Anggida Amjun, Guru Sajjara tor PPKn e SMA 3 Annuqayah tor MTs 1 Putri Annuqayah.
KAULA ta’ buru narema kabar dhari Mad Hamid. Asabab Mad Meskan gi’ e pondhuk orengnga mulu’.
Ma’ pas daddiya tokang tepo, nemmo obang e tengnga jalan, langsung epondhut tor eomommagi dha’ sadaja santre, tako’ ame’ kaagungnganna santre.
Oneng jugan nemmo sandhal salaja, Mad Meskan aburu dha’ emmik se badha e kantor pasantren, laju apareng pangongoman dha’ sadaja santre me’ pola sandhalla badha se elang salaja.
Poko’na kaula ta’ manggi cellana Mad Meskan, ponapa pole olle kabar dhari Mad Hamid, ja’ salerana Mad Meskan daddi tokang tepo. Kaula acaca kadibi’ e dhalem ate, ”Ta’ mongkin daddi tokang tepo!”
Amarga penasaran, kaula nyellang dha’ compo’na Mad Hamid se badha e Disa Monce’ Tengnga.
Ella’ dhari kaula e Disa Kotabang Lao’ coma lema kilometer.
Ta’ jau, namong kabadha’an cuaca se panas ta’ kappra, kadi ajalan dha’ tojjuwan se lebbi jau. Ngalkal katon otek.
Kaula lakar ta’ biyasa petanya kabar dhari WA manabi cokop parlo tor ta’ jellas.
Melana kadu eentare dha’ Hamid se madhapa’ kabar ja’ Mad Meskan aoba tengka e bakto tatemmo e Pasar Gandhing.
”Ba’na olle kabar dhari dhimma, Mid?” Ca’epon kaula se lastarena dhapa’ tor ngaso e compo’na Hamid.
”Masa’ ba’na ta’ ngedhing kabar onggu?” Mad Hamid mabalik petanya.
”Mangkana, sengko’ sampe’ nyellang dha’ bungkona ba’na reya, lakar terro masteyagina kabar se dhari ba’na bakto tatemmo e Pasar Ganding rowa.”
”Areya sengko’ lakar acareta apa badhana, Jun,” ca’epon Mad Hamid dha’ kaula, ”Sengko’ polana la ecapo’ tepo dibi’ Rp 3 juta.
Mad Fajrul, kanca kamar pondhugga sengko’ lamba’ padha ecapo’ Rp 4 juta. Mad Mujib, se sakamar ban Mad Jefri, padha la ecapo’ Rp 2 juta.
Pas kanca kamarra ba’na se anyama Mad Nabil lamba’, padha ecapo’ tepo Rp 6 juta.
Se jat lakar ta’ kera parcaja ba’na, Mad Habib ecapo’ sampe’ Rp 40 juta. Areya banne kabar angen pole, Jun,”
”Ya Allah. Guste Pangeran,” ca’epon kaula sambi nodhu sakeng takerjadda, ”Ma’ bisa, ya Mid?”
”Iya lakar. Sengko’ padha ban ba’na. Ma’ mangga Mad Meskan andhi’ tengka ban batek se nyalenda dhari pabulanganna keyae lamba’.
Sengko’ gun angen-bangen e dhalem ate, ma’ bisa kanca dibi’ lamba’ sateya daddi tokang tepo.”
”Mid, me’ banne nepowa ca-kancana jareya. Ba’na la nalektegi baramma careta se agalluwi tengka juba’na Mad Meskan?” Kaula atanya pole dha’ Mad Hamid.
”Tako’ lakar badha kaberra’an se talebat raja, saenggana rowa posang. Ame’ andhi’ otang otaba etepo oreng laen.”
”Sengko’ ta’ bannya’ nalektegi kabadha’anna Mad Meskan semarena mondhuk. Gun se tao, rowa daddi pengosaha, andhi’ toko, ban dagangan se bisa e jual dha’ lowar nagari. Jiyah se sengko’ tao.”
*
Kaula sareng Mad Meskan ale’ kaka’ angkatan e pondhuk. Kaula nyebut ale’ karana lebbi towa.
Tengka gulina Mad Meskan samangken daddi pekkeran kaula juga.
Asabab lakar ta’ maso’ e pekkeran kaula, ponapa onggunna ma’ pas samangken daddi tokang tepo.
Kaula ongguna tako’ se nyebbuda ja’ ka’essa’ seggut nepo oreng tor ca-kancana.
Polana sebbudan ganeka daddi rosakka tengka guli se lamba’ eajum e pondhuk sareng keyae. Ta’ mangga kaula nyebut tokang tepo.
Tape, saellana Mad Hamid acareta lanjang kalaban kabadha’anna Mad Meskan, kaula daddi narema jugan sebbuddan nalangsa ganeka.
