Jumat, 20 Sep 2019
radarmadura
icon featured
Cerpen

Carpan Musyfiqur Razi "Saroka"

01 September 2019, 18: 12: 52 WIB | editor : Abdul Basri

Lukisan tinta di atas kertas A3 Hidayat Raharja berjudul Tambhângan, 2019.

Lukisan tinta di atas kertas A3 Hidayat Raharja berjudul Tambhângan, 2019. (Hidayat Raharja)

Share this      

JALAN ganeka Jalan Tanjung nyamana. Ra-kera dhukilo dha’ temor partellon Saronggi, panjennengngan bakal tapanggi sareng somber di dhaja jalan. Aengnga jenneng asella biru. Biyasana, manabi are ampon nganthang ka dhi bara’, aeng somber ongga. Nandha’agi ja’ aeng somber ganeka asambung ban aeng tase’. Somber ganeka badha e Disa Saroka. Ampon ekaonenge ja’ gilina aeng somber ganeka asambung ban tase’. E onjur, badha parao kene’ kaangguy tatangga se entara ka songay raja.

Jalan ganeka loros. Lorongnga bagus. Ta’ jau dhari bates Saroka ban Tana Mera. Panjennengngan bakal ngoladi makam di dhaja jalan. Makam kaper ca’na oreng-oreng. Caretana, lamba’ makam ganeka kennengnganna oreng kaper, panjaja, bila maso’a ka Disa Saroka bakal epate’e. Ta’ jau dhari koburan ganeka, badha compo’ kona. Compo’ ganeka towa, enga’ se rempa’a. Tape, e sakobangnga berse, tadha’ rebba sakale. Se ngagunge nyamana Ke Surakmo.

Ke Surakmo ganeka aslina dhari disa tatangga, dhari Disa Tana Mera. Tape, e bakto panjaja dhateng ka Disa Tana Mera, Ke Surakmo buru ka Disa Saroka. Ontongnga, e Disa Saroka oreng-oreng ampon akompol kaangguy alaban ka panjaja. Rajina ampon seda lamba’na. Aba’na ajanji ja’ bakal ajaga koburanna rajina ban bakal acareta ka oreng-oreng bagussa rajina, acareta ja’ rajina seda polana panjaja, merrange panjaja.

Sabban oreng se dhateng ka compo’ ganeka, Ke Surakmo acareta asal muwasala Disa Saroka. Tasarok dha’ dika. Lamba’ oreng Saroka neka sakabbina alako ka songay, nyare napaka e songay. Badha se ajala, manceng, ajaring, ban laen samacemma. Kabadha’an tana kajal, maskeya badha somberra, ta’ bisa alalakon laen. Kaangguy atane, malarat. Namen sabbrang se ta’ buto ka aeng bannya’ malarat, napapole namen padhi otabe jagung.

Lamba’, asal muwasala disa badha lalake’ dhari Temor Leke lako amaen ka Dusun Gulungan. Enyamae Dusun Gulungan polana oreng kampong ganeka sabala’an, safamiliyan. Lung-tagulung. Lalake’ ganeka nyamana Juha. Lakona majang e songay. Sabban arena, bila are ampon compet, lalake’ ganeka song-tarosong ban jala. Kadhang, Juha majang kadibi’an. Napapole bila tera’ bulan. Juha ta’ ngajek sapa-sapa. Bila pajjar, Juha mole ka romana ban duli tedhung.

Molae gi’ kene’, Juha eajari alako ban oreng towa bine’na. Eppa’na mangkat alako ka Malaysia. Sampe’ samangken ta’ paleman. Juha ta’ padha ban sakanca’anna. Sakanca’anna bila metto are mangkat asakola ban Juha mangkat ka pasar, ajuwal juko’ ollena majang. Ollena pesse ekabelli barang dhapor. Kadhang ekabelli berras.

Sarajana, Juha nganthang lebur ka Lasmini. Babine’ se molae gi’ kene’ epabakale ban sapopona, Jumadin. Sabban arena, samarena dhateng dhari pasar, Juha tha-kantha amaen ka romana kancana, tatangga ban Lasmini. Kadhang, Juha mole ngaterragi ollena pesse dhari pasar ka emma’na.

