SENGKO’ ta’ ngarte, molae bilan ba’na nganggep sengko’ sapa? Moso, kanca, apa pacarra? Polana se jellas sengko’ ta’ bisa apekker, pangarana ba’na reya apa? Saellana sengko’ enga’, ja’ ban sabban kadaddiyan, reya paggun badha sababba. Barampa bakto, ella bak abit, soalla ban barampan kadaddiyan ella mare ejalane kadhuwa’an, pas saellana sengko’ ngarep onggu, ba’na se kare apola ban ta’ jellas baramma pangarana.
Lisa, apa ba’na ta’ enga’ bakto amon-semmon e temor, ba’na ajanji, ja’ bakal saomorra atena paggun kaangguy sengko’? Tape apa nyatana, sateya sengko’ ebuwang, ta’ eanggep sakale mon ba’na.
Tape patennang, saji’-baji’na sengko’ ka ba’na, sengko’ paggun adu’aagi se bagus. Samoga’a oreng gantena sengko’ bisa madaddiyagi ba’na ma’mum se bagus, se norot ka lake, se sajan tundu’ ka agama ban tantona jugan ka nagara. Ban pole pagi’ alahiragi pottra otaba pottre se bisa amanfa’at ka oreng laen. Amin.
Sanajjan are ella atamba rampa’, sengko’ paggun sakone’ ngaenga’e ban-sabban kadaddiyan se ella tapongkor. Sambi arassa’agi ban apekker se bagus, se nyamana Guste Pangeran, iya areya ta’ kera lopot mobu judhuna manossa. Padhana sittung ayat se ella ajellasagi dhalem Al-Qur’an, ja’ manossa reya andhi’ judhuna bang-sebang. Ban pole se jellas, oreng se bagus, reya paggun ban oreng se bagus. Ban oreng se ta’ bendher areya ollena ta’ kera jau dhari aba’na.
Saellana jareya, sengko’ masadhar aba’ ja’ pan-saponapan abit oreng se odhi’ e dunnya reya paggun eadheppagi kalaban apesa. Saengga ta’ abit, sengko’ ella bisa kaangguy ngaloppae Lisa. Re-saare, sengko’ maemo’ kalaban kalakowan ngabdi ka oreng seppo dhuwa’, sambi asakola bila are maso’na sakola’an. Kadhang sakone’ long-nolonge bala tangga se ngabuto sengko’. Kadhang mateppa’ barung, agutos roma, ban laenna agumantong kabutowan se acem-macem.
***
Saellana lema bulan sengko’ ajalane kaodhi’an se biyasa, sengko’ arassa ta’ andhi’ pangara kaangguy acar-pacarana pole. Polana sengko’ masadhar aba’, ja’ mon pera’ apacaran reya coma mowang bakto ban bakal rogi tor sakone’ gunana. Saengga bila oreng seppo atanya masala jareya, sengko’ gun ajawab, ”Kaula passra ka ampeyan masala ganeka, Pa’,” oca’na sengko’ bila etanya’agi masala jareya. Polana sengko’ yakin, ja’ adha’ caretana oreng seppo reya matacabbur ana’na ka jurang se petteng.
***
”Ba’na ta’ entara ka pamanna ya?” Emma’ atanya ka sengko’ se bakto jareya, buru jaga tedhung.
”Ba, anapa? Badha ponapa, ma’ entara ka paman?” Sengko’ abalik atanya.
”Kan mangkana ja’ lako tedhung. Pamanna ba’na reya labu dhari attas sapidha gella’ gi’- laggu. Buru bibbi’na nelpon ka engko’,” emma’ ajawab lelere, tape matakerjat ka dhadhana sengko’.
”Apana ra?” sengko’ atanya kalaban ta’ partaja.
”Iyya assa’ mangkat ka romana pamanna, sapot, malle tao baramma kadaddiyanna, ban apa’an se loka,” oca’ emma’ sambi mangkat ka dhapor ban elang, saellana lebat e labangnga dhapor.
