alexametrics
Minggu, 09 Aug 2020
radarmadura
Home > Cerpen
icon featured
Cerpen

Toyol Korona

Carpan: SUFRIADI*

12 Juli 2020, 20: 13: 14 WIB | editor : Abdul Basri

Toyol Korona

Share this      

BANNE gun e disana dibi’ se enger arasan kasuksesanna Jalil mokka’ toko e adha’na romana, teppa’ e penggir lorong disa. Tape nyamana e disa, dhari kabar ka kabar cappet kalonta. Akantha Moni ban Etto se toju’ adon-jandon e ranggun tengnga saba sambi ajaga mano’ keddi’ tako’ nyocco’ padhina se la terbi’.

”Buh la, sajan bannya’ essena tokona Jalil rowa. Ma’ pas dunnyana molbul sakale ngadha’ ya?” oca’en Moni samarena adibal mano’ e morlao’.

”Ya ta’ manglo, kan la lamba’ se mokka’ toko. Masa’ paggunna terros?”

”Enja’ ra, saenga’na sengko’, dunnyana Jalil se pas molbul sajjegga panyake’ korona ekaenger. Sabellunna kan enja’ biyasa bai,” Moni lekkas ajawab sambi neggu’ dibal pole.

”Apa sajjegga etoguwi pottra lake’na se buru dhateng dhari Jakarta rowa ya? Ca’na jareya mokka’ barung nase’ e semma’na kampus, tape polana na’-kana’ kuliah parai kabbi, mangkana notop pas mole ka dhiya.”

”Badha se ngoca’, ca’na Jalil ngobu toyol. Oreng-oreng ajajulugi ’Toyol Korona’ polana tabareng ban osomma panyake’ korona.”

”Ella mayu’ ja’ juba’ sangka. Dusa keya mon tadha’ buktena,” Etto macellep atena Moni se katonna pon possa’ ban juba’ sangka.

Menorot Moni, sala settong bukte ja’ Jalil ngobu toyol amarga bannya’ tatangga se aserrowan lako kaelangan pesse. Contona Essan se rajina daddi guru SD garowa, seggut ngacepek ja’ pesse eketan-ebunah lako elang dibi’ kadhang dhulambar, tello lambar. Mala Bi’ Suha bakto ngentel ka sapedha motor eater kompoyya amaksod nyerra’a otang ka Ji Sakur langsung elang sajuta, gun se buru toron e taneyanna Ji Sakur.

Badha keya Maisyaroh se rakana alako kola’an motor bekkas pessena lako akorang. Dha’-adha’na Maisyaroh curiga akarettek ngarane ale’ lake’na se bungso tako’ lancang tanang. Bakto se elang tello ratos ebu polana regget asella ngoso’ sampe’ nyabis ka Dhukon Kaca, Syaradda kodu ngeba na’kana’ se gi’ ta’ ballik.

Bakto ganeko Dhukon Kaca ngala’ aeng ebaddhai tobung esaba’ e attassa meja, pas ngoca’ ka na’-kana’ se ekabareng Maisyaroh. ”Bing, iya’ nengguwa tivi e attassa meja? Lebur ya. Iyya’, iyya’ lebur.”

Gun-onggunna na’-kana’ langsung ngerset, le’erra malanjang alondhak sakone’ enga’ enthok se nemmo kakanan abak jau.

”Coba’, Bing, e tivi jareya badha gambarra apa?” tanya Dhukon Kaca.

”Badha pesse e babana kalambi dhalem lamari, pas ngabber kalowar kamar lebat labang,” na’-kana’ ganeko ajawab ga’-tapalga’ polana gi’ pellat.

”Sapa se nyambi pesse? Lalake’ apa babine’? Raja apa kene? Towa apa ngodha? Ba’na kennal ka se nyambi pesse jareya?” Dhukon Kaca terros atanya majellasa.

”Tadha’ se nyambi, ngabber dibi’,” jawab kana’ kene’ ganeko sambi akepek sampe’ obu’na akerbai.

Buru sanonto Dhukon Kaca ta’ nemmo kapasteyan. Ja’ toro’ dhari ba’-lamba’na paggun badha se ngaton aropa ujudda oreng se ecurigai ngalakone. Maskeya ta’ bendher saratos persen otaba mala pas cambur ka Jin Korin andhi’na oreng laen se kasasar taolok Dhukon Kaca e bakto maca duwa pangodhang mahlok bangsa jin.

Dhari kadaddiyan ganeko ca’na careta Maisyaroh pas ngoddi agabay parcoba’an, kabbi pessena esaba’ e lamarina pas ekonci. Se neggu’ koncina gun Maisyaroh dibi’, se lake’ la-ngalae polana pangarana terro tabukteya. Kalagguwana pesse ganeko ebitong. Maisyaroh takerjat, paggun lowang saratos ebu se saeket ebuwan dhadhuwa’.

”Abba….. palor acareta, ta’ ajaga mano’ keddi’. Wa se dhi temor la possa’ thot-ngacethot mano’na kennyang,” mo-temmo emma’na Moni badha e semma’na se kadhuwa.

”Ya’ gallu guring telana ban poka’, la ban-aban laggu me’ ganggu’.”

Gun se mare nyaba’ guringnga tela ban poka’ e padduna ranggun, emma’na Moni langsung mole pole.

”Apa teppa’ caretana Maisyaroh jareya, Ni?” Petanya Etto sambi ngael guringnga tela se gi’ anga’.

”Sengko’ ngaedhing dibi’ caretana dhari lakena Maisyaroh.”

