Le-Mole
Ngantos bula ka molena dika
sopaja mokka’ labang sokma bula
se pon etotop kalaban gunji taresna
se edhimma gunjina cekka’ e mesemma
E labang neko, pangarep bula sajan rapet tor rape
tape kerrong paggun maso’ maske re-lere
ekeba angen dhari bato ka bakto
Le’, maddha duli le-mole
teggu’ gunjina se gi’ abarna pote
ja’ sampe’ eojane aeng matana pole
olle seppe ta’ aoba karat e dhalem ate.
Topote, 2023
……………………………
Tanto Dika Tao
Pekkeran sajan rengsa
sajjegga jau dhari pepe alossa
aba’ se gun darma
matoro’ sokma ka roba pornama
maske mardhana seppe
paste teba e laen are ka dhalem ate
sabab bungkana taresna
banne gun ngembang bunga e ranca’na
tape badha loka paleng matalka
se etandhai kalaban ojan aeng mata sabban mosemma.
Topote, 2023
……………………………
Taresna #2
Sabab dika
ka se laen bula loppa.
Topote, 2022
……………………………
Kaelangan #3
salaen talka,
odhi’ arassa ta’ mardika
bila bula kaelangan dika.
Juruwan Laok, 2023
……………………………
Damar Korong
Kaangguy ngocol-matenggi damar korong
Ta’ cokop mon gun badhana oreng settong
asabab kodu badha se neggu’agi
ban sombuna kodu esoleddagi.
Damar korong nera’e langnge’ ban bume
jagat se asalla seppe daddi ramme
amarga kabunga’an teba e bannya’ ate.
–E dhalem damar korong
Sadaja pangarep epagattong
olle odhi’ teros ontong–
Ga-moga ta’ sampe’ nyangsang,
ga-moga ta’ ekello’ e tengnga jalan,
olle kabunga’an ta’ elang
sampe’ dhapa’ dha’ tojjuwan.
E dhalem damar korong
hajat epasettong
olle ta’ potong
jaja raja, tekka mardika.
Topote, 2023
……………………………
*)Laher e Topote, 17 Mei 2002. Kalowaran MI Darussalam Juruwan Lao’, Kalowaran MTs sampe’ MA e Nurul Muchlishin Pakondhang, Rubaru, Songennep. Sanonto ajar noles e Komunitas Damar Korong, Songennep.
