Gurindam Madura
Bab Powasa
1) Mon aba’ lakar oreng Islam
Bila tatemmo apareng salam
2) Sala settong kawajibanna
Kodu ajaga ka powasana
3) Apowasa ja’ pala’-colla’
Seksana paggun epakatela’
4) Apowasa ja’ pabang-tobang
Dusa ganjaran teggu’ bang-sebang
5) Mon adzan Maghrib la maso’ bakto
Duli abuka reya la nanto
6) Reng apowasa sanget otama
Duwa e buka ekatarema
7) Esa’ pas terros ka atarabi
Jareya lampa se dhari nabi
8) Ja’ atokaran bannya’na raka’at
Pajuntrong ate tandhana ta’at
9) Terros adarus malem odhi’i
Bakte asokkor la etandhai
10) Asaor reya olle baraka
Jaga asaor mara ja’ sengka
11) Olle dhadhuwa’ kajembaranna
Menangka babales kaotama’anna
12) Settong abuka rassa kobassa
Dhuwa’ apanggi so Se Kobasa
Sampang, 4 Ramadan 1439 H
…………………………………………
Ta’Ambu Kerrong
dha’ ka dika
ate bula tagantong
nyamana paggun ngalattong neng e tong-antong
robana lako ngalemba’
kadhang agella’
otaba akoba’
bula nyandhar
dika nyander e dhalem pekker
se lako kabater
……………….
Bulan se Ta’ Paraban
roba ta’ onggu paddhang sabab bulan buru nyarandhang
compet are compet ate
elang barna se pote
paraban ngamera ngabiru apagar neng e pakdhangdhang
are se compet abaliya pole
romasa kasta amarga bulan la ta’ samporna
caja se epatoro’ are ka bulan la ta’ majarna’
petteng
elang barna se pote
langnge’ aseba’
sebbak
bintang lep-kellebban ngetek e budhina ondhem se eyabbat angen
…………………………
Alumnus STKIP PGRI Sumenep
