alexametrics
Minggu, 17 Jan 2021
radarmadura
Home > Cerpen
icon featured
Cerpen

Ajaga Tana Ajaga Na’poto

Carpan FHIEQ ACHMAD AS-SANUSY*

03 Januari 2021, 21: 24: 07 WIB | editor : Abdul Basri

Ajaga Tana Ajaga Na’poto

Share this      

PAJJAR ampon ngolpa dhari bun temor. Langnge’ ngornyang ngocernang tor sodek maebir kaparjuga’anna. Angen ngalesser aonter nyeyom dhaun-dhaun taresna, ebarengnge kalaban lembu’ lemma’ tor manes seyolla mano’ koju’ se akenca’ eranca’na pao, masamporna lomampana Pa’ Rofiq se nojju ka sabana mateppa’a solorra somangkana se pon mocet, se dining Siti Markoya menangka binena noro’ bunte’ e budhiyanna. Satermos kobi se genna’ ban cangkerra agatteng e tanangnga se kangan, seddheng tanangnga se kacer mennot marga ekattenge dhubundu’ sassarap tor sabutol aeng se asalemot palastik koneng.

”Dhu, Le’, pajat esak Kabupaten Soengennep lakar, Le’,” Pa’ Rofiq mokka’ sowara, seddheng matana angar-balingaran ngabas ka sakolelengnga.

”Ba, ta’ iya ba’na, Ka’, ja’ Soengennep reya sokmana Polo Madura!” jawabba Siti Markoya kalaban sowara parjuga.

”Ba, iya areya wajib rabat Kottha Soengennep re, Le’. Ja’ sampe’ gaggar ka tanangnga pangowasa se ta’ bagus, polana dhaggi’ tampeyasanna ka na’poto paggun, Le’,” ca’na se Pa’ Baidawi sambi’ nyergu’ roko’na.

”Iya teppa’, Ka’! Poko’na Kottha Soengennep reya ja’ sampe’ paorop pesse, cara e dhissa’ ro, Ka’. Tanana lasu ejuwal ka “investor asing”. Polana ebelli larang, lasu gampang ngocol tanana, ta’ makker kabudhina, ja’ bakal babaja ka kotthana dibi’ tor na’potona. Lebbi-lebbi ka agama tor bangsana,” balessa Siti Markoya kalaban somangat.

”Iya lakar, Le’, poko’na mon sateya oreng kabannya’an se amata pesse. Mon engko’ ladina ra, Le’, mon soro ajuwal tana ka ”investor”. Ladina lekka’ ta’ nompa’ motor se tadha’ monyina, la poko’na Kottha Soengennep paggun sodek parjuga, ca’na dhabuna Ke Dardiri ro, Le’, ajaga tana, ajaga na’poto. Artena mon ajuwal tana ka investor asing” padha bai ban nganeyaja na’poto. Kan iya, Le’?” oca’na Pa’ Rofiq se agandhu’ petanya, pas sambi’ atole ka binena se badha e budhiyanna.

”Iya, teppa’, teppa’, Ka’,” jawabba binena sambi’ matoron bin-sambinna ka barung marga pon napa’.

Saellana jareya, Pa’ Rofiq langsong ngabidi kalakowanna mateppa’ solorra somangkana se etoro’ dhari paddu morlao’. Seddheng Siti Markoya nojju ka tabun se badha e dhaja se rebbana banget nyenna tor lebur pabiruna kaangguy eare’ marga ebagiya sape pandhara’na se ollena ngowan dhari Ji Agel.

Kadhuwana bunga se ce’ bungana. Sanajjan odhi’ sabadhana, kadhuwana tettep somangat ajalane kaodhi’an. Sabab meterot kadhuwana kasogiyan reya ta’ eokor dhari bannya’na artana. Tape eokor dhari arassa cokoppa ate nampane paparengnga Guste Pangeran.