Saellana jareya sengko’ terros jaga kalaban ceppet ban terros ka jeddhing se badha e adha’anna roma. Saterrossa, samarena amandhi, sengko’ aranta; masang kalambi, asongko’ ban salaenna. Abidda kera-kera lema mennit, sengko’ ella samporna aranta, ban la siap mangkat.
***
Ta’ abit e parjalanan, pole polana romana sengko’ ban romana paman ta’ kose jau, se jellas sapolo mennit, sengko’ ella samporna badha e adha’anna amperra romana paman. Oreng ella bannya’. Sapidha ella eppol etaneyanna, ban sakabbinna towan roma ella padha emo’. Kemma se agabay kobi, ngamba’ tamoy. Sengko’ ta’ mengnga’ mon sampe’ bannya’ oreng. Polana paman reya orengnga pakanca, pabala, ban senneng asilaturrahmi ka sakabbinna oreng, saengga sengko’ ta’ mengnga’ sakale.
Saellana jareya, sengko’ maso’ ka dhalem, ban sambi asallim ka tamoy, otamana reya ka la-balana sengko’ se sateya akompol kabbi.
”Tamaso’ hikmah, neka gi, sabala’an akompol kabbi,” Ji Asmuni, majadhi’na paman abanta. Saengga se ngedhingagi mesem ban badha se agella’.
”Tape empon, dinggal manabi makompola pole mandaran ta’ akompol kalaban kadaddiyan sapaneka,” Ji Dulla noro’ jugan abanta, kalaban etoro’ onggu’an nondhu’.
Se bagiyan towa ata-banta, sengko’ maemo’ kalaban asallim, marena terros entar ka paman, se ella sateya bisa toju’ kalaban loka se gi’ mera. Mowana paman acarret, sokona ella loka kabbi, ban menorot pamatoran, paman reya nabra’ sape se nyabbrang e lorong.
”Ba’na ja’ toju’. Assa’ manjak bai,” paman ato’-koto’ ka sengko’, ban e jawab mon sengko’ kalaban onggu’an tello kale.
Sengko’ jaga, nojju ka dhapor. Tape, sabellunna sengko’ dhapa’ ka dhapor kaangguy manjak, ta’ abit etemmo badha gariyung e bara’ lao’ ban badha sowara cerreng ban nanges se acampor. Se laen, tamoyya paman jugan ngedhing. Tape coma sabagiyan se entar ka kennenganna cerreng se acampor tanges. Sengko’ abintal, ban sambi nyaba’ talam, buru, ban masemma’ ka asalla sowara. Ban nyatana, sowara cerreng ban tanges rowa, asalla dhari romana Lisa—pacarra sengko’ se ella tapongkor.
Ta’ ekarassa, nyatana se entar dha’essa’ reya ella bak bannya’. Terros sengko’ masajan masemma’, ban edhissa’ emma’na ban Lisa ella agulur e tana. Sengko’ terros masemma’. Ta’ abit, sabellunna samporna semma’, sengko’ takerjat sambi jeng-manjeng saellana ngaedhing oca’na eppa’na Lisa ranyeng, ”Kan engko’ ella mare maenga’, ka lalake’ rowa, ja’ ma’-semma’. Bile ngandhung, buru ngoca’ kasta ba’na,” oca’na eppa’na Lisa macerreng ngoso’. Sengko’ takerjat. Ate ngolgul, panas, ban samacemma. Tape sengko’ sadhar ja’ sengko’ ella banne apana Lisa. Engko’ coma bisa abalik, ban ajalan majau. Nojju bengkona paman, sambi ngoca’ dhalem ate, ”Kare neserra, ban ta’ nyangka.”
*)Mahasiswa dan pengurus Lembaga Pers Mahasiswa (LPM) STIT Al-Karimiyyah, Gapura, Sumenep.
