Oleh AGUS WIDIEY
KAULA sareng ajunan sadaja kodu oneng dha’ Islam se gasek ebut-sebbut agama rahmatan lil alamin. Artena, agama se ampon etarema e dhalem masarakat kaangguy marokon kaodhi’anna manossa tor bisa nyontowagi tengka-tengka se becce’. Melana, e dhabuna Guste Pangeran ejarba’agi kaangguy kaula sareng ajunan sadaja saleng arebbu’ dhalem alako kabagusan. Sakeng ja’ reng kaula sareng ajunan sadaja gi’ anyama manossa, ta’ usa bi-talebbi, kala’ biyasana bai, cokop terros jekjek ta’ atobangan, ta’ acaretcedan. Sabatara oreng Islam dibi’ aberri’ pangarteyan dha’ ”okara” Islam paneka kata’adan otaba atoro’ dha’ parentana Pangeran.
Parlo ekaonenge, saongguna rabuna Islam banne gun nyeddhing atena manossa kaangguy pera’ ngaparcajai, nangeng lebbi dhari ganeka. Maksodda, kodu bisa majaga kaparcaja’an ganeka kalaban dhasar-dhasar pekkeran se kowat. Sabab, tadha’ Islam se ta’ epadhapa’ kalaban pangataowan tor pangarteyan.
Akantha parenta dhalem ngalakone powasa se ewajibbagi monggu oreng Islam sadaja. Sabab, dhalem elmo agama Islam, ampon eajarragi ja’ powasa paneka parenta-Na se kapeng empa’. Ajalane powasa paneka ta’ gampang, buktena bai ngampet lapar sareng pelka’ kadhang ta’ kellar. Kadiponapa manabi gi’ epakon ngampet salaen ganeka? Mesalla, ngampet tengka se ta’ sae.
Bannya’ pekkeran angko se gi’ alaban parenta powasa, maske barampa kale ebalai gi’ paggun ta’ nangko.
Nangeng, sabellun sajan jau jajarba’an paneka, kaula terro ajarba’agiya gallu caretana asal mola powasa. Sabab, maca Islam are samangken, ta’ gun ambu neng-enneng e dhalem okara, tor laju narema parenta-Na. Artena kodu bisa ngaonenge gallu dha’ jalanna Islam sampe’ parenta se ewajibbagi ganeka. Paleng sakone’, olle pangataowan kaula sareng ajunan sadaja ta’ nyengla dhalem ngoladi Islam se sepa’ sampe’ are samangken. Tor jugan olle bisa ajawab-ajarba’agi manabi badha se atanya; asal mola parenta akantha powasa paneka.
Imam Al-Qurthubi ajarba’agi asal mola badhana powasa, ja’ manossa se paleng dullu ngalakone powasa e dhalem agama Islam paneka Nabbi Nuh. Nabbi Nuh ngalakone powasa salastarena toron dhari paraona. Jugan salastarena omba’ raja ngantem ummadda se cengkalan. Nangeng, powasa se elakone Nabbi Nuh sareng sabagiyan ummadda se atoro’ paneka aropa’agi tandha sokkor dha’ Pangeran se ampon nyalameddagi aba’na tor sabagiyan ummadda kasebbut dhari rajana banjir jugan rajana omba’ se agumbellan.
Laen kalaban caretana Nabbi Muhammad e bakto teba e Kottha Madinah. Nabbi Muhammad ngoladi oreng Yahudi jugan ngalakone powasa e tanggal sapolo bulan Sora. E tanggal ganeka, oreng Islam esonnaddagi kaangguy apowasa jugan. Nabbi Muhammad pas mareksane dha’ sala’ settong oreng Yahudi, alasanna apowasa e bulan Sora ganeka. Oreng Yahudi kasebbut ajawab, ja’ powasana ganeka, menangka rassa sokkor dha’ Pangeran se ampon nyalameddagi Nabbi Musa tor ummadda se atoro’ dhari kalakowan darakana Fir’aun. Melana, Nabbi Musa apowasa sabban tanggal sapolo e bulan Sora.
Saamponna ngaonenge, Nabbi Muhammad ajarba’agi careta powasa ganeka dha’ sadaja ummadda tor jugan makon sopaja apowasa e tanggal sapolo Sora. Maske gi’ dullu parenta ganeka ta’ kose epaksa’agi. Artena, pasera se terro mabattala powasana eparengngagi, coma kodu agante’e kalaban apareng teddha’an monggu oreng ta’ andhi’ (mesken). Nangeng, akherra Pangeran makon dha’ sadaja manossa se gi’ baras salamet, se ta’ dhalem kabadha’an parjalanan, sopaja apowasa, tor abuka (olle adha’ar-ngenom) saamponna are compet otaba bila dhapa’ ka adan Maurib.
Artena, sabellun toron sorat Al-Qur’an kaangguy neggessagi kewajiban dhalem apowasa, ummat Islam ampon biyasa ngalakone. Akantha powasa sabban tanggal sapolo Sora se ampon ejarba’agi e attas.
Manabi kaula sareng ajunan sadaja onggu-onggu Islam, ta’ kera adinggalagi powasa. Sabab, kalakowan ganeka ampon eparenta monggu Pangeran. Powasa bisa jugan earte’e kalaban lateyan dhalem ngopene aba’ dhari kalakowan otaba tengka se ta’ sae. Melana, e angghidanna Matroni Muserang pan-barampan are tapongkor e sorat kabar ka’dhinto, (Minggu, 17 Maret 2024) ejarba’agi ja’ apareng obang kalaban tojjuwan polana apeleya kalebun, apeleya bupati, apeleya gubernur tor laen samacemma neka ta’ sae tor ta’ kengeng otaba ta’ olle etarema sabab bisa sampe’ maso’ dha’ kalakowan dusa.
Dhaddhi, tore saleng paenga’, kalaban badhana powasa neka, mon bisa (nangeng kodu bisa) adaddiyagi aba’ lebbi ngastete e dhalem ponapa bai. Otamaepon e dhalem urusan tengka se kadhang sala kappra. Kaemane sadaja elmo se ekaolle saamponna esare kalaban ejalannagi dhalem kaodhi’an re-saare. Napapole ampon oneng, ja’ Nabbi Muhammad epadhateng ka alam dunnya paneka tadha’laen, coma’ kaangguy abecce’ tengka se gi’ korang sepa’. (*)
*)Kalowaran MI Darussalam Juruwan Lao’, MTs–MA Nurul Muchlishin, Pakondhang, Rubaru, Songennep
Baca artikel dan berita menarik dari RadarMadura.id lainnya di Google News
Editor : Hera Marylia Damayanti