Ongguna Lasmini ngarte kabadha’an atena Juha. Juha nyaba’ pangarep ka Lasmini. Tape, Lasmini ngarte ja’ aba’na la bakal ekaandhi’a Jumadin. Juha katoronan oreng gantheng, soga’, ban kole’ koneng. Tao Lasmini mon-temon wa’-dhuwa’an ban Juha e penggir songay. Juha ta’ nyedding Lasmini sakale. Maskeya ta’ tao agama, aba’na ajaga parasa’anna Lasmini, babine’ se ekaterrowe.

”Lasmini, ongguna engko’ andhi’ pangarep ka ba’na,” oca’na Juha sambi jeng-manjeng e jauwanna. Lasmini ta’ ajawab. Pekkeranna apoter mekker parasaanna Juha. Samangken aba’na bingong, ongguna Lasmini padha terro ka Juha. Tape, aba’na andhi’ kaedan ban Jumadin. Lalake’ se lebbi towa sapolo taon dhari aba’na.

Maskeya Lasmini ngarte ja’ aba’na bakalla Jumadin, Lasmini paggun bur-leburan ban Juha. Aba’na ta’ andhi’ rassa ka Jumadin maskeya bakalla. Ongguna, Lasmini abakal ban Jumadin ollena oreng towa dhuwa’na. Lamba’, eppa’na toman ajanji ka eppa’na Jumadin mon andhi’ ana’ bine’ bakal epabakalana ban Jumadin.

Tadha’ oreng se tao ja’ se kadhuwa bur-leburan. Kadhang, ella’ dhuare se kadhuwa mon-temmon e Songay Nambakor. E settong bakto, kadhuwana la padha mangkat ka Songay Nambakor. Tape, Lasmini badha se noro’e ban aberri’ tao ka Jumadin.

Jumadin se mangkata majang burung edhing kabar ta’ nyaman. Tampar se eteggu’ eocol ban berka’ entar ka kennengnganna se biyasa Lasmini ban Juha tatemmo.

”Babine’ leter, gatel!” pesona Jumadin saamponna nangale Lasmini wa’-dhuwa’an ban Juha.

”Badha napa, Ka’?” oca’na Lasmini o-mata’tao. Lasmini entar ka Jumadin, pos-ngapose polana mowana nganthang mera. Peggel.

”Ba’na tang bakal, ma’ mon-temmon ban Juha? Se pate’! Ngala’ ka karembu’na.” Jumadin memeso ka Lasmini. Lasmini ta’ kowat nyegga gaggarra aeng mata. Tanangnga ngetter. Ongguna aba’na ta’ nyangka ja’ bakal daddi enga’ neka.

Lasmini ta’ neser ka Jumadin. Aba’na ta’ gellem ebakalan ban lalake’ se lebbi towa tange dhari aba’na. Aba’na ta’ bisa alaban polana bakal ganeka ollena oreng seppona Lasmini. Salaen gi’ sapopo ban Lasmini, Jumadin sogi. Andhi’  parao, andhi’ samacemma.

Molae ganeka Lasmini ta’ kalowaran, aba’na todhus. Todhus ka oreng sabannya’na polana andhi’ bakal ban mon-temmon ban lalake’ laen. Kabar Lasmini mon-temmon ban lalake’ laen ekaedhing oreng sadisa. Dhari colo’ ka colo’, dhari roma ka roma, dhari barung ka barung nyamana Lasmini daddi cacana oreng.

Ta’ kowat namba’ rassa malo. Banne gun aba’na se ta’ kalowar romana. Reng seppona padha ta’ kowat malo. Ta’ bisa ca’-ngoca’ ka bisan. Maskeya taretan dibi’. Lasmini jat kalero, mon-temmon ban lalake’ laen.

Ongguna, kaluarga e Dusun Gulungan ta’ olle narema lalake’ laen salaen famili. Napapole lalake’ dhari lowar disa. Oreng towana Lasmini ban Jumadin sapopo. Emba bine’na Lasmini ban emba lake’na Jumadin sataretan.

