Nyare Elmo
Mompong gi’ pajjar pasanta’ ajar
Mabagus neyat asango sabbar
Elmo esare banne nantos gaggar
Anenggal compo’ nyare langgar
Sabab elmo aropa mosteka
Manyonar ate maloros tengka
Bila elmo ekaandhi’
Ta’ posang neng-enneng kadibi’
Sadajana daddi gampang
Odhi’ nyaman tor dhammang
Ja’ loppa ngormat ka guru
Se morok sabban laggu
Ta’ abu-ambu apareng petodu
Maelang bingong maelang budhu
Bagandan, 2017
.........................
Bakte
Are mancar dhari temor
Ros-terrosan salanjangnga omor
Atoro’ dha’ ka parentana Pengeran
Agante bakto agante jaman
Odhi’ paneka coma sakejja’
Kaangguy ibada banne agaja’
Tore jauwi parkara juba’
Sopaja daddi salametta aba’
Patako’ dha’ ka Guste
Tor ajaga gulina ate
Ja’ loppa abakte ban ngastete
Sabellunna odhi’ atemmo pate
Bagandan, 2017
.................
Kampong Taneyan
Maske aeng sagara amesa tana ban dhara
Maske jau dhari polo buja ban nangtang babaja
Tresna kaula paggun ka Madura
Tadha’ nemor tadha’ nambara’
Maske ngale somor alebate omba’
Anenggal taneyan maste ekaberra’
Seyang malem mekkere kabar
Ate kerrong ka bernana pagar
Mompong kasempatan gi’ ta’ lobar
Nekkane pangaterro kalaban sabbar
Resto ebu ban guru ekasandhang
Sopaja jalan bagus epapaddhang
Bila ekaolle tera’na pornama
Bala-tatangga nyambut tor narema
Yogyakatra, 2017
.......................
Nemor
Kare aeng mata se agili ka dhadha
Nyare aeng dhapa’ ka mordhaja
Lanjangnga nemor sabban taon ta’ padha
Ojan se ekakerrong ta’ gellem teba
Panassa are madhateng serro
Angen ngalesser makessap pello
Ta’ edhimma ta’ e bengko
Aeng sacapcap paggun ekabuto
Embu’ ban eppa’ sabban malem adu’a
Tana se kerreng male gar leca’
Bila nambara’ ampon dhapa’
Ngastete dha’ ka dusa ban sala oca’
Bagandan, 2017
*)Alumnus Ponpes MUBA dan STAI Al-Khairat Pamekasan. Tinggal di Jalan Masjid Bagandan, Kelurahan Jungcangcang, Pamekasan.
Editor : Abdul Basri