alexametrics
23.3 C
Madura
Thursday, July 7, 2022

Loppa Janjina

BULA ta’ nyangka, Ka’, ja’ dika bakal aoba dha’ bula. Pangestona dika se lamba’ ce’ dhalemma, panganggeppa dika se lamba’ ce’ ekarassana, tor pangembana dika se lamba’ ce’ onggu-ongguna. Anape sanonto ma’ pon elang ta’ etemmo kennengnganna. Adhu, Ka’, nape bula toman agabay sala saenggana dika ta’ bisa nyapora? Otabana dika ampon apangrasa bula ta’ pantes daddi oreng se bisa agabay atena dika bunga?

Dika maelang dhari kaodhi’anna bula acora’ tadha’ lantaranna. Dika elang mo-temmo elang agabay bula lako atanya. Badha nape? Nape se daddi sala? Saongguna, Ka’, lamba’ pa’-reppa’na dika ban bula seggut along-polong ban seggut areng-bareng, bula nganggep pangestona dika ta’ bakal elang, ta’ bakal aoba.

Jujur, Ka’, sampe’ sanonto, sanajjan dika ampon ta’ etemmo kabarra, pangestona bula dha’ dika paggun ta’ aoba. Coma dika tong-settongnga reng lake’ se paggun nalpe’ e dhalem dhadha. Bula paggun enga’ dha’ bakto se tapongkor. E nalekana dika ban bula daddi settong.

”Le’, bula ta’ tao neko nape nyamana. Bula apangrasa talebat bunga tor-catoran ban ta’-careta’an abareng dika,” oca’na dika dha’ bula lamba’ e dhalem telpon.

”Ah, Ka’, maddha ja’ agaja’,” bula ngoca’ nga’ ganeko ka dika sambi ngedhingngagi monyena dhadha se dhaldhildhulan.

”Ongguwan, Le’. Sabban malem bula kerrong dha’ dika. Bula apangrasa rengsa nalekana tadha’ kabar dhari dika.” Pangakowanna dika agabay bula senneng tadha’ padha.

Careta ganeko ebakto bula gi’ asakola kellas dhuwa’ aliyah, tor dika ampon kelas tello’ aliyah. Dha’ bula dika ngoca’ terro akuliya’a ka lowar negeri. Tape polana pan-barampan sabab, dika ngoca’ akuliya’a ka Sorabaja bai. Tape akherra dika pas akuliya ka Al-Anwar Sarang.

”Maddha, Le’, dika agabay Facebook.” E bakto dika ampon nyata se mangkata akuliah, dika nyoro bula agabay Facebook.

”Ekagabaya nape na, Ka’? Ganeko kan gun en-maenan,” bula pajat ta’ andhi’ Facebook kadibi’, maske kanca la andhi’ kakabbi.

”Aba, ma’ ngoca’ en-maenan, Le’?”

”Enggi en-maenan, Ka’. Gabaya nape keng? Kan e Facebook oreng gun bannya’ aja’-gaja’, tadha’ parlona. Tor jugan kadhang Fecebook akagabay kennengngan atokar ban ca’-ngoca’e sakanca’an.”

”Adhu, Le’, dika ma’ gun ngabas ganekona na? Facebook garowa jugan bannya’ gunana, Le’. Bisa ekagabay oreng noles careta, noles puisi tor ngabala essena pekkeran se bagus ka oreng bannya’. Ban pole le’, sanonto cem-macemma kabar bisa ekataowe kalaban mokka’ Facebook.”

”Tape mon ca’na bula Facebook gun bannya’ en-maenanna, Ka’. Mon gun terro nolesa careta, puisi tor essena pekker, bula kan bisa noles e buku pas keremagi ka majala ban korran. Mon gun terro taowa ja’ badha kabar nape, bula kan bisa maca korran se badha e kantorra sakola’an.”

Baca Juga :  Pertama, Sastra Madura Dapat Hadiah Rancage

”Guh le’, bula neko andhi’ Facebook ampon abit. Tape enten mon bula ta’ gun egabay en-maenan. Ganeko ongguna ca’na oreng se neggu’, Le’.”