***

Are ampon ekelnyot malem. Mano’-mano’ kalaban esep ta’ adha-kandha’an. Esosol kalaban nyolbhu’na pornama se akomantan kalaban ebuwan bintang. Tadha’ ondhem se ngaddhang, saengga kalaban kalem sonarra arendhu e kole’na bume. Angen se molae gella’ agalajar, sanonto ampon serep ta’ aguliyan. Seddheng Pa’ Rofiq tor Siti Markoya ampon alebbu ka dhalem romana, ban ta’ bu-ambu ngonjuk pangarep dha’ Pangeran. Sanonto badanna kaduwana ampon leca’ ta’ andhi’ ora’ marga dhari gi’ laggu, beddhuk, ban-aban, kantos asar, badanna eguna’agi kaangguy alaksana’agi kawajiban anapakae ana’na se badha e pondhuk tor kaangguy nyambung kaodhi’anna.

”Dhu, Le’, Cong Ubay se badha e pondhuk mandar bajengnga ajar. Mandara ta’ lakowa tedhung ban ngakan,” oca’na Pa’ Rofiq ka Siti Markoya sabellunna sokmana onggu-onggu eanyo’ ka dhalem mempe.

”Iya, amin, Ka’,” balessa Siti Markoya.

”Ba, Ka’, lagguna kan are Juma’at la, Ka’. Lagguna keremma Cong Ubay,” Siti Markoya maenga’ kalaban sowara akantha oreng takerjat ja’ lagguna reya baktona keremanna ana’na, iya areya Ubay.

”Masyaallah, iya onggu, Le’. Apa se epakerema reya, ja’ engko’ ta’ neggu’ pesse sakale. Baramma ya, Le’?” Pa’ Rofiq laju abintal dhari arendhuna saellana epaenga’ ban Siti Markoya, pas terros agaru cethakka se ta’ arassa gatel sama samale.

”Buh, baramma ta’ iya, Ka’? Dhimma olleya enjaman reya, ja’ la’assa la tadha’ keya gunna’ kare se ekakana? Baramma reya, Ka’, ma’ posang engko’?” balessa Siti Markoya kalaban sowara agingging.

”Ta’ jareyana, Le’,” oca’na Pa’ Rofiq pas terros manjeng ngala’ kocca ban kalambina.

”Dha’emma’a, Ka’?”

”Nyareya enjaman lu, Le’, me’ pola Ji Faiki andhi’.”

”Adhu, Ka’, otangnga ka Ji Faiki dhupolo juta la, Ka’.”

”Iya dhimma olleya enjaman pole, Le’?” petanyana tor parnyata’anna Pa’ Rofiq agabay Siti Markoya coma neng-enneng pasra.

”Kriiiiiiiiiiiiiing,” monye metto dhari hape nit-ninitta Pa’ Rofiq.

”Halo, asalamu alaikum…”

”Waalaikumusaalam, Pa’, baras gi, Pa’?

”Oh, ba’na ya, Cong? Iya alhmadulillah baras, baras, Cong. Ba’na baramma, baras ya?”

”Alhamdulillah baras jugan, Pa’, emma’ kamma?”

”Sapa? Sapa, Ka’? Cong Ubay ya?” Siti Markoya lat-nyelladi kalaban petanya.

”Iya, Le’, areya’ atanya ba’na,” jawabba Pa’ Rofiq sambi’ ajuluwagi hape nit-ninitta ka Siti Markoya, pas laju ecandhak kalaban duli.

”Apa, apa, Cong? Enja’ baras emma’, Cong. Ba’na baramma, baras ya?” petanyana Siti Markoya ka Ubay sambi’ masemma’ lesanna ka hapena.

”Iya alhamdulillah, Ma’,” balessa Ubay dhalem hape.

”Lagguna tolos se ngerema gi, Ma’? petanyana Ubay agabay Siti Markoya ta’ egarassa ngemmeng aeng mata, se dining Pa’ Rofiq coma neng-enneng ta’ acaca’an sambi’ ngekke’ bibir babana tor mameddem matana kalaban serret.

