Sanja’na Agus Widiey

Maddha Patennang

se gi’ ta’ paste

ja’ kose dika kobatere

se la mare

ja’ kose dika pekkere.

patennang!

anape?

asabab kabunga’an tor kasossa’an

ta’ kera nyempang dhari odhi’na dika kalaban bula.

melana, maddha patennang.

patennang badha Allah

se kobasa dhalem sadaja

se ngopene dika kalaban bula.

Jogjakarta, 2023

…………………………….

Saongguna Bula Terro Keya

/olle dika tao

saongguna bula terro keya

apolong kalaban dika,

ta’ mekkere dhurina careta

ta’ mekkere aeng mata macem barna

cokob bisa saleng sapa sabban are

tor saleng pandeng kaangguy maelang seppe.

/e dhalem ate

dika settong agumantong

akantha malathe

earep ro’om sampe’ mate.

/maske dhaun ellop kabbi

ga-moga gi’ badha’a karena taresna

se bisa mabali ojan ka tana

sabab bula ban dika bakal abali keya

coma baktona ta’ paste ekataowe

asabab odhi’-mate ampon eator Guste.

Jogjakarta, 2023

…………………………….

Tadha’ Gantena

sanonto, are-are bula arassa bida

sajjegga dika agabay bula kaceba.

ondhem petteng gun entar lebat

padhana ngalesserra barat.

dhaun ngampet kerrong

ojan ta’ endha’ nompa.

kembang ngalotor

e matana dika.

tadha’ gantena

saamponna dika adina

aeng accen e mata bula

ta’ asat, agili ka raba sokma

madaddi peddi sakabbinna

asabab nanggung panassa kerrong

dhalem taresna se kaelangan ontong.

sanonto, bula apangrasa

ja’ dika tadha’ gantena.

Jogjakarta, 2023

…………………………….

Roba se Ngombar, Mesem se Mekkar

ngombar robana dika

e jalan seppe se anyama ate

noduwagi kamardika’anna odhi’ bula.

angen tamba santa’

tape ojan gi’ ta’ dhapa’

abali nangale manossa

ngampet kerrong ban sossa.

aeng mata aoba lekko.

dhaun se ngalotor

kadhang ta’ ngantos towana omor.

taresna ta’ jenneng pole.

mekkar mesemma dika

e adha’na mata

akantha kembang mabar

asabab kabunga’an bula ta’ kenneng tabar.

ju-kajuwan epoger

agabay ta’ nyamanna eber.

maddha padha paesto

ja’ sampe’ pangaterro

ngeba dha’ ka angko.

maske ngombar bannya’ roba

tape monggu bula

coma dha’ dika settong

kabunga’an bula agumantong.

Basabasi, 2023

…………………………….

*)Laher e Topote, 17 Mei. Tolesanna ngombar e pan-barampan sorat kabar. Ajar e Jogjakarta.

Baca artikel dan berita menarik dari RadarMadura.id lainnya di Google News