”Pon bikan mon nga’ ganeko, Ka’. Dika nape keng ma’ nyoro bula agabay Fecebook?”

”Bula kan mangkata akuliah ka lowar Madura, Le’. Tantona nomer HP-na bula paggun aoba.”

”Terros, Ka’?”

”Enggi dika agabay Fecebook, Le’, nomerra dika tantona kan paggun aoba keya pagi’. Melana nga’ ganeko, Le’, dika kodu agabay Fecebook, sopaja bula gampang nyare dika, sopaja bula gampang ngubungi dika.”

”Oh, mon nga’ ganeko enggi pon, bula agabaya.”

”Enyamana’ana sapa Fecebook-ka dika, Le’?”

”Enyama’ana nyamana bula dibi’, Ka’. E oca’ lu-dulluna badha horop ’E’-na.”

”Oh enggi. Mon pon mare agabay pas add Fecebook bula, Le’. Anyama nyamana bula dibi’ keya.”

”Enggi, Ka’.”

Norote parentana dika, e bakto are garowa bula langsung agabay Fecebook. Mon eker-pekker teppa’ keya. Kalaban bula andhi’ Fecebook, bula bakal gampang ngubungi dika pagi’. Gun kare nyare nyamana dika, pas langsung etemmo.

Tape nyatana nape, Ka’? Sanonto, sajjegga dika akuliyah ka Jaba, dika tadha’ enga’na dha’ bula. Dika loppa ka janjina, dika loppa ka oca’na ja’ sampe’ bila’a bai dika ta’ bakal adina bula. Sabban are, sabban bakto nyamana dika lako esebbut e dhalem ate bula. Gi’ raja pangareppa bula sopaja dika tettep enga’ ban dhateng pola dha’ bula e settong bakto.

Bula se ngubungana dika kaadha’ ban atanya baramma rassana dika sanonto dha’ bula, bula todhus, Ka’. Bula neko reng bine’, ta’ pantes rassana adulluwi reng lake’ atanya rassa ban pangesto. Tape baramma pole, sajan are bula sajan terro masteyagiya rassana dika dha’ bula. Bula terro nge-chat-a ka messenger-ra dika, terro rang-terrangana atanya’a, sanonto dika ampon andhi’ oreng bine’ laen otaba gi’ enten.

Saongguna, Ka’, ampon abit badha reng lake’ se dhateng dha’ bula. Ngoca’ ngabina bula saellana bula lulus akuliyah. Tape amarga atena bula tettep dha’ dika tor bula gi’ ker-pekkeran tako’ dika paggun andhi’ rassa dha’ bula, bula pas ta’ daddi se narema’a reng lake’ laen se dhateng dha’ bula neko. Dhu, Kaka’, sanonto atena bula rengsa, atena bula posang.

Baca Juga :  Plh Bupati Pamekasan Dukung Seminar Literasi

Sanonto bula neko ampon towa, ampon pantes akabin. Ca-kancana bula salulussa aliyah langsung akabin, ta’ nerrosagi akuliyah, sanonto ampon andhi’ ana’ kabbi tor ana’na ampon ja-raja. Bula sengka ka emma’ nalekana ta’ narema’a oreng lake’ se dhateng garowa. Tape, Ka’, dika se daddi alasanna bula ta’ bisa narema orang laen. Bula neser ka dika tadha’ tandhingnga. Tape dika dha’emma?

Kalaban ate se ta’ tanto rassana, bula mabangal nyare nyamana dika e Fecebook. Bula terro atanya’a, terro masteyagiya pangestona dika sannonto dha’ bula ampon dha’ramma. Dhu, Ka’, dika parlo tao, tanangnga bula agedder nalekana ngetik nyamana dika e Fecebook.

***

 

”Ka’, bula akabinagi.”

”Ban sapa, Le’?”

”Ban oreng. Pernah bula acareta reng lake’ garowa dha’ dika. Tape paleng dika loppa.”

”Oh, enggi bula enga’. Enggi sokkor alhamdulillah mon nga’ ganeko. Samoga’a senneng tor langgeng.”

