Sampan Dadinggalanna Eppa’

BAKTO omor ballung taonan, sengko’ gasek eajak eppa’ ka tase’. Eajari manceng juko’, sampe’ mega’ odhang. Eppa’na sengko’ lebur majang e tase’, mon caretana eppa’ sabellunna tadha’ omor ngoca’ akantha reya e penggir tase’ sambi manceng.

”Cong, omba’ reya taretanna sengko’ ban ba’na. Senga’, jaga!”

Ngedhing oca’na eppa’, sengko’ gun aonggu’. Sabab bakto jareya, sengko’ gi’ korang ngarte. Eppa’ ta’ andi’ saba, mon dhapa’ ka mosem namen, ya eppa’ gun ngala’ parowan, kadhang parowan e tana catona kalebunna. Kadhang ban tatangga se lakena tadha’ omor. Tape, saellana sengko’ aomor lema bellas taon, ta’ eka-sangka, tang eppa’ tadha’ omor, sakabbinna se badha e tase’ gun daddi careta, omba’ se biyasana nampes-nyedding ka sokona sengko’ ban eppa’, sateya gun daddi kerrong paleng kamarong.

Pan-barampan kale emma’ elamar, ekabineya tape paggun ta’ endha’, emma’ nola’ kalaban alos, abala ja’ gi’ maraja’a sengko’ kadibi’. Se ekagetton sengko’, badha settong reng lake’ maske toman etola’ tape gi’ paggun ta’ bu-ambu entar ka bengko. Mon ca’na lalake’ jareya bajing e disana sengko’, tape sengko’ bakto jareya ta’ tao.

Settong are, emma’ engeba’agi wa’-buwa’an mon lalake’ jareya. Se ekamengnga’ sengko’, samenggu dhari jareya, emma’ elamar, pas endha’. Apa emma’ la edhukonnagi? Sengko’ gun bisa ngangen.

Sajjegga emma’ alake pole, eppa’ se anyar otaba mon e bengko ekoca’ eppa’ kaballun, andhi’ tareka se ta’ ekasennenge sengko’. Settong sampan se erabat-eopene molae lamba’, se daddi jalan nyare rajekkena eppa’, ejuwala ka jaraganna sampan. Sengko’ ta’ narema mon sampan sampe’ ejuwal ban ekaandhi’ oreng laen. E bakto eppa’ anyar kalowar dhari bengko, sengko’ nyander ka emma’.

”Ma’, ba’ bendherra sampan dadinggalanna eppa’ garowa ejuwala?” tanya sengko’ ka emma’.

”Iya, arapa keng?” jawabba emma’.

”Tore ker-pekker pole, gun sampan garowa dadinggalanna eppa’. Sampan garowa agandhu’ bannya’ careta monggu kaula sareng eppa’. Sampan garowa pon eanggep jimat,” oca’na sengko’ kalaban mowa bellas.

”Eppa’na ba’na se sateya ta’ lebur majang, egabaya apa keya?” Emma’ ngoca’ sambi apet-leppet kalambi.

”Kan gi’ badha kaula?” ngedhing oca’na sengko’ gi’ buru rowa, emma’ ambu se apet-leppet, pas mandeng tajem ka sengko’.

”Ba’na sateya baktona ajar, ta’ usa rus-urusan jareya,” oca’na emma’ ka sengko’.

***

Apa se ekarekong sengko’ kadaddiyan onggu. Sampan dadinggalanna eppa’ la paju ka oreng laen. Sengko’ buru ka koburanna eppa’. Acareta sakabbinna parkara se mapanas dhadha. Sengko’ ta’ tao, apa se bakal kadaddiyan saellana sampan mare ejuwal. Sengko’ coma’ tako’ bakto se gi’ ta’ elebadi nyempen tareka lebbi peddhi.

Sabulan saellana sengko’ totok asakola aliyah, emma’ ban eppa’ kaballun etemmo ngoca’ ka sengko’, ja’ dhalem bakto ta’ abit laggi’ bakal mangkat alako ka kottha. Mon serrona, odhi’ e disa raket gallu’ badha apa daddi poleyan. Ja’ molae lamba’, eppa’ ta’ bannya’ aserro alako apa badhana, pas eppa’ se anyar polana badha reng kapateyan otaba badha oreng andhi’ parlo akantha; karja, momole ban gabay laenna se kodu entar, ngeba berras otaba pesse, daddi serrona ta’ re-mare.

”Dina ba’na ekeremana pesse ta’ kera epakorang,” oca’na emma’ pos-ngapose, saongguna dhalem atena sengko’ ngoca’, ja’ kabunga’an ta’ gun polana ta’ kakorangan pesse, kadhang apolong genna’ sabala maske ngakan nase’ jagung ajuko’ cabbi kalaban buja, bisa adaddiyagi bunga tadha’ padha.

***

Ca’na sengko’, emma’ me’ ngerema pesse onggu ka sengko’. Tape sampe’ sateya etos-antos paggun tadha’ kabarra. Sabab se ataneya sengko’ ta’ andhi’ saba, akherra sengko’ noro’ Nom Ahmad, kancana eppa’ bakto gi’ majang ka tase’.

Dhari jareya sengko’ buru tao, ja’ majang banne kalakowan gampang, mon ngabas ka baba rassana se paddhang koburan. Laen pole ban cellep-gumegil se barata e badan. Tape kalaban asango tekat ban sabbar, sengko’ bisa narema kabadha’an se accen akantha sateya.

Majang e attas sampan sateya bannya’ edina monggu ngangodhadan otaba maske oreng-oreng e penggir serengnga dibi’. Oreng-oreng la bannya’ mangkat ka kottha, nyare rajekke lebat kalakowan dhammang, akantha ajaga barung ban en-laenna. E dhalem ngangen, sengko’ ngarep, ga-mogana e budhi are, lowas tase’ reya agambarragi lowas rajekkena sengko’.

”Pa’, ta’ anapa kabadha’an samangken nantang kaula, poko’ kaula bunga nerrossagi kalakowanna sampeyan,” karettek atena sengko’, sampe’ ta’ ekarassa aeng mata nompa.

”Pa’, kaula kerrong bakto sampeyan ban emma’ gi’ apolong. Nangeng, emma’ samangken ampon aoba. Saamponna alake pole, kaula pas edina nyengga,” sengko’ ngardhang e tengnga tase’ sabellunna sampan dhapa’ ka dara’. (*)

Gondokusuman, 2023

*)Laher e Topote, 17 Mei. Mahasiswa Aqidah Filsafat Islam UIN Sunan Kalijaga, Jogjakarta. Tolesan basa Madurana ngombar e pan-barampan sorat kabar.

Baca artikel dan berita menarik dari RadarMadura.id lainnya di Google News