Oleh AGUS WIDIEY
Odhi’ ta’ maca, mate tadha’ sangona
RadarMadura.id – Okara becce’ ka’dhinto gasek epeyatoragi sareng Lukman Hakim AG, lalake’ parjuga se lebur ngopene basa Madura. Ta’ bisa kaula nola’ otaba ta’ endha’ dha’ka sen-pessen se agandhu’ babulangan ce’ saena. Sabab, sala settong cara kaangguy matombu pekkeran otaba malorju’ napa bai dhalem kaodhi’an paneka, gi kodu bannya’ maca.
Kabudhaja’an maca ampon bannya’ eanggep bisa madaddi majuna bangsa. Tape, anapa ma’ gi’ bannya’ se ta’ dujan maca? Maske se ekoca’ maca bannya’ macemma tor bannya’ jalanna, tantona salaen ketab socce, buku aropa’agi somberra elmo paleng genna’. Bi-lebbi se andhi’ pangaterro daddi tokang ngarang, maca aropa’agi jalan nomer settong, sabatara mekker aropa’agi jalan nomer dhuwa’ se ta’ bisa edina. Kaleburan e dhalem maca, ce’ parlona onggu (e)estowagi, manabi kaula olle ngoca’ dhalem anggidan ka’dhinto; kodu dulluwagi maca etembang nolessa. Artena, maca gallu palastare, buru noles pasae.
Abali pole dha’ parkara maca, saongguna maca daddi dhu-landhu otaba buthok kaangguy matombu pekkeran se kajal. Melana, kadhang gi’ bannya’ petanyana tokang ngarang, akantha; baramma pekkeran se terrossa agili (ta’ tasombet) e bakto noles? Petanya akantha ka’dhinto paneka, kadhang esababbagi polana korangnga maca, bisa jugan –kadhang korangnga lateyan. Manabi etalekthegi lebbi dhalem pole, maca bisa aberri’ –nyombang pangataowan, malowas jalan pekkeran se cope’, sampe’ bisa maodhi’ otek se ampon para’ kerrenga.
Metthek dhari sorat kabar Kompas, UNESCO nyathet, dhari saebu oreng e tana manca, pera’ settong oreng se lebur maca. Ganeka daddi tandha, ja’ pangaleburan dhalem maca gi’ kene’ parana. Parkara korang lebur maca, banne parkara anyar pole, artena ampon daddi parkara kona. Kadhang oneng ja’ maca neka parlo, tape polana ta’ biyasa, akherra maca ta’ elakone. Sabatara maca banne gun sakadar maca, kodu ngarte dha’ napa se ebaca. Manabi badha oreng se ajajuluk kotona buku, terrossagi. Sabab daddi kotona buku e jaman samangken neka malarat. Salaen namba elmo, maca bisa jugan ngeba dha’ kabunga’an.
Daddi okara se gasek epeyatoragi sareng Lukman Hakim AG dhalem parkara maca, paneka ce’ parlona egabay kaca. Conto gampangnga bai, naleka maca Al-Qur’an, maca salawat, maste apengaro sampe’ mate. Tape, mon gi’ odhi’ ta’ lebur maca, tor bila mate ta’ andhi’ sango kabagusan, kare kastana. Melana, bendher onggu; odhi’ ta’ maca, mate tadha’ sangona.
Kaangguy mongkase anggidan paneka, kaula coma ngarep, kaleburan maca e tana manca tamba alorju’, lastarena ganeka, palebur noles pon. Ta’ anapa! (*)
Jogjakarta, 2023
*)Mahasiswa Aqidah Filsafat Islam UIN Sunan Kalijaga, Jogjakarta
Baca artikel dan berita menarik dari RadarMadura.id lainnya di Google News
Editor : Hera Marylia