”Bula saongguna ngantos dika, Ka’. Tape dika ta’ jellas.”

”Ta’ jellas napena?”

”Saporana, Ka’. Amarga bula ta’ bisa loppa ka careta se gi’ lamba’. Bula gi’ enga’ ka janji tor oca’na dika. Bula gi’ esto ka dika, Ka’.”

”Dhu, Le’, ganeko ampon careta lamba’.”

”Enggi, Ka’, ganeko careta lamba’. Careta gi’ jaman ngodha, caretana na’-kana’ se gi’ asakola. Tape nyo’on sapora se ce’ rajana, Ka’, bula gi’ ta’ bisa loppa.”

”Sanonto dika ban bula ampon padha towa, Le’. Padha dibasa.”

”Dhu, Ka’, artena bula ekaen-maenan lamba’ mon dika gi?”

”Banne nga’ ganeko, Le’. Tape lamba’ garowa gun rassa ngodhana bula se ngobal. Bula ta’ neyat aen-maenan ban dika.”

”Sanonto dika ta’ esto pole dha’ bula, Ka’? Sapora mon bula cangkolang atanya nga’ ganeko.”

”Bula, Le’, se sapora amarga nyake’e atena dika. Jujur, Le’, bula ampon andhi’ orang laen e dhinto.”

Dhu, sake’ atena bula, Ka’. Bula ta’ nyangka ja’ dika bakal gampang ngalle ate ekagabay kennengnganna pangesto. Nyo’on edi, Ka’, bula apangrasa’a kasta lamba’ kennal ka dika. Bula apangrasa’a kasta toman esto dha’ dika. Bula apangrasa’a ja’ saongguna, pan-saponapan parkara se ampon elebadi tor ejalane bula kalaban dika neko tadha’ gunana. Nyo’on edi, Ka’, ban tolong edi’i, bula baji’a ka dika.

 

 

*)Mahasiswi Ushuluddin Institut Ilmu Keislaman Annuqayah (Instika) Guluk-Guluk, Sumenep. Aktif di LPM Dinamika, Taretan Dibi’, dan Cafe Latte 52, Latee I.

BULA ta’ nyangka, Ka’, ja’ dika bakal aoba dha’ bula. Pangestona dika se lamba’ ce’ dhalemma, panganggeppa dika se lamba’ ce’ ekarassana, tor pangembana dika se lamba’ ce’ onggu-ongguna. Anape sanonto ma’ pon elang ta’ etemmo kennengnganna. Adhu, Ka’, nape bula toman agabay sala saenggana dika ta’ bisa nyapora? Otabana dika ampon apangrasa bula ta’ pantes daddi oreng se bisa agabay atena dika bunga?

Dika maelang dhari kaodhi’anna bula acora’ tadha’ lantaranna. Dika elang mo-temmo elang agabay bula lako atanya. Badha nape? Nape se daddi sala? Saongguna, Ka’, lamba’ pa’-reppa’na dika ban bula seggut along-polong ban seggut areng-bareng, bula nganggep pangestona dika ta’ bakal elang, ta’ bakal aoba.

Jujur, Ka’, sampe’ sanonto, sanajjan dika ampon ta’ etemmo kabarra, pangestona bula dha’ dika paggun ta’ aoba. Coma dika tong-settongnga reng lake’ se paggun nalpe’ e dhalem dhadha. Bula paggun enga’ dha’ bakto se tapongkor. E nalekana dika ban bula daddi settong.


”Le’, bula ta’ tao neko nape nyamana. Bula apangrasa talebat bunga tor-catoran ban ta’-careta’an abareng dika,” oca’na dika dha’ bula lamba’ e dhalem telpon.

”Ah, Ka’, maddha ja’ agaja’,” bula ngoca’ nga’ ganeko ka dika sambi ngedhingngagi monyena dhadha se dhaldhildhulan.

”Ongguwan, Le’. Sabban malem bula kerrong dha’ dika. Bula apangrasa rengsa nalekana tadha’ kabar dhari dika.” Pangakowanna dika agabay bula senneng tadha’ padha.

