KAULA ta’ oneng dhari ka’emma careta neka kodu emolae. Se jellas ra-kera taon 2007, kaula pon biyasa tapanggi kalaban Jawa Pos, kong-langkong Radar Madura. Taon ganeka kaula badha e Gappora. Ngampong odhi’ e settong kennengngan. Bila asakola, kaula lako entar ka ra’na buku, nyare buku-buku dungngeng, nyare buku basa Indonesia se bannya’ cerpenna, puisina. Kaula dibi’ ta’ ngarte, anapa ma’ bisa lebur.
Serrena korang baca’an, kaula nyare korran. E adha’na kantor Kacamadan Gappora neka badha oreng Jaba, rassaepon Solo, adagang bakso ban mi. Mola-mola kaula messen mi ayam, pas ngenjam koranna kaangguy ebaca. Manabi are-are biyasa, akadiya Senin, Salasa, Rebbu, Kemmes, Juma’at, ban Sabto, kaula maca opini. Bila are Ahad kaula maca cerpen, puisi se badha e Jawa pos, otaba se badha e Radar Madura.
Dagangnga mei-bakso ganeka paleng pettong atos meter dhari kennenganna kaula. Dhari ka’dhissa kaula nyambi sapedha. Ka budhi-budhi kaula ta’ melle bakso, cokop messen es te. Manabi ta’ kalero taon 2007 argana es te neka saebu. Melle es te, maca koran Jawa Pos Radar Madura. Ka dagangnga ganeka keya, kaula biyasa menta korran se badha kolom sastrana otamaepon kolom cerpen sareng puisi.
Mela dhari gapaneka kaula ta’ nyangka ja’ molae 2015, tolesanna kaula jugan badhi epakalowar otaba epaterbi’ sareng Radar Madura. Kalaban tolesan carpan abasa Madura kalaban abul-ombul Embi’ Celleng Ji Monentar tanggal 26 Juli 2015. Bakto ganeka katepaddan sa’-powasa’an tor badan kaula badha e roma. Kaula messen korran ka taretan sapopo, se pajat biyasa entar ka Kottha Songennep karana adagang gula (tarebung).
Mare asar, kaula ngone’e koran Radar Madura ganeka ka embuk e jalau’. Mereng ana’na maso’ Koran, embu’ ce’ bungana. Na’-kana’ se lamba’ kellas lema’ ta’ ealle bisa keya noles careta pandha’ (carpan) basa Madura ban maso’ ka korran Radar Madura. Manggana esonsona dhari sakeng bungana.
Kalaban badhana Radar Madura, samangken kaula ampon andhi’ dhuwa’ buku, se kabannya’an emuat e Radar Madura. Abul-ombul Embi’ Celleng Ji Monentar (2016) tor Kerrong ka Omba’ (2019). Mator sakalangkong, Radar Madura.
MAT TOYU
Pangarang sastra Madura
