Senin, 20 May 2019
radarmadura
icon featured
Cerpen

Osom Cabbi

CARPAN: BIN*

20 Januari 2019, 18: 51: 10 WIB | editor : Abdul Basri

Osom Cabbi

PASERA se ta’ sennengnga bila maso’ bakto molong cabbi, bi-lebbi argana teppa’ larang e pasar. Baramma sennengnga ate, tamennan cabbi lebba’ ban argana larang. Tantona pesse atompo’an e kapeng ban sadajana kaparlowan odhi’ eka-tekka.

Parasa’an mara ganeka jugan egarassa Nom Kasan. Tamennan cabbina pera’ korang ennem are se epolonga. Dhalem bakto ennem are se adhantos, Nom Kasan ta’ bu-ambu se asokkor dha’ Se Kobassa. ”Bila rejekke, paste ta’ kera taporot, Le’. Ampon etaneng manorot kaparlona. Alhamdulilla, baktona molong la para’,” dhabuna Nom Kasan dha’ rajina, Sarleha.

”Tape parlo ngastete, Ka’. Biyasana, bila osom cabbi ban argana pareppa’na larang, ampo osom maleng.” Sarleha maenga’ rakana.

”Iya onggu, Le’. Bari’ Le’ Midin acareta tamennan cabbina ekeco’ oreng. Sala’a dha’iya lema lokke’ se epolong. Le’ Midin coma melo bungkana bariya....”

Midin acareta, bakto kadaddiyan, aba’na ta’ nyana pas bisa taliyep. Ngerrok saojangnga pareppa’na atangnge ajaga cabbina. Pangarassana aba’na, oreng se ngeco’ jareya ngangguy elmo seher. Payana ganeka tombu asebab Midin ampon ngenom kobi ban panengalla teppa’ cengngar, tape pas taliyep, ja’ oreng lesso dhari parjalanan.

Kalaggu’ arena, saamponna jerna’ pekkeranna, Midin abanjal ngabas tamennan cabbi se akare bungkana bariya. Midin athowat sakalengadha’. Nyaracam mara oreng ajan. Midin paleman dha’ bungkona sambi apesowan. Ta’ re-mare se apesowan ban abasto oreng se ngeco’ cabbina.

”Odhi’ nyangsara mara areya, arabat sabban laggu, eseram ma’le lebba’ cabbina, eee seddheng la napa’ baktona molong pas ekeco’ oreng. Pakowa sake’na ate areya. Ta’ dhapor onggu oreng jareya. Sompa mandar ta’ jembara odhi’na oreng jareya. Pola ta’ mekker ja’ padha meskenna. Pate’ onggu....”

”Sabbar, Din,” dhabuna Nom Kasan maenga’.

”Ba’na bisa sabbar bila andhi’ kadaddiyan mara sengko’ areya, ha? Sabbar, sabbar ca’na. Sengko’ manossa, San, banne malaekat!”

”Ya sengko’ kan coma maenga’, Din. Sapa tao ba’na pareppa’na loppa. Mon ta’ endha’ epaenga’, ya ta’ arapa.”

”Ba’na bisa sabbar, ha? Jawab!”

”Paenga’, kor. Insyaalla sabbar. Ya ta’ tao pole....”

Saellana ngedhing caretana Midin, bila baktona atangnge ajaga cabbi, Nom Kasan sambi abirit ban nyongkel are’. Ta’ burung se acaroka bila badha oreng se ngeco’ cabbina. Tantona Nom Kasan sabbar, tape ganeka bab pangaodhi’an. Janji tompes Nom Kasan ta’ nyorot bila badha acem-macem dha’ tamennan cabbina.

Tello’ are sabellunna molong, Nom Kasan atangnge e toguran akadi biyasana. Ta’ loppa asango kobi, are’ se esongkel, radio tor tasbih. Bila badha acem-macem dha’ tatamennan cabbina, Nom Kasan la siyap alaban sampe’ tok-pattok. ”Ajja’ sampe’ ngeco’ salokke, ngala’ settong cabbi nyaba tarowanna. Ta’ mekkera dhukale mon sateya,” dhabuna dhalem atena.

