alexametrics
Minggu, 17 Jan 2021
radarmadura
Home > Esai
icon featured
Esai

Budhaja Politik Oreng Madura

03 Januari 2021, 21: 28: 35 WIB | editor : Abdul Basri

AHMAD MUHLI JUNAIDI Bisa epanggi’i e @a.m.j._menulis

AHMAD MUHLI JUNAIDI Bisa epanggi’i e @a.m.j._menulis (ISTIMEWA)

Share this      

E DHALEM pangoladan se paleng jau, oreng Madura ampon nganggep bapa’, ebu, guru, rato daddijimat. Badhana ca’-oca’ ka’essa’, ngabdi dha’ Pangeranna lakar ta’ esaba’. Jat lakar ta’ parlo esaba’, asabab Pangeran se esemba oreng Madura ampon daddi adat kabiyasa’an monggu dha’ kaodhi’na. Pangeran ampon katon e dhalem salera bapa’. Pangeran jugan katon e dhalem salera ebu, jugan guru, tor rato.

Amarga rato aropa’agi Pangeran katon dha’ masala politik pamarenta’an, melana kaangguy oreng se daddiya rato ta’ gampang kor daddi. Sabab budhaja politik oreng Madura asangkol tor asomber dhari Pangeranna. Dhalem hal ganeka, konsep oreng Madura para’ sameya sareng konsep apolitik pamarenta’an se ekennal kalaban ”teori Kedaulatan Tuhan tor teori Kedaulatan Raja” epasettong.

Manabi teori Kedaulatan Tuhan tor rato ampon korang eparcaja sareng oreng Bara’ (Eropa tor Amerika), kalaban tandha-tandha ampon elang cora’ nagara monarkhi absolut tor konstitusional, agante dha’ bangon republik, maka konsep rato dhalem angen oreng Madura paggun badha tor lekket. Oreng Madura ce’ yakinna, mele rato kodu teppa’ dha’ oreng se amanah, taat dha’ Pangeranna, majunge umadda tor sepat-sepat Guste Pangeranna se laen.

Dhimin, demokrasi peleyan rato monggu dha’ oreng Madura coma ekennale dhari coccowan kalebun. Sabab ganeka peleyan rato se paleng kona. Namong, amarga dunnya paneka teros aoba, melana oreng Madura ekennallagi dha’ konsep demokrasi Bara’. Molae oreng Madura eajari kadiponapa mele bupati, mele gubernur, mele DPR, tor saterossa.

Kabidan konsep peleyan se laen dhari mele kalebun ngombar, oreng Madura gi’ ta’ kennal ponapa ongkos nyocco otaba pesse politik. Oreng Madura dhateng sasarengan kaangguy mele parpol, e masa Orde Baru lamba’ ta’ olle ponapa. Ta’ toman badha sogo’ kacer sogo’ kanan. Aman masa-masa ganeka. Amanna dhari sogo’ tor melle sowara masa ganeka amarga lakar calon-calon ta’ toman nabuy dalubang pesse, atamba kalaban oreng Madura laggi’ lebbi bannya’ se apangrasa, saonggunna narema sogo’ tor aberri’ sogo’an, kadhuwanna bakal maso’ naraka. Babulangan kadi ka’dhinto ce’ lekkedda ebugel dhelam atena oreng Madura.

Are atamba bulan, bulan atamba taon, taon atamba masa. Kaodhi’an oreng Madura aoba jugan. Konsep peleyan rato noro’ aoba jugan kalaban aobana kabiyasaan odhi’ oreng Madura. Samangken peleyan demokrasi budhaja oreng Madura ampon eober kalaban pesse. Berra’ rasana terro daddiya rato e are sanonto manabi ta’ gadhuwan obang se bannya’ kaangguy melle sowarana ra’yat. Daddiya kalebun kodu nabuy pesse. Terro daddiya bupati jugan kadu alama’ pesse.

Aobana barna kabiyasaan peleyan oreng Madura dhari se ta’ gumantong dha’ pesse, sampe’ kadi sanonto ra-kera emolay e masa Reformasi. Se jellas aba’ ampon dibasa naleka Orde Baru ja-jajana sampe’ e Reformasi taon 1998. Ropana, Reformasi banne coma ngoba pamarenta dhari sentralistik daddi otonomi daerah. Ropana banne namong bebassa kabadha’an se aoba dhalem era Reformasi, namun jugan aobana masarakat dhalem mele calon-calon ratona.

Naleka pamanja’ aobana kabiyasaan se molae ta’ bagus, lakar ekabidi dhari calon-calon ratona se terro epeleya. Kalaban sarana rassa nola’ ra’yat dha’ sadaja papareng dari calon-calon, egabay kasempatan moso calon ratona kaangguy ngater amplop se tojjuwanna ma’le epele. Kadhang jugan, calon-calon rato nampa berras tor menya’ guring. E laen bakto, kadhang apareng bantowan sarimi, tellor, tor obat-obatan. Calon-calon rato onggu-onggu lamba’ bila ampon semma’ dha’ peleyan.

Sanekana se arosak dha’ budhaja demokrasina oreng Madura. Manabi saroju’ dha’ kebiyasa’an se samangken molae landhu e dhalem masyarakat kalaban ca’-oca’ ”mon tadha’ pessena ja’ cocco, akaton jat molae epaksa kaangguy maso’ akkal.

Artena, calon rato se nyoba’ masalamet pamele kalaban ta’ adu’um pesse bakalan ta’ olleya peleyan. Estona, ca’-oca’ ganeka lakar kalowar dhari lesanna oreng se kamarok. Naleka oreng se andhi’ ate tera’ ta’ kera agumantong dha’ pesse malolo dhalem mele calon rato. Sanya’-bannya’na oreng mele kalaban pesse, paste paggun lebbi bannya’ oreng Madura se ta’ kasokan kalaban sogo’an paneka.

Budhaja politik peleyan oreng Madura moga-moga paggun sekkenna. Sekken dhalem arte ta’ endha’ eco-koco kalaban parmaenan amplop. Se dhi-budhina mala rogi dhalem lema taon. Kasta sabelunna kole’. Budhaja politik santun tor cerdas teggu’an ngagodhadan Madura se lakar ampon ter-penter. Tamaso’ banne gun menterre reng se awam, bagiyan jugan budhaja politik santun andhap asor. Ngarep rato se sae, tantowepon kalowar dhari cara se sae jugan dhalem mele. Lahirra rato se loman dha’ rakyat emolay dhari cara mele badan kaula sadaja.

Badan kaula sareng kaluarga lakar neggesse ja’ la-pola nyogo’ sowara. Melle sowarana badan kaula maka paggun abali amplop ganeka. Todhus badan kaula narema pesse sabatara rogi dhalem lema taon. Sowara badan kaula enggi paneka sowara Pangeran, dhalem arte, pagi’ paggun daddi petanya e adha’na Guste Pangeran. 

(mr/*/bas/JPR)

 TOP
 
 
 

Subscribe

E-Paper
Follow us and never miss the news