Sanja’na Rifa: Bungana Ate

Panassa are mapelka’ bume ban marengsa ate

Lantaran magili aeng mata sabban are

Karana ojan se ekakerrong ta’ gellem pasthe

Kalaban kamalaradan

Aeng sacapcap ekabuto

Sopaja maelang serro

Mosem nemor...

Moga dhapa’a ka konco’na

Sopaja tombuna tanya

Agante pangaterro se raja

…………………………………

Sukab

Rese’ nyerser mesemma

Tana molae bacca akantha robana

Aba’ ta’ kellar nyegga bungana ate

Se mekkar akantha kembang malathe

Nyellem dha’ ka settong mesem, Sukab

…………………………………

Ebu

Capcabba pello ban dhara daddi tandha

Taresnana Ajunan akantha sagara

Se makerrong badan kaula,

Tengnga malem daddi patapa’an

Badan kaula nyo’on du’a dha’ Guste Pangeran

samoga Ajunan epareng kasalameddan.

…………………………………

Bungana Ate

Bungana ate

Maos salawat dha’ nabi agung

Allahumma shalli ‘ala Muhammad

Ya rabbi shalli ’alaihi  wa sallim

Se matera’ sadaja alam

Tera’na akantha ngowan bakto

Dhari males se ompamana alas

Lampana daddi pangoko

Rassa esto dha’ agama

Se abdina eoburi taresna.

…………………………………

Mate Rassa

Alos maloka dhateng dhari sokma

Nespa tor nyangsara

Kaelangan rassa taresna,

Agaluy e dhalem ate

Sake’na ta’ mare

Aeng mata noro’ ngalocor

Enga’ ka rassa esto se ta’ bisa eokor

…………………………………

*)Nganggi’ tolesan e Forum Lingkar Pena PP Annuqayah Latee II

Baca artikel dan berita menarik dari RadarMadura.id lainnya di Google News