”Ba, iya tolos tolos, Cong. Apa ma’ burunga?” jawabba Siti Markoya kalaban ngampet tanges sopaja ta’ ngonca’ saengga ta’ ekaedhing Ubay. Ban nyanggubi kaangguy ngerem, sanajjan ta’ neggu’ pesse sama sakale.

”Enten ta’ anapa, Ma’, ta’ usa kerem, manabi sobung pole obangnga,” tambana Ubay.

”Siyah, enja’ badha, badha, Cong. Apa ma’ tadha’a?” balessa Siti Markoya se epongkase kalaban ngosap aeng matana. Seddheng Pa’ Rofiq tanangnga se kanan mergem tanangnga Siti Markoya kalaban serret, ban se kacer ngosap-ngosap cethakka.

”Enggi alhamdulillah manabi badha,” sokkorra Ubay.

”Tadha’ pole se ekabala’a, Cong?” tabarra Siti Markoya.

”Ba, enggi onggu, Ma’, ano…”

”Apa apa, Cong? Mara abala lasu,” balessa Siti Markoya kalaban somangat.

”Bajaranna SPP-na kuliah, Ma’.”

”Barampa, Cong?”

”Tello juta satengnga, Ma’, manabi badha. Enggi manabi sobung ta’ aponapa ten, bisa nyecel,” jawabba Ubay agabay Siti Markoya ngalodhu’ eber ban sambi’ alerek mellas ka Pa’ Rofiq. Siti Markoya nyergu’ angen dhalem-dhalem, ban epakalowar lere-lere.

”Enja’ badha mon gunna’ tello juta satengnga, Cong. Dina esambiya lagguna lasu dila ngerem,” jawabba Siti Markoya se esosole kalaban tanangnga Pa’ Rofiq se ngosap aeng matana se pon abeccerre pepena.

”Alhamdulillah, Ma’, manabi badha,” sokkorra Ubay kalaban sowara anar-binaran marga bunga gallu’.

”Iya alhamdulillah, Cong, engko’ lagguna mangkata pokol ballu’. Keng eppa’na ta’ noro’a ja’, nokangana bengkona Ustadz Wafi polana. Dina engko’ noro’a motorra Ke Asis lasu, ngoca’ ngerema keya ca’na lagguna ban binena.

”Enggi pon, Ma’, kaso’on. Te-ngate gi, Ma’,” salam ka nyae ban kae, kerrong koa.”

”Iya padha, Na’. Ba, ka engko’ ban ka eppa’na ta’ kerrong ya, Na’?”

”Kerrong eeeeeellu’ keya,” jawabba Ubay kalaban sowara ranyeng, se agabay Siti Markoya ban Pa’ Rofiq ala’-gella’an.

”Bila se abinea, Cong?” petanyana Pa’ Rofiq kalaban agaja’ saellanna hapena ecandhak dhari Siti Markoya.

”Siyah, ampeyan nemmo bai, Pa’. Abit gi.”

”Enja’, enja’, agaja’, Cong, pabajeng-bajeng nyare elmo lu.”

”Enggi dinggal ambu lu gi? Neser ka na’-kana’ se ngantos giliran nelpon neka. Assalamu alaikum.”

”Waalaikumussalam,” jawabba Pa’ Rofiq ban Siti Markoya kalaban kompak abareng.

Saellana jareya, tanges se molae gella’ eampet sanonto nabuy pole dhari matana Siti Markoya. Marga gi’ ta’ nemmo enjaman pesse se epangerema tor se epamajara SPP kuliana ana’na.

”Dina ambu, ambu, ja’ nanges, Le’. Pasabbar, engko’ entara kona Ji Faiki mara nyareya enjaman. Ba’na ngala’ bullu bai essa’ se abajanga pas adu’a ka Pangeran, malar mandar epagampanga urusanna.” Pa’ Rofiq pos-ngapose Siti Markoya se pon ta’ kowat ngampet tanges, ban esosole kalaban nyeyom dhaina.