Atena Etto molae dhal-geddhul. Mon pas bendher ja’ Jalil sogi polana ngobu toyol tantona neko daddi masala raja. Mangkana sanonto Etto pas enga’ ra-kera dhubulan se tapongkor tao kaelangan pesse ekettanna. Tape bakto ganeko Etto pangrasana elang teppa’na mole dharina melle berras ka tokona Jalil nompa’ sapedha motor, paleng eabber angen dhari essak kalambina.

”Mayu’ areppot ka kalebunna bai,” ajak Moni acora’ ce’ kobaterra.

”Ella babaja jareya, apa se egabaya bukte mon pas kalebunna nerrossagi areppot ka polisi, ja’ toyol reya ta’ paddhang? Mala dhaggi’ sengko’ ban ba’na se ebalik ereppottagi kalaban sangka’an majuba’ nyama otaba tuduhan pencemaran nama baik.”

***

Dhari lanjangnga ne’-genne’ dhi-budhina epotossagi kaangguy mega’ toyolla bai. Majadhi’na Moni se kasebbut Man Juha e Disa Namera kabarra bisa ngalakone. Moni ban Etto asomaja’an marena asambajang Isya’ se entara.

”Toyol Korona baramma jareya, ma’ padha ban nyamana panyake’ sateya’an?” Man Juha atanya sambi mesem.

”Ja’ ga-tatangga, Nom, polana samangken ramme panyake’ korona, pas tasareng bannya’ obangnga oreng se elang dibi’ ekaedagi sareng kasogiyanna Pa’ Jalil se molbul sakale ngadha’, ca’epon meyara toyol. Gaggara ga-tatangga sambi agaja’ mator ja’ ca’epon Toyol Korona ber-nyalember,” jawab Moni sambi aseng-galiseng ta’ nyaman ate acareta se ta’ nanto jellassa.

Man Juha otaba biyasa eolok Nom Juha so Moni, ajellasagi ja’ dibi’na banne dhukon se bisa mabaras oreng, napepole sampe’ macalaka’ oreng padha bi’ pamentana. Kajunelanna gun bisa nangale’e mahlok bangsana jin, malah mon tasareng kalaban kasokanna Se Kobasa bisa madhateng tor maondur mahlok bangsa ganeko.

”Iya mayu’ langsung dhaggi’ tengnga malem coba’ bai ngodhang toyolla. Mon pajat meyara onggu paggun bisa epadhateng pas epaancor, sopaja ta’ masossa bala tatangga,” sowaranah Man Juha saompama galudhuk asella ondhem petteng agandhu’ kakowatan se nako’e.

***

Pokol dhubellas tengnga malem saroju’ se katello akompol e langgarra Moni. Janjina tadha’ se olle asaren sampe’ tarhem. Ra-kera kol settong Moni ban Etto molae aoway ganteyan. Tape demi mega’ Toyol Korona paggun sanggup nyegga rassa lesso ban katondhu. Ra-kera para’ kol satengnga tello’ Man Juha toron dhari langgar ajalan netteng. Tello mennet aggi’ abali pole matao gambar e HP not-ninotta. Moni ban Etto takerjat, katondhuna elang sakale ngadha’ ngabas potona toyol e bungkella pao temorra langgarra.

”Mon ka HP not-nenotta toyol bisa epoto. Buh lempo ya? Ce’ sehadda. Tape ta’ tao reya toyolla sapa, dhatengnga dhari mongging morlao’. Ellu’ ekodhanga pole, sapa tao badha kancana se laen,” Man Juha ato’-koto’ kabater toyol e budhina langgar nyengla pole.

Ta’ dumadiyan kejja’ aggi’ Man Juha ato’-koto’ pole: ”Ya’ dhateng pole settong keng badanna akorosan.”

”Saompama ekenneng pega’ kadinapa, Nom, carana neggu’? Kaula kan ta’ bisa nangale’e toyol. Kaula terro nyekkella le’erra,” sowarana Moni noro’ sa’-karasa’an asella ngoso’.

”Butolla teggu’ pasekken pas bukka’ sompetta, dina sengko’ se mamaso’a.”

”Siap, ya?” Man Juha langsung toron dhari langgar, paggun ajalan netting.

Guk, guk, guk. Rombongan pate’ alas ra-kera lalema’ ce’ rammena e temorra pamengkang. Ce’ semma’en ka toyol se dhadhuwa’.

”Addo, adha’ la toyolla takerjat, tako’, ngabber pole ka morlao’. Pajet bangsana pate’ rowa lako nabang toyol, mon ngaedhing bauna bangsa alos terros esemma’i,” Man Juha kaceba onggu. Usahana kaangguy mega’ toyol ta’ kalaksana.

”Mongging morlao’ kan compo’na Pa’ Jalil, Nom?” petanyana Moni, pekkerana rengen onggu.

”Iya pajet. Tape ellu’ gallu ja’ endher juba’ sangka. Dina pasabbar, lagguna malem ayu’ kodhang pole. Mon Se Kobasa ngedine toyol jareya paggun bisa epega’ ban epaanncor,” Man Juha nyaot ce’ yakinna pas agaluksor dhari battonna langggar amet mole. 

*)Lulusan MI–MTs di Ponpes At-Taufiqiyah Aengbajaraja Bluto, Sekolah Pertanian (SPMA) Bangkalan, Akademi Penyuluhan Pertanian Malang, dan Universitas Wiraraja Sumenep. Pernah tergabung di Sanggar Tirta, Ganding. Staf Dinas Pertanian Tanaman Pangan, Hortikultura, dan Perkebunan Sumenep. Tinggal di Perum Batu Kencana Blok II/19 Batuan

(mr/*/bas/JPR)

 TOP
 
 
 

Subscribe

E-Paper
Follow us and never miss the news
©2020 PT Jawa Pos Group Multimedia