È Nèmor Kara
Ajhâlân salanjhângnga sokma
È nèmor kara,
Arengreng
Nyolet bâlungan
Akadhi caha ta’ bu-ambu
Aghâmbhu tèngka, acalèneng
Aḍhuso’ mengghung
lem-ngalem pakapa
Mekkasan, 27 Januari 2023
…………………………………..
È Jhâman Mangkèn
emma’ embu’
nyo’on sapora
sadhâjâ tèngka
ta’ pènal
ngaghem bhâsa
emma’ embu’
è jhâman mangkèn
kaoḍi’ân ”mara kocèng
along-kalong tasbhi”
emma’ embu’
kaoḍi’ân ampon ”lèsan ghulâ
bugghik mèmbhâ”
Mekkasan, 25 Desember 2022
…………………………………..
Ajhâr
ngonjhârraghi kaoḍi’ân maghârsarè
lebât ojhân sè amaḍu
ajhâr atata è matèna abâ’
mon ta’ sodhek bân na’na’ ajhâr
oḍi’ salèngka’
karep nyalabâr
kantos ta’ asalebbâr
Mekkasan, 26 Desember 2022
…………………………………..
Kembhâng Mabâr
kembhâng mabâr mekkar
ta’ mastè ro’om nyareḍḍem
makapèncot atè
kaḍhâng dhâddhi salèngka’na
abâ’ è jhâman sè tanto
kembhâng mabâr ètèrtèr
è jhâlân, ḍurina makapèncot
atè nyalabâr
Mekkasan, 19 Oktober 2023
…………………………………..
Kottha Ampon Apoter
bulâ ta’ ngaonèngè
tapè bulâ aromasa onèng
bâbinè’ sè ngartè tor aromasa
akadhiyâ jè’-ghâjâè patè’
kottha ghânèka ampon apoter
moter jhughân raddhinna dhika
salanjhângnga jhâlân
pamandhengnga madhumpa tasè’
san-rasan sajân ta’ kabuwâ’
akantha bânjirrâ è jhâman lambâ’
robâna dhika samangkèn
ampon roḍèp, akadhi sorop arè
namong pangabhârân
sè makapèncot atè
ponapa ka’ḍinto sè kasambhât racon
racon kaoḍi’ân
è salanjhângnga jhâlân kottha
Mekkasan, 5 Januari 2023
…………………………………..
Kocèng bân Jâng-bâjânganna
kocèng mandhèng pa’anabhân
bân jâng-bâjânganna dhibi’
è tèra’na arè, sambi ngoca’
”sèngko’ bhâkal ngakana sapè
ḍâgghi’ sorop arè”
salanjhângnga arè, kocèng
no’-ngono’è sapè. tapè
è nalèka asar mabâ, koceng
ghun ngatalè jâng-bâjânganna
abâ’na. kocèng ngoca’ ”ngakan
tèkos ta’ arapa kèya”!
Mekkasan, 5 Oktober 2023
…………………………………..
Baca artikel dan berita menarik dari RadarMadura.id lainnya di Google News
Jadilah pembaca setia, gabung sekarang juga di channel kami!