Saellana jareya Pa’ Rofiq mangkat ka romana Ji Faiki kaangguy ngenjam pesse. Seddheng Siti Markoya mangkat ka jeddhing ngala’ bullu.

Ampon tello ejjam Siti Markoya ngantos Pa’ Rofiq se ngenjam pesse kona Ji Faiki, namong  ta’ gellem dhateng. Saengga meddal rassa kobater dhalem atena Siti Markoya. Siti Markoya ta’ bisa nelpon. Sabab hapena coma settong ekadhuwai. Siti Markoya asajja kaangguy ngosol. Namong sabelellunna mokka’ labangnga se ekagabay dhari tabing, badha oreng ngolok salam dhari labang budhi.

”Assalamu alaikum,”

”Waalaikumussalam”

”Engko’, Le’,” ngedhing ja’ se ngolok salam rowa lakena, kalaban duli Siti Markoya berka’ ka labang budhi.

”Buh, engko’ kose ngalengsang ngantos ba’na, Ka’,” pabalana Siti Markoya ka Pa’ Rofiq kalaban sowara ga-tapegga.

”Hem, kerrong ya?”

”Tao ra,” balessa Siti Markoya kalaban kessap, ban barnana pepena aoba daddi mera ngodha marga todhus.

”Enja’ alhamdulillah eberri’, Le’, pa’juta, keng baktona sabulan ca’na, Le’, moso otang se ju ngadha’,” kabarra Pa’ Rofiq agabay Siti Markoya arassa bunga tadha’ padha.

”Alhamdulillah, Ka’, daddi pa’lekor juta otangnga ka Ji Faiki berarti, Ka’.”

”Iya, Le’, mandara eparengana kalakowan sareng Pangeran, kaangguy alonase otangnga.”

”Enja’, Ka’, mon eparenge bajjra, insya Allah dhupolo are aggi’ somangkana ekenneng polong la,” teggessa Siti Markoya sambi’ ngante’ tanangnga Pa’ Rofiq nojju ka dhalem seppenna.

”Iya, amin, Le’.”

Pajat pangestona oreng towa dha’ ana’na onggu tadha’ batessa, ban sampe’ bila bai ta’ bakal kabales. Bangunna mon gi’ badha karena nyaba, pangestona oreng towa ta’ kera bakal soro’ dha’ ka ana’na. Ta’ nampek pello koneng se ngambang e badanna. Ta’ nampe’ kole’ beddeng marga esennga’ are. Ta’ nampek otang sang-tasangsang. Sakabbiyanna bakal elaksana’agi, coma karana ana’na. Pangesto oreng towa dha’ ana’ana reya akantha angen se sabban re-are ta’ bu-ambu esergu’.

***

Sangalekor are ampon kalebat, ban lagguna baktona palonasanna otangnga Pa’ Rofiq tor Siti Markoya ka Ji Faiki saarga pa’lekor juta. Namong pessena kadhuwana gi’ ta’ cokop. Pesse se akompol coma sapolo juta. Ollena dhari somangka pa’juta ban nemjutana ollena abanteng tolang saabitta sangalekor are.

Kadhuwana posang ngalengsang se ce’ ngalengsangnga. Pepena atamba kelpong, badanna atamba koros marga mekkere otang. Ban Ji Faiki ngoca’ mon sampe’ lagguna ta’ majar, maka bakal elaporragi ka gulisi.

”Assalamu alaikum,” oca’na settong bapa’-bapa’ se apakeyan dines ban sambi’ nyambi emmap.

”Waalaikumussalam,” jawabba Pa’ Rofiq sambi’ masang koccana se pon apalepet mera marga pon pa’taon ta’ ngobai songko’.

”Ngereng longgu, Le’. Le’ kobi, Le’!” tabarra Pa’ Rofiq ka tamoyya ban sambi adhang-ardangan Siti Markoya sopaja ngadune kobi kaangguy eangka’agi ka tamoyya.