Careta ganeko ebakto bula gi’ asakola kellas dhuwa’ aliyah, tor dika ampon kelas tello’ aliyah. Dha’ bula dika ngoca’ terro akuliya’a ka lowar negeri. Tape polana pan-barampan sabab, dika ngoca’ akuliya’a ka Sorabaja bai. Tape akherra dika pas akuliya ka Al-Anwar Sarang.

”Maddha, Le’, dika agabay Facebook.” E bakto dika ampon nyata se mangkata akuliah, dika nyoro bula agabay Facebook.

”Ekagabaya nape na, Ka’? Ganeko kan gun en-maenan,” bula pajat ta’ andhi’ Facebook kadibi’, maske kanca la andhi’ kakabbi.

”Aba, ma’ ngoca’ en-maenan, Le’?”

”Enggi en-maenan, Ka’. Gabaya nape keng? Kan e Facebook oreng gun bannya’ aja’-gaja’, tadha’ parlona. Tor jugan kadhang Fecebook akagabay kennengngan atokar ban ca’-ngoca’e sakanca’an.”

”Adhu, Le’, dika ma’ gun ngabas ganekona na? Facebook garowa jugan bannya’ gunana, Le’. Bisa ekagabay oreng noles careta, noles puisi tor ngabala essena pekkeran se bagus ka oreng bannya’. Ban pole le’, sanonto cem-macemma kabar bisa ekataowe kalaban mokka’ Facebook.”

”Tape mon ca’na bula Facebook gun bannya’ en-maenanna, Ka’. Mon gun terro nolesa careta, puisi tor essena pekker, bula kan bisa noles e buku pas keremagi ka majala ban korran. Mon gun terro taowa ja’ badha kabar nape, bula kan bisa maca korran se badha e kantorra sakola’an.”

Baca Juga :  Wewenang Wakil Ketua Dewan Tumpul

”Guh le’, bula neko andhi’ Facebook ampon abit. Tape enten mon bula ta’ gun egabay en-maenan. Ganeko ongguna ca’na oreng se neggu’, Le’.”

”Pon bikan mon nga’ ganeko, Ka’. Dika nape keng ma’ nyoro bula agabay Fecebook?”

”Bula kan mangkata akuliah ka lowar Madura, Le’. Tantona nomer HP-na bula paggun aoba.”

”Terros, Ka’?”

”Enggi dika agabay Fecebook, Le’, nomerra dika tantona kan paggun aoba keya pagi’. Melana nga’ ganeko, Le’, dika kodu agabay Fecebook, sopaja bula gampang nyare dika, sopaja bula gampang ngubungi dika.”

”Oh, mon nga’ ganeko enggi pon, bula agabaya.”

”Enyamana’ana sapa Fecebook-ka dika, Le’?”

”Enyama’ana nyamana bula dibi’, Ka’. E oca’ lu-dulluna badha horop ’E’-na.”

”Oh enggi. Mon pon mare agabay pas add Fecebook bula, Le’. Anyama nyamana bula dibi’ keya.”

”Enggi, Ka’.”

Norote parentana dika, e bakto are garowa bula langsung agabay Fecebook. Mon eker-pekker teppa’ keya. Kalaban bula andhi’ Fecebook, bula bakal gampang ngubungi dika pagi’. Gun kare nyare nyamana dika, pas langsung etemmo.

Tape nyatana nape, Ka’? Sanonto, sajjegga dika akuliyah ka Jaba, dika tadha’ enga’na dha’ bula. Dika loppa ka janjina, dika loppa ka oca’na ja’ sampe’ bila’a bai dika ta’ bakal adina bula. Sabban are, sabban bakto nyamana dika lako esebbut e dhalem ate bula. Gi’ raja pangareppa bula sopaja dika tettep enga’ ban dhateng pola dha’ bula e settong bakto.

Bula se ngubungana dika kaadha’ ban atanya baramma rassana dika sanonto dha’ bula, bula todhus, Ka’. Bula neko reng bine’, ta’ pantes rassana adulluwi reng lake’ atanya rassa ban pangesto. Tape baramma pole, sajan are bula sajan terro masteyagiya rassana dika dha’ bula. Bula terro nge-chat-a ka messenger-ra dika, terro rang-terrangana atanya’a, sanonto dika ampon andhi’ oreng bine’ laen otaba gi’ enten.

