Rabu, 13 Nov 2019
radarmadura
icon featured
Cerpen

Nemor Kara

Carpan Hasan Liema A.*

15 April 2019, 01: 25: 49 WIB | editor : Abdul Basri

Nemor Kara

Share this      

E BULAN Februari e disana bula biyasana ojan ce’ derressa. Tape e taon sanonto ojan ta’ lem gaggar dhari langnge’. Sanajjan ampon maso’ dha’ bulan Maret ojan gi’ paggun ta’ toron. Entara toron, ja’ rengan rese’ bai ta’ lem nyabba. Pola paneka se ekoca’ nemor kara se ampon etebbak bi’ reng-oreng astronomi se daddi dha-tandhana para’ keyamata.

Polana dhari repot ka peleyan, bula taker tellat kaangguy apangrasa masala ka’dhissa’.

Saongguna bula ta’ pate senneng dha’ ka kaodi’anna neng e pamerenta’an. Tape polana badha oreng se menta kaangguy noro’, bula ta’ bisa nola’. Napapole se menta paneka bakalla bula, oreng se paleng arga neng e kaodhi’anna bula. Napapole bula ban tang bakal ampon abit abakalan. Daddi manabi bula pah nola’ kasokanna tang bakal, bula tako’ hubunganna bula ban bakal bisa ancor.

Dhari pan-barampan bulan se ampon kabingkeng, bula daddi ce’ repodda, saenggana dhalem sabulan gun bisa sakejja’ mole ka roma ban e nalakana mole bula gun neng-enneng e roma. Gun kalowar e nalekana le-melleya ka toko. Daddi e nalekana mole, bula ta’ toman jarna’ ngedhingagi bar-kabar masala se badha e disa. Saenggana bula ta’ toman apangrasa ja’ na-tana ampon kerreng samporna, ba-saba se biyasana possa’ kalaban koningnga padhi, samengken tadha’ napana sakale; pera’ kare tana bella ban panas se ngello’.

Tape, dhari dhumenggu se ampon kabingkeng, bula ta’ abeli ka kottha. Sabab sakabbina ampon mare. Kare ngantos are peleyan e bulan dhateng. Cara se eangguy bula paneka cara se paleng apangaro kaangguy naja’ oreng kaangguy mele. Ampon bannya’ e-keyae ban tokoh masyarakat se poron bakalla bula daddi bakkel rakyat.

Saongguna bakalla bula jugan dhari disa. Tape polana emo’ kalaban pangaterrona kaangguy daddi ponggaba, bakal usa seggut alenteng kaangguy ngala’ atena reng-oreng. Maskeyanna mole, paleng pera’ neng-enneng sakejja’, ra-kera padha ban bula.

Dhumenggu banne bakto se sakejja’ kaangguy ngataowe bar-kabar se ampon nyebbar. Enga’ ca’-oca’ se biyasa ekaedhing, ”Sajang-lanjangnga tale ta’ kera nyapo’ ka colo’”.

Ampon bannya’ bar-kabar se ta’ nyaman kaedhinganna dhapa’ ka bula. Otamana masala nemor kara se teba dha’ ka disana bula neka. Napapole pera’ gun tang disa se katebanan. Tape e disa-disa laen para’ sabban are etorone ojan, saenggana dhi-padhi ampon koneng kabbi.

Polana panasaran, bula nyoba’ atanya ka tatangga.

”Molae gan bila se ta’ ojan e ka’ento, Nom?” Bula atanya dha’ sala settong tatangga se tatemmo parappa’na padha le-melleya ka toko.

”La para’ sataon, Cong,” jawabba tatangga kalaban mowa nandha’agi ta’ jembar. Ban para’ sakabbina oreng se etemmone bula asandhing mowa ta’ jembar.

”Masa’ ampon satoon, banne neng sa-disa laen ojan lako toron, napapole samangken kan nembara’?” oca’na bula kalaban mowa ta’ partaja.

”Bikan, Cong, mon terros nga’ reya, reng-oreng bisa mate kalaparan.”

”Napa ta’ nyoba’ menta bantowan aeng ka pamarenta?”

Tatangga ka’dhissa’ pera’ agella’, ”Saongguna paranga jareya ella abit se badha, tape mon eker-pekker sakaleyan aggi’, rassana ta’ pantes pamarenta epentae bantowan polana ella banya’ otangnga. Masa’ se ella bannya’ otangnga gi’ epenta’ana bantowan?”

”Tape kan ganeka pon tugassa pamarenta, Nom, napapole sakabbina nagara paste andhi’ otang.”

”Iya jadan, Cong, tape kabbi ella pasra, ame’ reya ella bala’.”

”Bala’? Maksodda, Nom? Bula ta’ ngarte.”

”Mon oca’na bangatowa, nemor kara reya polana badha sala settonga paraban disa’ ngandhung tadha’ lakena.”

”Tape kan ganeka pera’ careta kona,” oca’na bula kalaban mowa ta’ partaja.”

”Tape ta’ notop kamungkinan se na-kona teba onggu.”

”Enggi keya na mon polana,” oca’na bula, tape temmo tang HP amonye tandhana badha SMS maso’. Bula langsung nenggu essena, ropana SMS ka’dhissa’ dhari tang bakal.

”Saporana sabelluna, Nom, neka badha kaparlowan kadadak. Daddi ta’ bisa nerrossagi dha-kandha, me’ pola e bakto se laen bisa nerrosagi,” oca’na bula sambi asallim ban ta’ loppa kaangguy ngolok salam.

