Tongngebban
ba’na lagguna kodu senneng sabab badha sengko’ se amaen nyambiya palotan, geddhang, lemper, ban nase’ se tadha’ juko’na
alasanna sengko’ settong, iya areya mabunga’a atena ba’na
sello’ se ebagi reya angguyagi, bariya keya kalambi ban dhung-kodhungnga
sengko’ ngantosa sadhumalem giliranna ba’na, Le’, se amaena ka romana sengko’
gun settong se epenta’a cokop seyom astana reng towana sengko’ tongngebban jajan rassa tadhe’ parlona
bila ba’na etangale mesem nyambi le-olle raddinna robana.
Songennep, 2017
……………….
Manca’
Toju’
Asela
Along-polong
Maelang ate rekong
Petteng ondhemma ngagarendhem
Tape mata ta’ bisa meddem
Ngaedhing monyena gendhang, saronen, kalenengan, se ngalecer daddi gendhingan.
Tatenggun manca’
Ekenca’ sepa’
Ngakan seppet ban belling
Agibe garingging
Baringbing
Gariming
Tatenggun manca’
Akenca’-kenca’, alonca’, atokar ja’-gaja’an, etabbui gendhingan
Akantha nase’ jagung
Ekowae gangan maronggi, nyarepsep ke bun-embunan.
Songennep, 2017
…………………………
Ojung
Panas kolot
Saleng peccot
Akolecet beddeng
Ngalembek dhara sagara
Dhuuuu…
Pelles peddi lakar sake’
Padha meccot saleng kae’
Songennep, 2017
…………………………….
Kerraban Sape
Panas ojan ta’ daddi masala poko’ sape ekarassa nyaman buruna
rekeng paggun nyakse’e ngalecerra barnana dhara
Saronen amonye tandhana sape elolosa ka panassa
Tandha’ se ngejung nandang meltas salendhang ta’ enga’ ka bajang
Abu se ngabber, gungseng se amonye, asorak ngabessagi tengka’ ban santa’na buruna sape
Panas talebat panas apellowan ta’ ekarassa ngabassagi bernana tandhu’na sape se ajalan e adha’anna mata
Sossa tadha’ sossa
Ngabas kerraban sape Madura.
Gapura, 2017
………………………..
Ojan
Petteng
Ondhem
Akanca ojan,
Alebun e bubungan-bubungan
Adaddiyagi badan gumigil
Kelap manjilat ngatappor
Ngenep, tedhung asapo’ e dhalem dhapor.
: Nyepta cellep abantal seppe
Nyepta seppe, ban gumigil ta’ re-mare.
Bungduwak, 2017
……………………….
Dika Ta’ Ngarte
Alif ba’ ta’ tsa’ jim se ebaca cora’na gun coma daddi bang-sabang ekebbet angen bay-kerbayan majareppen mata
Dika ta’ ngarte
Bula se ngarassae peddina ate
Anape, anape dhuuu anape?
Sabellunna mongkar are dika pon pajat daddi tera’na pajjar se agantong e dhalem ate lebbi pa’polo are
Tape dika paggun ta’ ngarte
Ma’ pole dika nyale, maskena nyopae paggun ekancae
Dika gasek malendhem
Bula paggun agella’
Sabab sadhumalem cora’ badha’ah ojan keng tada’ ondhem.
Bungduwak, 18 Juli 2017
……………….
Alajar ka Jakarta
Laggu se cekka’ paka’ arangka’-rangka’ nete jalan se teppa’
Soko reya ajauwi saebu kajuwan
Ajalana entara ka tojjuwan
Emma’ tao..
Ja’ sengko’ reya nompa’a lorong, alandhu’a jalan mangkada ngoker gunong
Ma’, abdina neteba Polo Madura e dhalem salera
Emma’ tao..
Gella’ gu-laggu ana’na se amet alaban panas ojan ondhem kadhang kalesma’an ecapo’ ngerbungnga tana
Adina ro’omma gangan maronggi se badha e roma.
Songennep, 2017
………………………….
Elang
Elangnga en-maenan lamba’
Agili elang eanyo’ omba’
Leburan nan-maenan HP.
Elangnga la’-gila’an
Bur-temburan
Tek-keteggan
Gaseng
Tolop
Bannya’ se ellop ecapo’ lolop.
Songennep, 2017
………………………..
*)Lahir pada 05 Februari 1995. Aktif di Perkumpulan Dispensasi Gat’s (Gapura Timur Solidarity), Fok@da (Forum Komunikasi Alumni Al-Huda) serta di kajian sastra dan Teater Kosong Bungduwak.