Mad Hamid sareng ca-kancana se ecapo’ enjam obangnga, ampon ta’ etemmo sanapa kalena se nagi.
Nagi kalaban WA, nagi kalaban entar dibi’ dha’ compo’na Mad Meskan, nagi kalaban parsemmon dha’ rajina tor tagiyan-tagiyan laenna.
Tagiyan-tagiyan ganeka gun olle janji bulan dhateng. Sampe’ dha’ bulanna tadha’ napa.
Eentare pole, ajanji pole bulan dhateng. Dhapa’ dha’ bulanna tadha’ napa pole sampe’ samangken ampon olle dhutaon.
Kaula saongguna padha etelpon sareng Mad Meskan dhutaon se tapongkor.
Tape, asabab kaula lakar ta’ gadhuwan obang se eenjama se banya’na Rp 5 juta, burung se ecapo’ tepowa.
Namong kaula bakto ganeka ta’ curiga sakonco’ obu’ balakka’, polana tengka gulina Mad Meskan bakto e pondhuk oreng bagus.
Toman daddi pangurus pasantren, toman juga eparcaja daddi tokang morok ngaji dha’ santre. Se daddi ta’ parcajana pole, ka’essa’ daddi guru e sakola’an pasantren.
*
”Mid, ayu entare pole ban sengko dha’ romana Mad Meskan,” kaula ngajak dha’ Hamid dhari pesan WA.
”Dhu, apa’a, Jun? Din dhapa’ gun janji se ta’ paste,” ca’epon Mad Hamid males.
”Sateya ban sengko’. Sapa tao atena Mad Meskan tabukka’ pas majar otang-otang dha’ kanca pondhuk se laen,”
”Iya, maju. Antos e Somber Penang ya. Ta’ usa ngeba kendhara’an laen ba’na.”
”Sip, ayu.”
Romana Mad Meskan badha e Disa Korang Polay, Mekkasan. Ella’na dhari Disa Kotabang Lao’ korang lebbi sagame’ kilometer.
Ontong, Mad Hamid andhi’ motor saenggana aba’ ta’ pate panas. Apapole motorra Mad Hamid ngalesser dhari AC.
Sangaja lakar, kaula tor Mad Hamid ta’ apareng kabar ja’ meyosa dha’ compo’na Mad Meskan.
Tako’ me’ pas maelang dhari romana. Tako’ badha alasan se edha-pabadha. Kalaban ngombarra kaula tor Mad Hamid se sakeddeban mata, tento Mad Meskan ta’ bisa acem-macem.
”Assalamualaikum,” kaula ngolok salam saellana ampon dhapa’.
Kaula tor Mad Hamid getton, katon compo’na Mad Meskan tadha’ orengnga. Kaula nyoba’ ngolok salam pole kalaban lebbi renyeng.
Sampe’ tello kale, tadha’ jawaban dhari dhalem. Labangnga lakar ekunci, taneyanna la rombu kalaban otembuwi lalang tor sarka.
”Dha’emma Mad Meskan reya?” ca’epon Mad Hamid.
”Jareyanna. Maju, Mid. Atanya dha’ compo’ se badha e dhaja’anna roma reya,” kaula ngajak Mad Hamid.
Salastarena ngolok salam e compo apagar biru korang lebbi 10 meter dhari compo’na Mad Meskan, kalowar oreng lake’ seppo sabitaran omor sabidak taon.
”Pa’,” ca’epon Mad Hamid dha’ oreng seppo kasebbut.
”Enggi, Cong. Badha napa?” Ca’epon oreng seppo ganeka.
”Compo’ e lao’na paneka orengnga ka ka’dhimma, enggi?”
”Ba, napa sampeyan ta’ mereng kabar enggi, Cong?”
”Kabar ponapa, Pa’?”
”Cong Meskan pon olle tello bulan etangkep polisi, Cong.”
”Etangkep polisi, Pa’?”
”Enggi, Cong.”
”Rajina sareng pottrana ka ka’emma?”
”Mole, Cong, dha’ disana dibi.”
”Ya, Allah…!” kaula tor Mad Hamid abareng nyebbut asmana Pangeran.
*
Ropana, Mad Meskan masok penjara e Panglegur asabab elaporragi sareng oreng laen kalaban sangka’an nepo obang kisaran Rp 400 juta.
Kaula tor Mad Hamid agarabas aeng mata mereng careta oreng seppo paneka, tor ngoladi kaodhi’anna Mad Meskan se lebbi marajai terro tembang buto.
”Pangaterrowan lakar tadha’ batessa,” ca’epon orang seppo se daddi tatanggana Mad Meskan sambi agarabas aeng mata jugan.
”Enggi, Pa’. Lerres dhabuwepon ajunan,” pongkas kaula. (*)
Annuqayah, 12/09/2025
Editor : Amin Basiri