bula
bila mesemma dika nyelbi’
kabunga’an bula noro’ nyolbu’
tape anape bila bula ngabas
aeng matana dika ngagarabas
kasossa’an bula ta’ kenneng tamba’
maske dhadha ampon bula tapet?
Jogjakarta, 2024
……………………………
Gabay
mon ca’na bula,
dika ta’ alako ghabay,
tape gun agabay lako.
*
mekkera dika?
*
are sanonto se tello polo ebu
lagguna bisa ongga ka (em)pa’ polo ebu.
*
daddi maddha kala’ badhana
okorragi ka kabadha’anna.
*
bila odhi’ ekeba kaburu
kane’madhanna sajan jau.
*
terro eakowana oreng laen ja’ sogi?
dhu, ganeko rogi!
*
melana, kala’ badhana bai
olle tennang, baramma?
Jogjakarta, 2024
……………………………
Pangaoban
aeng matana dika buru ekarassa ce’ derressa
sampe’ bula nyellem, bengko-bengko noro’ tasellem.
bila bungkar se anyama ju-kajuwan
tanto sajan sakone’ pangaoban.
Dika kodu tao
ja’ tong-settongnga pangaobanna bula
se paleng asre
tadha’ laen, ekagabay dhari mesem kalemma dika.
pas baramma, bila sanonto dika gasek duka?
Jogjakarta, 2024
……………………………
Pangaterro
pangaterro bula molae lamba’ mola;
maelang pangaterro ganeko keya.
Jogjakarta, 2023
……………………………
Okara Teteban
salanjang jaman taresna e ate bula
eteteba dha’ dika,
nape pole dha’ se Kobasa.
salaggi’ pangaterro neko badha
Insyaallah pangarep bula ta’ kera aoba.
tape, ja’ pon nyamana jalanna odhi’
kembang tor dhurina paste nyelbi’.
daddi maddha terros ajalan abareng
olle kabunga’an ekarassa lebbi langgeng.
ja’ sampe’ bula ban dika mekker pandha’
olle kasossa’an ta’ gasek akalemba’.
Topote, 2024
……………………………
Nape se Earep Dika dhari Bula
maske bula ngarep dika bunga
loka ta’ kera adina taresna
melana, maddha kabala,
nape se earep dika dhari bula?
dika ta’ asowara
coma’ aeng matana ngalocor
sampe’ bula ta’ mangga
ngabas beddha’na dika noro’ lontor.
”ai, ja’ nanges!” oca’na bula
”bula tao,
odhi’ e jaman sanonto
ta’ cokop abandha esto” oca’na dika
”mon lamba’ badhana,
mo sanonto kodu badha bandhana” oca’na dika pole.
bula gun bisa atole,
asabab tangessa dika
aropa rassa ta’ mangga
odhi’ nespa kalaban bula.
se earep bula dhari dika
alako, nyare bandha
kaangguy mabunga bula.
Topote, 2024
……………………………
Bila Pekkeran Rosak
jalanna paste noro’ rosak.
Topote, 2024
……………………………
Laher e Topote 17 Mei. Kalowaran MI Darussalam Juruwan Lao’ tor MTs sampe’ MA e Nurul Muchlishin, Pakondhang, Rubaru, Songennep. Tolesanna ngombar e pan-barampan sorat kabar. Sanonto ajar e Jogjakarta.
Baca artikel dan berita menarik dari RadarMadura.id lainnya di Google News
Editor : Hera Marylia Damayanti