Sanja’na A. Zakil Asror

Kalaban kerrong

Aba’ ngarep apolong

Kalaban salawat

Aba’ ngarep syafa’at

Dha’ Rasul arebban ummat.

Battangan, 2023

……………………………

Syafa’at se Ekarepot

Aeng mata agulung bulan Molod

Taresna syafa’at ekarepot

Tako’ ta’ dhapa’ dha’ konco’na sirat

Amarga ta’ kaanggep kompolan ummat

Sanja’ dha’ka Rasul

Kabbi berka’ nete ondhem

Bungana taselpet dhalem dhadha

Ngalesser daddi tamba

Dhu, Nabi

Aba’ ngarep dhapa’

Dha’ Mekka kalaban santa’

Moga angen ngater du’a

Se eocol ban malemma.

Battangan, 2023

……………………………

Salawat Ebaca Ngaremmes Aeng Mata

Sowara kabula nyangkole tanges

Amarga maca essena dhadha

Pornama kalaban bintang daddi sakse

Ja’ kerrong neko ta’ kera lekko

E malem se tapongkor

Angen berka’ dhari temor

Guntor noro’ asokkor

Amarga ngedhing sanja’ tera’ mancorong

Dhu, pongkasan sadaja nabi

Ngereng nyepper dhalem mempe

Maske sageddep ta’ abali pole

Ekabunga kantos pate.

Battangan, 2023

……………………………

Ja’ Sakenga se Magaliya’ Ate

Ja’ sakenga angen bisa etompa’

Epadaddiya pa’-tompa’ dha’ astana

Tape neko pera’ mempe

Se magaliya’ dha’ ate

Ja’ sakenga arangka’ paggun dhapa’

Epangorasa kerrong se ta’ katamba’

Maske nyatana rassa neko

Paggun ngaton kajaba atemmo

Ja’ sakenga bula sakte

Kalaban meddem dhapa’ ka tana socce

Maka bakal banjir aeng mata

Sabab rassa etamba’ana.

Battangan, 2023

……………………………

Alam Mekkar Sabab Tetesan Nur dhari Ajunan

Ajunan ngombar dhu banne bajangan

Akadiya mata are ban bulan

Alam se ta’ odhar aoba mekkar

Amarga tetesan nur dhari ajunan

Oreng ta’ apangrasa

Noding dhadhana kalaban bunga

Sanggu badhana meddhal dibi’

Ta’ asabab katampessan syafa’atta

Mon terro ngenoma e kautsar

Lalampanna gabay kaca

Dhabu se alos guli se entos

Sabban arena ja’ paloppa.

Battangan, 2023

……………………………

Nespa se Akobar Eseram Kalaban Sabbar

Dhapa’na ro’om mabar

Maske sataon paggun anyar

Sonarra mata are saomorra

Sengka nyeyom dha’ kole’na

Malaekat e attas ondhem

Padha asojud ban ngalem

Amarga asta sa-biyasa

Nyeba’ bulan sageddebban mata

Aeng mata bula tamburuwan

Amarga enga’ dha’ sajarana,

Nespa tor akobar

Eseram kalaban sabbar.

Battangan, 2023

……………………………

ZAKIL, laher e Sumennep 03 Juni 2006.

Baca artikel dan berita menarik dari RadarMadura.id lainnya di Google News