Sabtu, 17 Nov 2018
radarmadura
 
icon featured
Puisi

Maniro AF.

Senin, 16 Apr 2018 15:34 | editor : Abdul Basri

Maniro AF.

dika mesem, berka’

ngeba ngabber gulina odhi’

se katoles e settong papanggi

nonggalla ate se ngembang

ngarep settong bantal-gulingnga pate

labang abukka, e amper

bula asela, nondhu’ namen pangarep

akadi bintang se sodek e langnge’ se barse, akeddhap

Sorbaja, 2018

...................................

Pangantan

jenneng matana

akadi bulan tanggal lema bellas

gellungnga gellung malathe

jamang emmas nyonar are

esampere bathek lorek

leres celleng pote tolang

pajalanna neter kolenang

bila ngastete tengka’ gulina

alos dhammang abasanna

Sorbaja, 2018

...................................

Senoman

”perreng gala, gala perreng

oreng bala, bala oreng”

segi’agi babang mera babang pote

buwangngagi ate se petteng se ta’ socce

pasettongngagi korse se apencar

parida’agi kalopodan se ngalarkar

”perreng gala, gala perreng

oreng bala, bala oreng”

Sorbaja, 2018

...................................

Leppet

 

I

berras, nyeyor, ban palotan

ebundu’a kalaban janor koneng

akadi mondu’ ate

sopaja etombuwi kembang pangesto

se ta’ kera elop saomora

II

akadi nyo’on papakon

eso’ona kalaban banci

ka bengkona dika

sopaja enga’ odhi’na bula ban dika

etale’e kalaban janji

Sorbaja, 2018

...................................

*)Laher e Kampong Paseser, Pasongsongan. Sareng ca-kancana arabat Arsip Puisi Penyair Madura se-Indonesia (APPMI). Ajar e Halaman Indonesia Cultural Forum-Jogjakarta sarta akuliya e jurusan Aqidah tor Filsafat Islam UIN Sunan Kalijaga, Jogjakarta.

(mr/*/bas/JPR)

Jawa Pos Digital
E-Paper
Most Read
 TOP
Artikel Lainya
 
 
 

Subscribe

E-Paper
Follow us and never miss the news
©2017 PT Jawa Pos Group Multimedia