Sanja’ Mudhar CH: Tembhȃng Maskumambang

Ajhârâ pabhâjheng molaè ghi’ kènè’

ngokèr bâto paḍâ

ontong sanonto bân paghi’

buḍi arè saterrossa

Èlmo tanto dhâddhi obhur ḍâlem oḍi’

nèra’è jhâlânna

paḍḍhâng ta’ mangarèpotè

bhâjjhrâ jhâjâ saomorra

Kana’ ngoḍâ lakè’ jhughân orèng binè’

sopajâ’â jhâjâ

dhâddhiyâ sangona oḍi’

sarè ajhâri èlmona

Rèng alèm nonḍu’ manḍhâ’ amènḍhâ paḍi

ta’ onga’ calonga’

ḍhâbuna èkalèburi

maghâr sarè sakobhengnga

Marghâ èlmo anḍhâp asor tèngka ghuli

bânnya’ orèng trèsna

senneng tanto ngapèncotè

ngalècèr sè amantowa

………………………………………….

Tembhâng Pucung

Nèka tembhâng pandhumanè ghuru laghu

sopajâ’â kennal

o u a jhughânan è i

jhembhâr pagghâliyân èssè bhâk-tebbhâghân

pon tanto pakakas nèka ropa bâto

bânnya’ ampon loppa

aghules bânnè aghighi’

dhing èghules dhâddhi lembhu’ kalowarra

wâ’-buwâ’ân ropana asèkot bungkol

manès jhughân paka’

è ḍâlem nèka abighi

sakeppel èkoca' èkrobung ghâlâta

È pong-kampong kappra panèka èyobu

Lakè’ binè’ cakang

Ta’ mlarat ka sè ngopènè

Aburi’ kèng ta’ acolo’ paḍâ ngakan

Raddhin gântheng tombu nangèng ta’ aobu’

mekko bâḍâ cathar

Paḍâ saos rajâ kènè’

dhing ètolè ta’ katèngal najjân semma’

Kabbhi angghuy masangnga ta’ epapolong

Mèrèng kaḍhâng ghentang

Ghâbây notop ta’ èjhâi’

Kènè maso’ mèrèng kalowar mancella’

Sampang, 11-12 Molot 1445 H (27-28 September 2023)

*)Mudhar CH lahir di Sumenep, 29 November 1980. Alumnus STKIP PGRI Sumenep ini aktif sebagai tenaga edukatif di Ma’had Al Ittihad Al Islami Camplong. Tinggal di Perumahan Puri Matahari Sampang

Baca artikel dan berita menarik dari RadarMadura.id lainnya di Google News