”Dinggal ta’ usa pot-repot, kaula gunna’ magiya neka. Enggi ampeyan mon endha’ alabet (atanda tangan) lasu gi. Kaula lagguna entara ka’enja pole, ngoneyana emmappa,” oca’na tamoyya sambi’ ajuluwagi emmap se agabay pekkerra Pa’ Rofiq posang ta’ ngarte apa maksotta. Ban pas terros nampane emmap kasebbut.

”Assalamu alikum.”

”Waalaikumussalam,” balessa Pa’ Rofiq kalaban sowara pegga’-pegga’. Seddheng matana lasu manga’-manga’ marga ta’ ngarte.

”Apa, Ka’?” petanya Siti Markoya se buru dhateng.

”Ba, tao keya ra, Le’, apa reya.”

”Oddi’ bukka’ lasu, Ka’!”

Kalaban tanang ngetter Pa’ Rofiq mokka’ emmap kasebbut. Sanaleka matana Pa’ Rofiq mancella’ kapor, tanangnga mergem epaserret, marga peggel ka essena emmappa. Iya areya aesse sorat kaangguy melle tanana se lowassa dhuhektar se badha e tebbangan saarga tello miliar.

”Sampe’ bila bai, engko’ ta’ bakal ajuwal tana ka ’investor asing’,” oca’na Pa’ Rofiq  kalaban ngeret marga ngonca’na napso.

”Tape, Ka’, otangga ka Ji Faiki baramma, Ka’? lagguna dhi-budhina la, Ka’, ban mon ta’ majar paggun etangkep polisi?” Siti Markoya ebarengnge kalaban ngonca’na aeng mata se abanjiri pepena. Namong, petanya ban tangessa Siti Markoya kasebbut, agabay atena Pa’ Rofiq atamba peggel.

”Engko’ ango’a aokeppa dhalem okoman, Le’, katembang ajuwal tana ka ’investor asing’, apapole tana rowa tana sangkol, Le’. Tekka’ a la kose nyemba ka engko’ demi Allah tana rowa paggun ta’ kera ejuwal. Kaenga’e, Le’!”  parnyata’anna Pa’ Rofiq kalaban nyenthak ban sambi’ ngonjeppagi emmappa.

”Tape, Ka’?”

”Adho, adha’ tape-tapeyan. Edingngagi, Le’, Engko’, Le’, ango’a mateya katembang kottha napepole bangsa reya epadaddi ceng-kocengan moso oreng lowar! Ban tanpeyasanna jugan ka ana’ poto, Le’. Kaenga’e, Le’. Mon polana pabalana egarapa kaangguy agabay tamba’ lakar, Le’. Iya sateya. Baramma tello taon se bakal dhateng? Lema taon se bakal dateng? Sapolo taon se bakal dhateng? Mon dila tana la ejuwal, Le’, tadha’ areppan pole kaangguy erebbu’, apapole ka oreng lowar. Buh daddiya apa bangsa reya, Le’? Baramma nasippa na’potona engko’ ban ba’na, Le’? Ngarte, Le’?” Napsona Pa’ Rofiq sajan ta’ ekenneng ampet. Seddheng Siti Markoya se ngedhingagi coma aonggu’ ban matana laju ta’ bu-ambu nyomber aeng mata.

”Cong Ubay baramma, Ka’?” Siti Markoya gi’ mokka’ sowara kalaban sesegunen. Se agabay badanna Pa’ Rofiq se gella’ ngangka’ sanaleka aoba leca’.

”Pasabbar ya, Le’,” Pa’ Rofiq ngapose sambi’ agellu’ Siti Markoya, pas terros maso’ ka dhalem seppenna.

Malem ampon dhateng abuko’e kasossa’an, kanespa’an, tor kanyangsara’an se egandhuk Pa’ Rofiq ban Siti Markoya. Pa’ Rofiq ejuluwi dhuwa’ peleyan se banget berra’. Nomer settong ajuwal tanana ban bakal lonas otangnga ka Ji Faiki, ban ta’ bakal aerrem dhalem okoman. Namong tampeyasana ka kottha, lebbi-lebbi dha’ agama, bangsa, tor na’potona. Se nomer dhuwa’, ta’ ajuwal tanana, namong tampeyasanna aba’na bakal aerrem dhalem okoman.

