Keyae Battangan I
Saamponna lajar paraona bula akerbay
Narabas serrona omba’ se galargar
Solarra aropa’agi du’ana ajunan
Sakral dhalem mempe
Kellar marobbu karangnga ate
Jau pajat bula e konco’
Ajaja polo-polo nyare juko’
Tape, jaring se eangguy bula aropa’agi aksara raja
Se eanggi’ tor eserroppagi ajunan dhalem dhadha
Saamponna manceng
Tadha’ caretana bula ta’ ngenneng
Amarga ompan se epasang
Dhari sowargana ajunan se ngocernang.
Mesir, 2025.
.........................................................
Keyae Battangan II
Keyae, bula aong-saong kerrong
Amarga abit ta’ apolong
Bula aop-raop saebu sakalangkong
Amarga sabab ajunan ngorong,
E taon se tapongkor bula coma bisa arangka’
Sanonto pon bisa berka’
Tadha’ caretana dhaun gaggar sabab ojan
Mon tadha’ angen se adhirdhar
Mostahel bula dhapa’ dha’ Messer kaangghuy ajar
Mon coma ngambuwagi kapenterran se sakebbar
Tape, angen se epergem ajunan eocol
Tongar se epasang reng seppo ebuccal
Saengga bula bisa nyosol
Ngabber dha’ kibladda elmo kalaban asokkor.
Messer, 2025.
.........................................................
Keyae Battangan III
Man ana man ana………
Man ana…….. laulakum
Aeng mata atabuyan
Margana salerana ajunan ngombar
Mata are ke’-nyaleke’ ngekke’ kole’
Tape, badan bula ta’ panas
Bali’ rassa neng ate neka se korpas
Sajarana ajunan dhalem pekker ta’ bakal caer
Sabab sanonto, kalaban tanang se kacer nontong pine
Tanang kanan nontong gulpen
E langnge’na Messer bula ngoker
Kaifama hubbukum
Kaifama ahwakum
Akantha mano’ se eobu sareng towanna
Ta’ kera loppa dha’ parentana
Akantha oto’ se salamet dhari tana
Marga esapo’e ban kole’na
Sapaneka mostahel bula bisa ngabber
Mon ta’ kalaban elmo e dhadha se ajunan pangger.
Kairo, 2025.
.........................................................
Keyae Battangan IV
Ajunan dha’ ka santre
Akadiya berse dha’ ka pote
Aeng dha’ ka socce
Pornama dha’ mata are
Tor kajembaran dha’ ka ate
Keyae, ooooh Keyae
Bula kabulana Pangeran se agandhu’ ase
Ta’ kapanasan naleka tar-kataran
Ta’ kacelleppan naleka ojan
Sabab ajunan, sabban are kobasa majunge
Lebat du’a tor sajara se ampon daddi mempe.
Kairo, 2025.
.........................................................
Keyae Battangan V
Bannya’ oreng agai’ bintang
Tape, se ekaolle coma babathang
Sabab nantang dha’ serrona
Ajunan se agandhu’ saebu mosteka
Bannya’ oreng ngarep ontong
Tape, se morka’ coma calatthong
Sabab bannya’na kajuba’an
Se nyata tor e budhiyan
Naudzubillah
Keyae, akowagi abdina santre ajunan
Maske ta’ sakabbiyanna tengka, loros akantha aros.
Messer, 2025.
.........................................................
Santre
Santre jujulugga lakona ta’ saapa
Tape molja dhu mon pangkadda
Sabban are sakabbinna se eteggu’
Kadhang gulpen, kadhang gun coma roko’ se koneng
Santre se ta’ nanggung
Dha’ elmona kodu nyambung
Sa akherra ta’ kera daddi patoguna embung.
Kairo, 2025.
.........................................................
*)Santrena Keyae Battangan, Gappora. Toman agai’ elmo tor pao e Nasa One.
Mahasiswa aktif neng Al-azhar University. Aktif e Fosgama Messer.