Baddiyanna ¼

SAPARAPAT! Buh bula caremmet onggu. Anape ma’ ta’ lamba’ abala, ja’ ¼ neko saparapat otaba 250. Ja’ senga bula ta’ ajaga barung ka Jakarta enggi tolos bula ta’ tao ka saparapat (¼) ganeko.

Lamba’ bakto ajar tong-bitongan, enggi pangajaran matematika, bula ta’ ngarte sakale, padhana ¼ + ¼ = ½. Enggi gun apeddel dibi’ pekkeran, dhu baramma carana, ma’ bisa empa’ tamba empa’ pas daddi dhuwa’, nape pole guru lamba’ ngoca’ pembilang, pembagi, enggi sajan aoleng pera’. Bula pon makerso’ dhai, ales, mapeceng mata, enggi se nyamana ta’ ngarte paggun ta’ ngarte. Enggi sanonto, mon nembang tellor saparapat, enggi 250 laju pon, bila pon ngangguy tembangan digital nape ca’na. Bula gun lulusan aliya, se akuliya’a pon ta’ andhi’ pesse.

Sanonto bula badha dhalem bis, moleya ka Madura. Pon para’ pa’bulan ajaga barung, bula gun eajak mon bala, polana gi’ ta’ abine. Lorong e dhinto lenye onggu, ngolesnyeng, ngonyas, ngeddhap. Adha’ baliker ber-ngaber sakale, senga lorong-lorong, jalan-jalan e seddi’na roma enga’ neko keya, tanto nyaman, ngasiyut, tanto na’-kana’ se saomoran ban bula, enggi nompa’ sapedha motor but-kebbudan. Temmo ta’ bannya’ na’-kana’ labu, birsek, tabra’an. Tape e Jakarta, laju tadha’ pegga’na motor sakale, sapedha motor ta’ bu-ambu sakale. Getton, laju tadha’ oreng tedhung sakale. Gaggarra bula ban bareng, enggi giliran tedhung, tape enggi paggun pojuk. Nyamana oreng ajaga barung.

Dhari dhalem bis, bas-abasan ka lowar, polana gi ta’ tedhung. Tape mon taleyer, enggi ngeddha pera’. Nyamana bai taleyer, enggi ngeddha, paleng gun amempe. Bula ajaga barung, lakar polana terro onggu ka pesse, senga ta’ terro ka pesse, dhu napena. Ta’ kose mabire mata. Bali’ tedhunga e roma. Enggi aneko jur-jujuran. E roma, tadha’ kalakowan, ban todhus se alakowa neko-neko, polana gi’ na’-kana’. Kadhang polana na’-kana’, pas ekamenco, polana na’-kana’ alandhu’ ekamenco. Enggi ta’ laten. Enggi kateppadan badha embu’ se melleya berras, maske bula ta’ tao, nape ollena aotang, nape melle berras garowa.

Bakto bula ajaga barung, kadhang badha bai se aotanga berras, aotanga mennya’, aotanga tellor sanajjan sabigi. Badhana se sabban are, melle kecap se gun 500 ropeya, badha se melle biksin se gun 500 ropeya, enggi etanenge, sajjana ekoca’a, sajjana… ja’ padha pesse keya. Tape se bula getton ma’ tadha’ artis le-melle sakale, ca’na barengnga bula, edhinto neko semma’ ka TV, bula se la semma’, ta’ tao nenggu ka dhalem TV, gun-paggun nenggu e TV, TV se bisa eba-oba lebat remot.

TV nape pon, bilanna rowa kanca abala. Sampe’ para’ pa’bulanan neko, adha’ artis le-melle sakale. Padhana artis se kadhang matabar shampo, otaba artis se matabar sabun, soklin, rinso, tadha’ melle, enggi garowa iklan wa. Gun oreng esoro melle, ba’ dibi’na ta’ melle. nyamanna dibi’. oreng nompa’ motor (mobil) laju ta’-santa’ e dhiya, enggi sela lorongnga nyaman cara neko. Ma’ tadha’ oreng nompa’ sapedha motor onggu, lebat dhimma sapedha motor? O enggi onggu aneka lakar jalan khusus motor (jalan tol), sapedha motor lakar ta’ ebagi maso’.

Aneko saebbis, oreng moleya dhari Jakarta’an kabbi. Katon mole dhari ajaga barung kabbi, sengka bula se acaca’a. Aneko bai saebbis possa’, sabban teppa’ mangkada, tello bis, sabarengngan ban bula, possa’ keya, mangkat ka Jakarta’an. Enggi ajaga’a barung. Enggi banne gun ajaga. Barang-barang se lakar masthena ejuwal enggi ejuwal. Enten, banne gun ajaga. Manna esangka gun ajaga malolo. Polana ngoca’ ajaga, laju ta’ ajuwal roko’, ta’ ajuwal enoman.