Saongguna, Ka’, ampon abit badha reng lake’ se dhateng dha’ bula. Ngoca’ ngabina bula saellana bula lulus akuliyah. Tape amarga atena bula tettep dha’ dika tor bula gi’ ker-pekkeran tako’ dika paggun andhi’ rassa dha’ bula, bula pas ta’ daddi se narema’a reng lake’ laen se dhateng dha’ bula neko. Dhu, Kaka’, sanonto atena bula rengsa, atena bula posang.

Baca Juga :  Tana Sangkolan

Sanonto bula neko ampon towa, ampon pantes akabin. Ca-kancana bula salulussa aliyah langsung akabin, ta’ nerrosagi akuliyah, sanonto ampon andhi’ ana’ kabbi tor ana’na ampon ja-raja. Bula sengka ka emma’ nalekana ta’ narema’a oreng lake’ se dhateng garowa. Tape, Ka’, dika se daddi alasanna bula ta’ bisa narema orang laen. Bula neser ka dika tadha’ tandhingnga. Tape dika dha’emma?

Kalaban ate se ta’ tanto rassana, bula mabangal nyare nyamana dika e Fecebook. Bula terro atanya’a, terro masteyagiya pangestona dika sannonto dha’ bula ampon dha’ramma. Dhu, Ka’, dika parlo tao, tanangnga bula agedder nalekana ngetik nyamana dika e Fecebook.

***

 

”Ka’, bula akabinagi.”

”Ban sapa, Le’?”

”Ban oreng. Pernah bula acareta reng lake’ garowa dha’ dika. Tape paleng dika loppa.”

”Oh, enggi bula enga’. Enggi sokkor alhamdulillah mon nga’ ganeko. Samoga’a senneng tor langgeng.”

”Bula saongguna ngantos dika, Ka’. Tape dika ta’ jellas.”

”Ta’ jellas napena?”

”Saporana, Ka’. Amarga bula ta’ bisa loppa ka careta se gi’ lamba’. Bula gi’ enga’ ka janji tor oca’na dika. Bula gi’ esto ka dika, Ka’.”

”Dhu, Le’, ganeko ampon careta lamba’.”

”Enggi, Ka’, ganeko careta lamba’. Careta gi’ jaman ngodha, caretana na’-kana’ se gi’ asakola. Tape nyo’on sapora se ce’ rajana, Ka’, bula gi’ ta’ bisa loppa.”

”Sanonto dika ban bula ampon padha towa, Le’. Padha dibasa.”

”Dhu, Ka’, artena bula ekaen-maenan lamba’ mon dika gi?”

”Banne nga’ ganeko, Le’. Tape lamba’ garowa gun rassa ngodhana bula se ngobal. Bula ta’ neyat aen-maenan ban dika.”

”Sanonto dika ta’ esto pole dha’ bula, Ka’? Sapora mon bula cangkolang atanya nga’ ganeko.”

”Bula, Le’, se sapora amarga nyake’e atena dika. Jujur, Le’, bula ampon andhi’ orang laen e dhinto.”

Dhu, sake’ atena bula, Ka’. Bula ta’ nyangka ja’ dika bakal gampang ngalle ate ekagabay kennengnganna pangesto. Nyo’on edi, Ka’, bula apangrasa’a kasta lamba’ kennal ka dika. Bula apangrasa’a kasta toman esto dha’ dika. Bula apangrasa’a ja’ saongguna, pan-saponapan parkara se ampon elebadi tor ejalane bula kalaban dika neko tadha’ gunana. Nyo’on edi, Ka’, ban tolong edi’i, bula baji’a ka dika.

 

 

*)Mahasiswi Ushuluddin Institut Ilmu Keislaman Annuqayah (Instika) Guluk-Guluk, Sumenep. Aktif di LPM Dinamika, Taretan Dibi’, dan Cafe Latte 52, Latee I.

- Advertisement -

Artikel Terkait

Most Read

Artikel Terbaru

/