alexametrics
Kamis, 04 Jun 2020
radarmadura
Home > Sastra & Budaya
icon featured
Sastra & Budaya

Caretana Bin Daddi Sabin

11 Mei 2020, 02: 33: 17 WIB | editor : Abdul Basri

Lukman Hakim AG., wartawan Jawa Pos Radar Madura se ngorenge kaca Sastra Budaya.

Lukman Hakim AG., wartawan Jawa Pos Radar Madura se ngorenge kaca Sastra Budaya. (RadarMadura.id)

Share this      

SETTONG pessen maso’ ka HP Juma’at (17/4) pokol 19.56. Ropana dhari Le’ Bin (N. Shalihin Damiri). Taretan se dhari Camplong, Sampang, neka ngatore kabar gumbira. Aba’na bakal makalowar buku careta pandha’ (carpan) basa Madura.

Ate rassa bunga. Badha ngangodhadan Madura se ngestowagi ka kamadura’anna. Sala settongng anglebadi sastra toles Madura. Tantona nambai kayakinan ja’ basa tor sastra Madura ta’ bakal mate salaggi’ badha oreng Madura.

Tandha nyenna tor jurbuna sastra toles Madura bisa etalektegi dhari bannya’na ngangodhadan se ngarang sastra Madura. Pramela dhari ganeka korang sae manabi nyala’agi ngangodhadan terros dhalem ellobba basa tor sastra Madura. Gi’ bannya’ para anom se open kalaban ajar noles basa Madura.

Manabi buto bukte bisa etalektegi lebat eccaban Sastra Budaya Jawa Pos Radar Madura (JPRM) sabban Ahad. Sanja’ tor carpan bannya’ se ekarang ngangodhadan. Pangarang seppo badha jugan. Nangeng ta’ sanapa etembang pangarang anom.

Le’ Bin sala settong pangarang se anom. Dhari 2016 kantos 2019 noles petto’ carpan. Emolae kalaban carpan Paraban Sorop Are se kalowar Ahad, 20 November 2016. Taon 2017 badha dhuwa’ carpan. Ra Munir (22 Januari) sarta Ka’ Fauzi ban Mobilla (5 Maret).

Saterrossa dhuwa’ carpan ngombar taon 2018. Enggi paneka abul-ombul Tello’ Lanceng Talpos (15 April) tor Posang e Mekka (11 November). Taon 2019 jugan badha dhuwa’ carpan. Osom Cabbi (20 Januari) tor Pa’ Janggu’ (16 Juni).

Buku neka aesse sanga’ carpan. Salaen petto’ careta se ampon ngombar e JPRM, badha dhuwa’ carpan anyar. Bang-sebangnga abul-ombuJohn Sebastian Misbach tor Ombar. Akadi se etotoragi Le’ Bin, 80 persen essena buku neka ampon terbit e JPRM.

Kaula asokkor badhana kennengngan sanja’ tor carpan basa Madura e JPRM egunana. Bisa nombuwagi pangaterro tor manyenna sastra toles Madura. Dhari paneka ampon badha tello’ buku basa Madura. Enggi paneka Tora; Satengkes Carpan Madura. Buku paneka eterbitagi JPRM 2017. Aesse 63 carpan karanganna 21 oreng. Polowan carpan paneka sabellunna kalowar e JPRM Ahadan molae Juli 2015 kantos Desember 2016.

Sala settongnga carpan Paraban Sorop Are-na Le’ Bin. Buku se kapeng dhuwa’ karanganna Mat Toyu (M. Toyu Aradana) se abul-ombul Embi’ Celleng Ji Monentar. Ballu’ dhari sanga’ careta dhalem buku barna mera neka jugan ampon kalowar e JPRM. Tamaso’ carpan se epadaddi bul-ombulla buku. Kajaba careta Kampanye.

Buku se kapeng tello’ enggi paneka Kerrong ka Omba’. Buku karanganna Toyu paneka aesse 17 careta. Sabellas e antarana ampon kalowar e JPRM. Empa’ careta e Jokotole. Sabatara se anyar dhadhuwa’. Buku paneka agandhu’ arte monggu sastra Madura. Polaepon tanggal 31 Januari 2020 ngaolle tandha pangesto dhari Yayasan Kebudayaan Rancagè. Sabellunna, sastra Madura ta’ toman ngaolle tandha pangesto paneka.

Akadi dhuwa’ bukuna Toyu, carppan dhalem Lanceng Talpos neka jugan bannya’ se ampon kalowar e JPRM Ahadan. Petto’ dhari sanga’ careta. Tantona nambai kebunga’an kaangguy maramme (banne enger) gabayya sastra toles Madura. Kaula seggut aparsemmon tor nyoro dha’ ca-kanca se lebur ngarang kaangguy makalowar buku. Tanto bakal lebbi ramme manabi carpan tor sanja’na Hasmidi, Budi Santoso, Noer Hamima, Mudhar CH., Maniro AF., tor ca-kanca se laen jugan epadaddi buku.

Bukuna Le’ Bin neka bisa daddi bin-sabin sastra toles Madura. Ja’ pang-gampang nyala’agi ngangodhadan Madura kalaban sebbudan korang esto polana todhus. Ta’ sae manabi pamanggi paneka terros ebut-sebbut. Langkong sae ngareng areng-sareng manyenna tor malebba’ basa tor sastra Madura kalaban caraepon bang-sebang

Sabin Lanceng Talpos neka jugan nandhai otaba daddi settong paenga’ ja’ badha pangarang dhari Sampang. Salaen paneka Le’ Bin bannya’ noles naleka badha e Pondhuk Sidogiri, Pasuruan. Paneka daddi settong pangrenget ja’ oreng Madura bisa noles basa Madura maske badha e lowar Madura. Settong syaradda enggi paneka gadhuwan pangaterro tor pangesto se raja monggu Madura.

Lanceng Talpos bakal nambai badhana buku sastra Madura. Akadi karanganna Lukman Hakim AG bang-sebangnga Sagara Aeng Mata Ojan (sanja’, 2008), Cengkal Burung (sanja’, 2017), tor Oreng-Oreng Palang (carpan, 2018). Jugan bukuna Zainal A. Hanafi Èsarèpo Bèncong (carpan, 2017) tor Èghirrep Sètan-na Supriyadi (carpan, 2017). Jugan buku sanja’ Ghranyèng tor Kèjhung Aghung karanganna Yayan Ks.

Raja pangarep Le’ Bin ta’ ambu noles basa Madura. Bandha pangaterro tor pangesto ka Madura kodu ebuthok ma’ olle terros tombu nyenna, nyangkarem ramo’na, ro’om kembangnga, tor lebba’ buwana. Badha’a e ka’dhimma’a bisaos kodu ngangguy kamadura’an. Tamaso’ dhalem noles se ta’ kera’a loppa.

Poji salamet ngombarra Lanceng Talpos.

Bangkalan, 1 Mei 2020/8 Powasa 1441 H

 

Lukman Hakim AG.

Pamimpin Redaksi Jawa Pos Radar Madura

(mr/*/bas/JPR)

 TOP
 
 
 

Subscribe

E-Paper
Follow us and never miss the news
©2020 PT Jawa Pos Group Multimedia