Sadhapa’na ka roma, bula arassa pekkeranna bula paggun ceccer neng e toko; masala paraban se ngandhung tadha’ lakena, otaba se kalonta kalaban ngandhung ollena pagaran, paggun cekka’ neng dhalem otek. Sempat tapekker neng cethak, ”Masa’ parkara ne’-kene’ nga’ reya bisa madaddi ka garidhuwan se sara. Banne e kottha ngandhung tadha’ lakena la biyasa. Banne mon nga’ reya ta’ adil, tape pangeran paggun adil.”

Pekkeranna bula ater-poter mekkere sadajana parkara se teba dha’ ka disa, hososepon nemor kara se agabayan reng-oreng sossa. Tape bula terros apekker sambi partaja ja’ sakabbina masala neka paggun badha jalan kalowarra.

Bula temmo enga’ parkara saropa tao teba dha’ disa tatangga e baktona bula gi’ kene’, ban sababba padha, enggi paneka paraban ngandhung tadha’ lakena. Nemor kara ka’dhissa’ laju elang e nalekana ampon etemmone ne’-bine’ se ngandhung gella’, tor laju epakabin ban se ngandhunge.

”Arapa ma’ ta’ ngalakone parkara se padha, apa pola usa bula se toron kaangguy mamare masala se teba dha’ disa?” pekkera bula.

Polana dharina mekkere nemor kara se teba dha’ disa, bula taker loppa ja’ esoro nelpon tang bakal.

”Halo, saporana bula bak abit se nelpona,” oca’na bula.

”Ta’ napa, se penting empeyan pon nelpon samangken,” sowara se kalowar dhari telpon agabay ate jembar. Bikan, bula arassa ce’ bungana e nalekana ca’-caca’an ban tang bakal maske’na pera’ lebat telpon. Bula taker ta’ nemmo parebasan kaangguy agambarragi kabunga’na ate.

”Ba’na la ngedhing masala nemor kara se teba ka disa?”

”Bula abit pon se oneng masala ganeka. Tape bula gi’ ta’ bisa apola tengka kaangguy ngatase, polana bula gi’ ta’ andhi’ kowasa.”

”Daddi kare engko’ se gi’ buru ngedhing.”

”Pola.”

”Ca’na gella’ badha se ekabanta’a ban sengko’?”

”Enggi, tape ta’ kalaban telpon. Empeyan bisa entar ka kottha?”

”Bisa, tape me’ laggu’ gi’.”

”Enggi pon, e antosa laggu.’”

Bula ban bakal abanta ta’ pate abit, pera’ ata-careta sakone’ langsung ambu.

***

Sabellunna bula mangkat ka kottha kaangguy atemmo ban bakal, bula nyempattagi entar ka kalebun kaangguy aberri’ usulan se bula nemmo bari’. Tape ta’ enga’ se arep bula, ropana usulla bula ampon mare ekalako. Tape ta’ lem nemmo jawaban. Dhari sakabbina paraban e disa tadha’ se ngandhunga ta’ andhi’ lake.

Kabar ka’dhissa’ matakerjet bula. ”Mon banne ne’-bine’ ngandhung ollena pagaran panyababba nemor kara, apa pah?” pekkera bula. Kalaban pekkeran se gi’ panasaran bula mangkat nemmone bakal.

Sadhapa’na ka romana bakal se badha e kottha, bula laju markir motor ban maso’ ka romana bakal. Sadhapa’na ka dhalem bula epatakerjat kalaban kabadha’na bakal. Bakal kalowar dhari kamarra kalaban obu’ abuluset, mata mera, ban mowa pocet.

”Badha apa ma’ nanges? Badha se neror ba’na apa? Mara kabala ka sengko’,” oca’na bula kalaban sowara tenggi tandha ta’ tarema kalaban kabadha’anna bakal.

”Sobung, Ka’. Tape....” oca’na bakal kalaban seggunen.

”Mara abala pah.”

”Tape empeyan kodu ajanji gallu.”

”Ajanji apa?”

”Ja’ ngoso’.”

”Iya la, patennang.”

”Bula... bula ngandhung, Ka’,” bula temmo arassa badha ladding se nyocco dhadhana bula, are’re’ on-laon. Ta’ sadhar bula temmo pon manjeng ban ajalan nyorot.

”Ma’ bisa? Engko’ ta’ perna nyedding ba’na, ma’ bisa ba’na ngandhung? Areya ta’ bandher.” Oca’na gula kalaban ngampet sake’ se talebat. Ngoso’, ta’ partaja, ban sadajana rassa agaluy e dhalem dhadha.

”Tape bula ngandhung onggu, Ka’,” oca’na bakal kalaba neggu’ tanang bula.

”Senga’ ba’na selingkuh?” Oca’na bula kalaban nyenta’ tanang.

”Entan, Ka’, bula gun cinta ka sampeyan.”

”Mara ja’ gi’ athek-palethek, koca’agi se saongguna.”

”Bula ta’ asajja ngalakone, Ka’, bula gun cinta dha’ka sampeyan kasorang.”

”Apa? Cinta? Ce’ bangalla ban ngoca’ cinta, padahal ella ngalakone se arosak dha’ kasocceyana.”

”Bula bisa ajellassagi, Ka’.”

”Ko’ ta’ buto. Sakabbina la jellas. Dina la, mandaran ba’na jembar ban lalake’ se ngandhunge ba’na jareya.”

Samarena ngoca’, bula nyorot ban ondur—adina’agi bakal se seggunen. Bula arassa ancor sa cor-ancorra. Abareng kalaban tengka’na soko se sajan jau, bula arassa cintana bula kerreng akantha tana se katebanan nemor kara. 

*Santre PP Annuqayah Lubangsa Selatan dhari Rajun, Pasongsongan, Sumenep.

(mr/*/bas/JPR)

 TOP
Artikel Lainya
 
 
 

Subscribe

E-Paper
Follow us and never miss the news
©2019 PT Jawa Pos Group Multimedia