Senin, 14 Oct 2019
radarmadura
icon featured
Resensi

Palangnga Oreng se Jau Dhari Elmo Agama

13 Januari 2019, 20: 34: 34 WIB | editor : Abdul Basri

Palangnga Oreng se Jau Dhari Elmo Agama

Share this      

ORENG Madura ampon kalonta molae lamba’ gi’ jaman kona ja’ lakar ter-penter elmo agamana. Napapole e akher-akher samangken, oreng Madura ampon bisa ngaji Qur’an sadaja. Bisa enyata’agi na’-kana’ e Madura molae gi’ kene’ ampon ebiyasa’agi ngaji dha’ langgar. Tor manabi lastare Asar ebiyasa’agi asakola diniyah. Ding ampon kalowar SD/MI epamondhuk nang pondhuk pasantren se ampon rata e Polo Madura. Odhi’ e polo ka’dhinto onggu-onggu nyennengnge ka ate sabappepon lingkungan ampon nyokong kaangguy madhalem elmo agama se jat lakar parlo. Ta’ ngeba palang neng are laggu’, enggi ka’dhinto akherat.

Sabalikepon, manabi gi’ badha oreng Madura ta’ oneng otaba gi’ nengke’ dhalem elmo agama, ka’dhinto daddi petanya tor ca’-caca’an tatangga aponapa ma’ pas ta’oneng ngaji otaba ta’oneng elmo agama? Settong jawaban se jat lakar malarat kaangguy ejarba’agi sabappepon ampon kalowar dhari tradisi tor kabiyasa’an oreng Madura se taresna ekapateya dha’ elmo agama. Mangkana, lakar bisa daddi oreng se palang pagi’ e alam akherat manabi jau dhari elmo agama. Settong kalakowan se abakta kasossa’an salanjangnga.

Namong badan kaula sadaja paggun ekoca’ manossa, banne malaekat se ampon kasohor lopot dhari dusa. Se ekoca’ manossa jat lakar badha dhuwa’ peleyan, enggi manabi mele kabagusan tanto sowarga se bakal ekaolle. Manabi badan kaula mele alako dusa, tantowepon kennengngan se cocok enggi ka’dhinto e apoy naraka. Sace’-bece’na oreng Madura paste badha se morsal. Sanya’-banya’na pondhuk tor keyae e polo ka’dhinto, paste badha se daddi oreng rosak, bagus rosak tengkana, akhlakka, dhabuna, tor rosak agamana. Ca’-oca’ Madura lakar banya’ buktena; manabi badha jeddhing paste badha pacarrenna. Se earep, oreng Madura se ampon daddi pacarren otaba rosak agamana, duliya mandhi dha’ka aeng berse se badha e jeddhing kasebbut. Saenggana oreng kasebut daddi berse ate tor lontor dusana.

Mela dhari ka’dhinto, ma’le badan kaula bisa arassa’agi odi’ kodu semma’ dha’ka Pangeran, sala settongnga kalaban maos serratan basa Madura se are samangken ampon sajan bannya’ e toles sareng oreng-oreng Madura. Akadiya Mahwi Air Tawar, Jamal D. Rahman, tor Lukman Hakim AG, se ampon nyerrat babulangan kalaban basa Madura. Maos serrat basa Madura, se aropa’agi tolesan dhalem ropa sanja’, paparegan, kejung, careta pandha’ (carpan), tor en-laennaepon bisa matamba pangaterro aba’ kaangguy semma’ dha’ Gusti Allah. Aponapa ma’ bisa saka’dhinto? Amarga serrat basa Madura sakabbiyanna daddi jalan (suluk) masemma’ ka Pangeran.

Ngereng oladi bisaos jajarba’an badan kaula e attas. Badan kaula ngoddi aresensi buku kalaban bul-ombul Oreng-Oreng Palang anggidanna Lukman Hakim AG. Buku se kasebbut aropa carpan se esse ennem careta.

Se kapeng settong abul-ombul Cong Nangka. Ngereng maos pekthegan okara paneka sakone’. ”Saabidda Cong Nangka morok, santrena sajan abit sajan atamba bannya’....Apapole sateya la ekamanto Pa’ Klebun se bagus tatakramana dhalem mimpin disa” (hlm. 17). Serrat se badan kaula pondhut ka’dhinto ampon ngatorragi dha’ panjennengngan ja’ buku ka’dhinto sarat kalaban hikmah tor nilai agama se hebat. Badha nilai se ngetek dhalem serratan Lukman, enggi ka’dhinto elmo agama, madaddi oreng se molja dhalem tengka. Tor elmo agama ta’ bisa epapesa kalaban pangkat daddi kalebun otaba pa’ tenggi, karana agama Islam ta’ ngajaragi pamesa’an antara agama tor pangkat kanagara’an. Se biyasa e dunya Bara’ ekoca’ sekulerisme.