”Beli rokok, Mas.”

”Maaf, Mas! gak dijual. Kami hanya menjaga.” (Saporana, Mas, (roko’) ta’ ejuwal. Aba’ coma ajaga (barungnga).” banne nga’ garowa. Dhaggi’ gun esanggu ajaga malolo. Enggi ajaga, sopaja barang-barang dagangan ta’ elang, enggi ejuwal pole, enangga’agi, banne kulkas, banne rak-etalase se ejuwal. Ajuwal sembako na poko’na. Pera’ bila tengnga malem, se mangmang, tako’ badha kaelangan, polana ta’ neng badha pesse ber-ngaber. Enggi elang onggu.

Areya la dhapa’ dha’emmma kana’? Teppa’ areya nojju ka temor yaaa? Senga’ la ebuwang ka garogut. Ma’ marenges. ta’ tao lam-alaman sakale. Kadhang gun badha baca’an rest area KM 2023, otaba rest area KM 1445 ban laen samacemma. Ja’ aba’ taona lan-jalanan gun Pamekasan, Sorbaja bai ta’ tao sakale.

Mon dhaggi’ pas ebuwang (epatoron) tengnga lorong, ya gun padhana anggu’ ta’ epece’. Anganga-nganga. Maske andhi’ HP nelpona sapa. Nelpona oreng towa jau. Mon gun epatoron teppa’na nojju ka Madura, apana pole, la dhapa’ ka Madura, mesal Bangkalan, gi’ pendhanan, mon epatoron e tengnga’anna Jakarta, se dhimma alamma ta’ ekataowe sakale. Nelpona sapa. Nelpona oreng se andhi’ toko, ja’ kadhang badha e Tangerang ban laen samacemma. Gila onggu lakar.

Sabban badha oreng ca’-ngoca’e ba’-aba’an polana ajaga barung, ca’na ekoca’e bu’-mabu’an. Ma’ badha oreng ajaga barung bu’-mabu’an, ja’ gun ajaga barung, ban sambi bu’-mabu’an haram. Ganeko bula nemmo neng Fesbuk, ca’na ”Masyarakat Madura Mabuk Toko Kelontong Madura di Jakarta.”

Teya, ba’-aba’an se alako sara, ta’ ngemmes, ta’ ta-menta ka mama’-embu’na, gi’ eca’-koca’e bu’-mabu’an. Se la badha e dhiya rang-korang tedhung, mellassagi, jau dhari reng towa, pas gi’ eca’-koca’e. Bila teya males kalaban ca’-oca’ se gerra keya, padhana ta’ ngabas matana ya, bila pekkeran bucco’ ya cara jareya jat. Gun tao se acolo’a, ta’ tao sake’na ate. Embi’ gigina pote.

Ta’ ekarassa onggu la dhapa ka Suramadu, galadhak se lebat e attasanna tase’. Ella penter onggu se agabay. Lamba’ adha’ oreng agabay galadhak e attasanna tase’, tape sateya, maske lanjang, paggun bisa. Oreng Bara’ ta’ mekkere se abastowa taretanna, mon badha oreng alako reya, ta’ eca’-koca’e. Badha oreng alako barung, ta’ ekoca’e mabu’ ban samacemma. Ya ella maju. E dhinna’, polana ajaga barung etoronnagi ka na’potona la ekoca’ gaseng, gun aenter-enter, aoleng, alenteng, aleyer, ya pojur ta’ meledak bomma. Ta’ laten!!!

Lekkas onggu sateya nompa’ bis dhari Jakarta ka Madura. Bis reya ta’ maongga matoron panumpang, saengga sajan lekkas. Ta’ ambu, ajalan, ambu, ajalan pole.  Maske e Madura gun ta’ bu-ambuwan. Nyaman. Lekkas dhapa’. E Madura jalanna ta’ ngolesnyeng, ta’ ngonyas padhana e Jaba, enggi padhana se agundhal. Padhana se nompa’ sampan. Enggi badha keya se bagus.

La dhapa’ ka terminal. Toron. Nelpon oreng roma gallu. Polana bak rembit. (*)

Gung Podhi, Ahad Manes, 2 Molot 1445 H

*)Ngorenge www.lalampan.com

 Baca artikel dan berita menarik dari RadarMadura.id lainnya di Google News