Nom Kasan enga’ dha’ pottra sareyangnga se pareppa’na asakola. Tantona parlo biyaya; enga’ dha’ rajina se paleng raddin tadha’ lajjanna. Tanto parlo arabat aba’na kalaban beddha’ tor kaparlowan laenna; ban enga’ dha’ kaparlona aba’na dibi’.

Sampe’ pokol settong tadha’ pa-ponapa se makobater atena Nom Kasan. Saellana pokol satengnga tello’, buru atena molae kobater bila ngabas tamennan cabbi se agulubuk ce’ sarana.

Nom Kasan arendhu nyendhemme. Pangabassa masettong dha’ bungkana cabbi se agulubuk. Nom Kasan ngabas jang-bajangan aguli. ”Mon sateya tompes ba’na, Cong. Apola ngeco’ tang cabbi. Banne gaja’ areya.”

Nom Kasan ngala’ are’na ban arangka’ nyemma’ dha’ kennengnganna jang-bajangan se maropek atena. Ongguna cokop senthak ban ngangka’ are’ la mabal maleng jareya. Nangeng Nom Kasan ta’ terro salamet baja mangken tape kaelangan lagguna. Monggu Nom Kasan, tadha’ maleng se kene’an ate. Ta’ tolos samangken, lagguna paste abali pole. Ajajal pole sampe’ hasel neyat juba’na. Mara ganeka babatekka maleng.

Daddi Nom Kasan mele jalan lekkas: mate orosanna. E pekkeranna, manabi maleng ganeka etorot, bisa bai alatlat dha’ tamennan cabbina oreng laen. Kapotosan akherra, ya, pate’e. Tadha’ peleyan laenna.

Seddheng la semma’ ban malengnga ta’ aromasa ja’ nyabana la para’ dhapa’a, Nom Kasan alonca’ ban lamsum agibessagi are’na. E dhalem pettengnga malem, e bakto seppena kabadha’an, dhara ngalocor dhari lengngenna maleng ganeka. Ta’ parlo bakto abit, Nom Kasan ngara’agi are’na dha’ le’er ban tabu’na. Dhara ngalocor, essena tabu’na ngolpa.

”Tompes mon sateya ba’na, Cong.”

Maleng na’as se asalokop mowa ganeka coma etopowe kalaban dhadhaunan. Nom Kasan arassa ta’ parlo ngaonenge mowana. Sambina la malem. Ta’ bagus rassana me-ramme lem-malem. Laggu’ bila are ampon ombar, tantona aba’na bakal ngabas keya pasera se daddi panyaket e kampongnga. Garidhu pastena, tape paleng enja’ maleng laenna parlo mekker dhukale se ngeco’a.

Nom Kasan ngabas kalangse se ekeba so maleng na’as ganeka, sakone’ ollena. Cokop eabas, ta’ ekala’ essena so Nom Kasan. Margana kalangse ban essena ganeka se daddi bukte bila badha oreng atanya.

Ta’ adhantos Sobbu, Nom Kasan lamsum paleman ka compo’na ban ta’ acareta dha’ rajina parkara cabbi se ekeco’ maleng ban mangken ampon tompes, ponapa pole dha’ pottrana. Orosan ganeka bakal ekacatora lamsum dha’ Pa’ Carek. Daddi saellana asombajang Sobbu, Nom Kasan lamsum nojju compo’na Pa’ Carek.

E langgar, Nom Kasan acareta dha’ Pa’ Carek parkara kadaddiyan e saba. Pa’ Carek takerjat mereng careta, amarga monggu aba’na ta’ parlo sampe’ mate’e. Cokop epokol ban panglo sopaja maleng ganeka ta’ ngalako pole. Otaba lamsum sargep ban keba dha’ ponggaba se lakar bagiyanna ngoros mara ganeka.