Se kapeng dhuwa’ abul-ombul Palabbuwan Pesa. Nyareta’agi hal-ihwal khusus tatengka oreng ngodha Madura se same kalaban oreng laen, agandhu’ taresna, paneser. Tape amarga tana Madura ta’ bisa nyokobi kaangguy aberri’ kasap ka oreng Madura, kalaban terpaksa daddi oreng manca, arantau ka tana se lebbi landhu, kalaban same mugel taresna ka settong ate’. ”...moga-moga ponapa se ampon kaula ban panjennengngan rantep ecampowa sareng pangarana Pangeran,” (hlm. 26). Settong pangaterro se dhalem, tape paggun magantong ka kowasana Allah, tandha taresnana oreng Madura se saonggunna.

Se kapeng tello’ abul-ombul Sello’ Babakalan. Jalan carita se bisa ekoca’ oreng-oreng palang amarga ”...se sogi sajan sogi, se mesken sajan epaten. Epaten kalaban tanggungan otang se sajan abit sajan abudhu’,” (hlm. 32). Ta’ sakabbinna oreng Madura odhi’ majembar, tape badha jugan se daddi tokang riba, mabudhu’ pesse se bakal daddi kajuna pagi’ e naraka Jahannam. Ban e tana Madura gi’ce’ banya’na oreng-oreng se sogi namong andhi’ tengka se kalowar dhari hokom agama Islam.

Se kapeng empa’ abul-ombul Radda. Careta tragis tor nako’e dhari buku carpan ka’dhinto. Oreng-oreng palang ampon alako kaneyaja ka aba’na dibi’. Kaneyaja amarga tepessa iman, tepessa taresna dha’ Guste Allah saengganna mate kalaban aradda’. Dusa se sanget etako’e oreng Madura teba dha’ Salma (hlm. 57).

Se kapeng lema’ abul-ombul Jitho. Polo Madura saongguna kennenganna kalakowan, bisa esebut 1001 macem kalakowan badha e Madura. Sala settongnga abadhi gampen otaba bubu’. Dhalem agabay otaba abadhi bubu’ jitho ka’dhinto sanget parlo. Kalaban badhana jitho bato se asalla gali eobbar daddi ancor, daddi gampen, daddi bahan roma. Namong, se lebur dhalem careta ka’dhinto enggi paneka ”...Adan Mangrib ekaedhing dhari corongan langgarra Ka’ Rahem. Ropana ana’na se anyama Rusdi dhateng dhari pondhuk,” (hlm. 67). Kaangguy aberkadan dhalem kalakowan, ja’ sampe’ loppa ka Pangeranna. Ka’dhinto jalan kaontongan dhalem kaodhi’an saterrossa.

Se pongkasan, se kapeng ennem, abul-ombul Pessen. Aesse careta pessen dhari oreng se para’ seda’a otaba sakaratul maut. Bul-ombul ka’dhinto apareng oneng dha’ka kaula sadaja ja’ manabi ampon ta’ kowat pole odhi’ neng e dunnya, lebbi bagus kodu apareng wasiyat ka ahli warisepon. Ka’dhinto lakar anjuranepon agama badan kaula sadaja. Kalaban badhana wasiyat otaba pessen menangka amanat dhalem kaodhi’anna, maka bakal epanggi manabi padhana agandhu’ kaberra’an, akadiya otang tor en-laennaepon. Kalaban badhana pessen, kaberra’an odhi’na mayyit bakal etanggung na’potona. Tanggunganepon bisa daddi kaontongan dha’ mayyit e alam kobur.

Se ka’dhinto esse sabagiyan careta e dhalem buku Oreng-Oreng Palang manabi ekaetagi kalaban elmo agama. Bisa etengkes, manabi badan kaula sadaja ampon dhalem elmo agamaepon, maka ta’ bakalan daddi oreng palang pole. Oreng palang ka’dhinto amarga sajan jau dhari Guste Allah, karana ampon jau maka Guste Pangeran jau jugan dha’ oreng kasebbut. Malar mandar badan kaula sadaja daddiya oreng-oreng se ontong e dunnya kantos e akherat. Amin! 

AHMAD MUHLI JUNAIDI

Guru sajara e SMA 3 Annuqayah se taresna dha’ basa tor sastra Madura.

(mr/*/bas/JPR)

 TOP
 
 
 

Subscribe

E-Paper
Follow us and never miss the news
©2019 PT Jawa Pos Group Multimedia