Sanja’ Agus Widiey

Ma’, anggep kaula na’-kana’,

se sampe’ bila bai paggun buto dha’ sampeyan.

Ja’ anggep kaula oreng towa,

se sakabbinna e dhalem odhi’,

bisa etanggung dibi’.

essena cethak akantha rombu,

ngabber sabban malem,

atompo’an e baja laggu.

seyang epekkere, malem maso’ ka dhalem mempe

coma’ kaula gi’ ontong, badha sampeyan makowat ate.

Ma’, tedhung ampon ta’ sae,

mella’ gasek tapanggi sareng kaelangan.

ba’ napa se bisa eatorragi kaula dha’ sampeyan?

badha e disana oreng, sokma sajan mesken, raga taker kerreng.

Ma’, gi’ laen sareng kerrong se kaula ampet,

dhari ngombarra pajjar, sampe’ mataare compet,

ta’ bisa ebitong, tor jugan ta’ bisa eparetong.

Ma’, sampe’ samangken kaula gi’ enga’

sabellunna mangkat, sampeyan masenga’

sopaja kaula ta’ adina dha’ bajang se lema’.

Ma’, saompama kaula paleman dha’ magarsare,

ja’ tagi tor ja’ tanya’agi napa se ekaolle

sabab atane bai kaula gi’ ta’ oneng

tor gi’ ta’ toman apello koneng

Ma’, du’ana sampeyan aropa’agi kapasteyan.

rassana

            manes

                        akantha

                                      maddhu

                                                 se

                                      paraddhu

                               monggu

                       eberra

                 kaula

           jugan

    eberra

Pangeran.

Jogjakarta, 2023

…………………………………..

Mele Dika

saompama bula mele dika

e laen bakto:

ba’ ta’ loppa’a dika dha’ janjina?

se tapongkor

janjina ampon ngalotor

bula se ngantos

taker ate para’ talpos

bula coma ngarep paste

dika bisa aberri’ bukte

bula se mele dika

sabab odhi’ terro mardika

sabab bila dika andhi’ otang

bula keya se noro’ posang

dika toju’ e attas korse

bula ngerray e babana panas are

tape ta’ anape,

poko’ neyaddha dika ongguwan

tor bula ta’ gun egabay bur-leburan.

Jogjakarta, 2023

…………………………………..

Mekkera Dika

mekkera dika dha’ kaodhi’an neko

olle kabunga’an ta’ aoba lekko

gi’ bangaseppo

parembagan ta’ gun du’-leddu’ kapo

tana ta’ edina

tase’ ta’ epasake’

mekkera dika dha’ kabadha’an neko

kaangguy mekkar dhari bakto ka bakto.

Jogjakarta, 2023

…………………………………..

Kaceba

kaceba rassa tang ate

bila se epele bula

janjina ta’ daddi paste.

Jogjakarta, 2023

…………………………………..

Masenga’a

mon dika nyocco

senga’ e laen are

atena me’ ecocco

melana, kodu te-ngate

tor ker-pekker pole

ja’ sampe’ badha kasta

e pekkeranna bula ban dika.

Jogjakarta, 2023

…………………………………..

Bila Lampu Mera

ja’ ru-kaburu

antos sampe’ abarna biru

mon gi’ terros

biyasana tagentos, bisa talpos.

Jogjakarta, 2023

…………………………………..

*)Laher e Topote 17 Mei 2002. Kalowaran MI Darussalam Juruwan Lao’, MTs sampe’ MA e Nurul Muchlishin, Pakondhang, Rubaru, Songennep. Mahasiswa prodi Aqidah dan Filsafat Islam UIN Sunan Kalijaga Jogjakarta.

Baca artikel dan berita menarik dari RadarMadura.id lainnya di Google News