”Buh, ganeka ma’le daddi paenga’ dha’ se laen sopaja ta’ acem-macem e kampong ka’dhinto, Ka’. Enggi sampeyan, polana odhi’na ta’ agantong ka ollena pello koneng, pas locer adhabu mara ganeka. Coba’ sampeyan daddi kaula, paleng pon padha bai,” koca’na Nom Kasan nyellat kandha.

”Terros, samangken kadiponapa orosan ganeka?”

”Kaula coma nyo’ona sampeyan daddi sakse. Bila laggu’-dhumalem badha oreng mamadul otaba atanya taretanna se tadha’ otaba ta’ paleman, kabala ampon epate’e sareng kaula margana ngeco’ cabbi.”

”Ampon, ganeka korang bagus, Le’. Tore bula ban dika areng-sareng dha’ saba. Kaula jugan ngajaka oreng kampong se laen sopaja daddi sakse ban maleng ganeka ekobur kalaban samastena.”

”Op, kaula ta’ ngerenga. Kaula abaliya dha’ compo’. Kaula cokop akabar, orosan saterrosa kaula masra’agi dha’ sampeyan, Ka’. Saporana....”

Nom Kasan pamet bubar, dining Pa’ Carek posang mekkere. Akherra Pa’ Carek motossagi kaangguy akabar lebat corongnga masegit. Apangarep sopaja reng-oreng nojju sabana Nom Kasan. Pa’ Carek ta’ nerrangagi badha ponapa, coma ngabala cabbina Nom Kasan ampon epolong maleng malemma.

Reng-oreng areng-sareng nojju sabana Nom Kasan. Sabellunna napa’ e saba, Pa’ Carek ajarba’agi kadaddiyan saongguna. Kakabbi padha napet dhadha, sabagiyan badha se nyale tengkana Nom Kasan, sabagiyan se laen badha se apesowan dha’ malengnga. Nangeng reng-oreng bannya’ se getton margana Nom Kasan ta’ apolong.

Napa’ e saba, Pa’ Carek ban reng-oreng lamsum ngurus mayyit se mandhi dhara. Perro’ atalabuyan mara jagung mare ekarkar ajam. Reng-oreng arebbu’an se ngabas, padha terro nengaleya mowana se asalokop.

Pakowa takerjatta reng-oreng saellana salokoppa ebukka so Pa’ Carek. Kakabbi padha nyebbut asmana Se Kobasa ban apora’alla li-baliyan.

”Alloh, Alloh. Pora’allaaaa....”

***

”Le’, kacong badha e dhalem?” Ca’na Nom Kasan saellana dhateng dhari compo’na Pa’ Carek.

”Sobung, Ka’. Ellu’, sampeyan ta’ ngereng se laen dha’ saba? Badha ponapa, Ka’?”

”Koduna sengko’ se atanya, ba’na ma’ ta’ noro’? Op, sengko’ malorosa tengnga kadha’.”

Ta’ olle satengnga jam se maloros tengnga, reng-oreng garidhu e taneyanna Nom Kasan sambi wat-thowatan. Nom Kasan paggun maloros tengnga. Dhalem pangarassana, paleng coma terro taowa careta saongguna kadaddiyan e saba.

”Cong Midun, Nom, Cong Midun.”

Mereng asmana kacongnga esebbut, Nom Kasan laju abanjal dhari ambin ban kalowar kamar. Pangarassana ta’ nyaman.

”Ba’na mate’e Midun, Nom. Ta’ andhi’ ate bana. Margana dunnya kacong daddi tarowan.”

Nom Kasan pote olay nangale mayyitta Midun, dining rajina ampon kalengnger e taneyan.

”Ta’ aguna ba’na kasta mon sateya, Nom. Alloooh.”

Sidogiri 2018.

*)Santre Sidogiri dhari Camplong, Sampang.

(mr/*/bas/JPR)

 TOP
 
 
 

Subscribe

E-Paper
Follow us and never miss the news
©2019 PT Jawa Pos Group Multimedia