Pa’ Rofiq paggun pekoko dha’ peleyan se nomer settong. Samalem benteng Pa’ Rofiq ban Siti Markoya ta’ tedhung, marga kalaban hoso’ nyo’on dha’ Pangeran menangka zat se kongang ngoba sadajana.

***

Ta’ agarassan pajjar ampon nyolbu’ pole dhari bun temor. Tamoy se ngaterragi emmap ba’ari’, gella’ ampon dhateng pole kera-kera pokol petto’ lebat lema bellas mennit. Ban kalaban lembu’ Pa’ Rofiq nola’ ban ta’ alabeddi sorat kassebut.

Sateya Pa’ Rofiq ban Siti Markoya ta’ bu-ambu nanges ban coma pasra ngantos Ji Faiki se bakal nyambi gulisi kaangguy nangkep aba’na, se ca’na dhatengga pokol satengnga sapolo. Bala tangga padha akompol e romana kadhuwana sambi’ nges-tangesan, marga ta mangga ka Ubay se badha epondhuk se bakal edina’a kadhuwana ka dhalem okoman.

Kol ballu’.

Kol sanga’.

Kol satengnga sapolo.

Satengnga ejjam laggi’ Ji Faiki ban gulisina bakal dhateng.

Pa’ Rofiq ban Siti Markoya tor bala tanggana sajan daddi aberruy naleka badha motor barna pote se nojju ka romana.

Matana oreng kabbi tacengnga’ naleka se badha e dhalem motor kasebbut mokka’ labangnga. Ta’ esangka-sangka oreng se mokka’ labang kasebbut iya areya Ubay ana’ tonggalla Pa’ Rofiq ban Siti Markoya se akocca celleng, atakwa barna pote, asarong celleng, ban ta’ loppa agindhung ettas. Matana Ubay tacengnga’ naleka nangale kabadha’an romana se egaribbunge sadaja bala tanggana, aba’na posang tadha’ padha, ban langsung berka’ nojju ka emma’ ban eppa’na. Ubay langsong atanya ja’ badha apa saellana ngatore bakte. Kalaban berra’ ate, Pa’ Rofiq acareta kabadha’an se saongguna, ban sanaleka Ubay nyorkep nyeyom sokona eppa’na pas terros egilir ka emma’na se ebarengnge kalaban berruyya bala tangga se atamba daddi.

Ubay jugan abala tojjuwanna mole, saellana etanya’agi ban emma’ tor eppa’na. Iya areya kaangguy ngone’e kadhuwana sopaja asandhinge aba’na naleka wisuda pascasarjanana lagguna pokol petto’ e Instika Lu’-Gulu’.

”Pa’, Ma’, kaula sapora gi, lako maemo’ ampeyan. Neka’ obang saratos juta kabajar ka Ji Faiki. Kaula saminggu se tapongkor enneng lomba hafalan Al-Qur’an e Jakarta ban jugan eparenge motor menangka hadiah,” kabarra Ubay ka emma’ tor eppa’na kalaban sowara sesegunen marga ta’ kowat nadhung tanges, ban sanaleka agabay emma’ tor eppa’na asojud sokkor dha’ Pangeran.

*)Nyama daging dhari Ach.Rofiq, mahasiswa jurusan IQT Istitut Ilmu Keislaman Annuqayah Lu’-Gulu’, Songennep. Kalowaran Pondhuk Nurul Jalil Battangan tor MA Nasy’atul Muta’allimin 1 Gappora Temor. Laher e Disa Lapa Lao’, Dungke’. Aktif e Komunitas Iksabad tor Sanggar Persi (Penyisir Sastra Iksabad). Olle emaene e PP Annuqayah Lubangsa Blok C/14.

(mr/*/bas/JPR)

 TOP
 
 
 

Subscribe

E-Paper
Follow us and never miss the news