Sanja’na Moh. Aqil: Rassa se Tapongkor

Sanonto angen mate

Bakto neng-enneng

Sowara seppe

Kajabana monyena

Pete’ e dhalem korong

Mano’ koju’ e konco’na palembang

Ban monyena sape mar-samar

Sakejja’ aggi’

Are bakal elang

Elanyo’ aros

Elanyo’ omba’

Elanyo’ sakabbiyannna

Padhana elanyo’na

Rassa se tapongkor

Andhulang, 15–19/Maret–April 2024.

…………………………………………….

Angen Lere

Angen lere

Salerena nyaba kalowar ka dhalem

Bakto senneng otaba posang

Angen lere

Sakadhang maperna

Sapernana kakapper e kembang-kembang mabar e bakto mekkar

Angen lere

Sakadhang maposang

Saposangnga ajam bine’ elang budhu’na

Angen lere

Sakadhang gun mamare ojang

Andhulang, 18 Maret 2024.

…………………………………………….

Tadha’ se Aguna

Busen, lesso, kapaksa daddi settong

Dhalem bundu’ ja-ngaja se lako etoles kalaban mesem

Ta’ karep se e san-kessannagi se madaddi

Bakto, are tadha’ se aguna sama sakale

Annuqayah 2024.

…………………………………………….

Malem Dhi-budhina

E malem sanonto tanggal panengnga e bulan ngadha’

Aropa’agi malem dhi-budhina ojan bulan settong

Se biyasa nyerame ka’-bungka’an, wa’-buwa’an

E penggirra roma, sampe’ sadisa

E malem sanonto

Malem dhi-budhina

Annuqayah, 24 April 2024.

…………………………………………….

Osomma

Sanonto osomma oreng-oreng ta’ ngabas dhalem, kajaba lowar se asre

Sanonto osomma oreng-oreng ta’ ngabas senneng, kor paraddu

Sanonto osomma oreng-oreng ajalan san-kessannagi, se maloppa

Sanonto osomma oreng-oreng mele ban epele, se maseppe

Sanonto osomma oreng-oreng se ta’ kappra, sata’kapprana

Annuqayah 2024.

…………………………………………….

Satengnga Sapolo Lebat

Satengnga sapolo lebat

Sorat dhi-budhina, ekanthang eserrat

E dhalem sasebbit ate, se emangsene katalka’an

Satengnga sapolo lebat

Sorat dhi-budhina, ekeremmagi lebat angen malem se ngalesser se adara’ e adha’na roma.

14-24/Maret–April 2024

…………………………………………….

Baca artikel dan berita menarik dari RadarMadura.id lainnya di Google News