Angen Ngemban Rassa
E dhadhana bula angen ngemban rassa
Se aramo’ abudhu’ kasta
Namong bungkana ekasossa
Amarga dhurina robana dika
Le’, ja’ daddi rengnge’
Ngenom dhara karebba dibi’
Ta’ mekkere se epasake’
Poko’ aba’na odhi’
Taresna banne gula
Se manes dhalem jila
Tape parkara se magetton
Akantha dhaun se ngalotor.
Battangan, 2023
…………………………
Sanja’ Ngalengsang
Sanja’na bula ngalengsang
E konco’na ate se posang
Dika paddhang akantha seyang
Mabacca taresna se pon elang
Dhaun se ekerbay angen se enga’ dika
Lemmes pagulina, tape gampang paeloppa
E settong tareka cacana dika
”Ka’, bintang e langnge’ ta’ kenneng bitong
Padha ban robana dika se makerrong”
Ganiko padhana ola’ bulu
Se mameyang sabban pajjar laggu
Battangan, 2023
…………………………
Nyapowe Ate
Banne tase’ se dhalem
Bali’ dika kalaban mesem
Banne somor se mangangsor
Bali’ dika compet omor
E rop-sorop are
Bula neyat nyapowe ate
Tape, robana dika akantha pako
Se ancep e dhadha neko
Aksara bula anggi’
Epanyanggerra’a nespa se gi’ anganga
Nurul Jalil, 2023
…………………………
Taresna se Mella’
Aeng mata todhus dha’ loka
Aerrem marangka’ nespa
Sanja’ neko lembayya dika
Narabas dhadha makorpas kasta
Masa’ dika ta’ ngarassa
Kembang se etamen bula
Sanonto pon genna’ ban gettana
Battangan, Oktober, 2023
…………………………
Janji se Ngalemes
Saongguna bula andhi’ pangara
Bakal mella’ nyeyom kembang pepena dika
Tape bula odhi’ dhalem mempe
Se mabingong tor sakte
E naleka omba’ ngamba’ angen
Se ngombar robana pornama
Ongguna dika, Le’, e dhalemma
Se ngalemes dha’ janjina
Battangan, 2023
…………………………
Talka
Malem sajan karem
Magumigil ate se kasemsem
Talka onggu talka
Sabab du’a nabuy aeng mata
”Le’, ate bula banne dhaunna tales
Se gampang loppa kalaban sakabbiyanna aeng”
Bula terro dika meddem
Kalaban ceccerra getta se epergem
Otaba bula se nyellemma
Agiba’a dhaunna mempe se pon bacca
Battangan, 2023
…………………………
Ngocernang
Sagara se agulung bannya’ nyaba
Amoy-tamoyan kalaban bula
Omba’na nyapo’e beddhi se pote
Sake’na ban celleppa e talampo’anna ate
Amarga bula enga’, Le’
Ja’ parao se pon alajar e adha’na mata
Aropa dika ban mesemma
Bula mandeng baliker
E tase’ sambi’ mekker
Ongguna dika talebat ngocernang
Saengga bula loppa dha’ bato karang
Se bisa maloka tor makombi’ taresna
Angen ko’-nongko’ e dhaunna parse
Ngamba’ bulan abali pole
Samoga’a paste se ta’ atale
Meddek dhalem mempe
Battangan, 2023
…………………………
*)Samangken Zakil Asror kellas akher MA Nasy’atul Mutaallimin Gappora Temor. Aktif e Sanggar Biru Laut.
Baca artikel dan berita menarik dari RadarMadura.id lainnya di Google News
Editor : Hera Marylia Damayanti