Malem ganeka Jumadin ban oreng towana entar namoy ka romana Lasmini. Se biyasana bi-nyambi, malem mangken ta’ ngeba pa-napa. Biddang se eangka’agi ta’ eenom balakka’. Samsu –eppa’na Lasmini–, Jumadin, ban eppa’na padha ta’ acaca.

”Molae bila Lasmini bur-leburan ban lalake’ laen?” Epa’na Jumadin atanya. Samsu ta’ nyaot. Nondhu’. Aba’na ta’ bangal ngangka’ mowana, ta’ kellar dhari malo.

”Andhi’ ana’ babine’ balai pateppa’.” Mare ngoca’ ganeka, eppa’na Jumadin jaga ban mole. E bakto para’ dhapa’a ka garalas, Jumadin ngoca’, ”Gen sateya ya, Ni. Ca’na ba’na ja’ alakeya sapa. Ba’na banne bakalla engko’ pole. Ajar pateppa’ sabellunna daddi binena oreng.”

***

”Apa? Atokara?” Jumadin gi’ andhi’ rasa peggel polana arosak aba’na ban Lasmini. Juha ta’ nyaot. Aba’na ngarte ja’ samangken daddi cacana oreng. ”Huh, ta’ lake’ sakale,” oca’na Jumadin.

”Ngaddu parao. Se mennang ngala’ Lasmini!”

”Ongguna engko’ la ta’ akarep ka Lasmini. Mon la kencengnga ba’na, mayu!”

Se kadhuwa padha ta’ acaca. Padha mole ka romana bi’-dibi’ ebang. Samalem benteng, Juha ker-pekkeran ka kabadha’anna Lasmini. Tape, aba’na usa duli tedhung, laggu’ bakal atokara ban Jumadin e songay. Aba’na ta’ toman atokar ban sakanca’anna. Buru samangken atokar. Jat basiyat dhari oreng towana, ja’ atokaran. Juha atoro’ dhabuna oreng towana. Samangken bida kabadha’anna. Aba’na jat nyaba’ rassa ka Lasmini.

Pekkeranna enga’ ka oca’ oreng towana, ”Ja’ la’-nyala’an. Ja’ atokaran. Apapole paddhang sala. Mon esalae ta’ arapa alaban.”

Kalagguwanna, mare adan sobbu se kadhuwa padha mangkat ka Nambakor. Mata are gi’ ta’ kalowar. Dhari dhalem romana, Jumadin ta’ ngajek oreng. Ongguna aba’na ta’ pate tao nyeddir parao, napapole alanggoy. Juha jat kalakowanna e songay sabban are. Mon urusan parao ampon biyasa.

Dhari temor, paraona Juha ajalan biyasa. Ta’ abit, e bakto dhapa’ ka tengnga’an, dhari bara’ paraona Jumadin ajalan santa’. Jalanna samangken ka temor. Tase’ nyosot. Paraona Juha se lebbi kene’ dhari paraona Jumadin etabra’. Paraona Juha soro’ ban karem.

”Ngala’ ka jarangkongnga! Mangkana ja’ ko-maangko. Apapole la-nyala ka bakalla oreng.”

Juha se tasellem aedhing ba’-raba’ ka pesona Jumadin. Atena rassa kasta ta’ ngeddhebbi ka beseyatta oreng towana. Juha bannya’ ngenom aeng. Pekkeranna sajan elang. Sokona rassa etaja’ ka baba. Se biyasana bisa alangngoy, samangken rassa berre’. Juha mate tasellem.

Lasmini se ngabasagi dhari penggir songay gun bisa nanges ngabasagi Juha tasellem. Jumadin la jau. Nekad, Lasmini usaha nolonga Juha. Aba’na maskeya ta’ tao alangngoy paggun alonca’ ka songay. Badhana, se kadhuwa padha mate tasellem.

Molae ganeka enyamae Saroka, Paraona Jumadin esarok’agi ka paraona Juha.

”Ngereng eatore biddangnga,” dhbuna Ke Surakmo. 

Saroka, 28 Juli 2019

*)Peserta KKN Instik Annuqayah dan santri Annuqayah Lubangsa Utara

(mr/*/bas/JPR)

 TOP
 
 
 

Subscribe

E-Paper
Follow us and never miss the news
©2019 PT Jawa Pos Group Multimedia