Anggidanna ACHDIAR REDY SETIAWAN
Ngereng jugan mangadek Yayasan Binar Sokkla Atena.
E dhalem budhaja Madura, konsep ”bajjra” langkong dhasar tor dhalem etembang kajaja’an, kapenterran tor sadaja se ehasellagi dhari akkal. Pottra-pottre Madura biyasana edu’aagi sareng reng seppona malar moga daddiya oreng se bajjra. Ta’ kadiya jaja tor penter akkal se namong adhimensi kadunnya’an, ”bajjra” otaba ”pojur” (basa Indonesia: beruntung) agandhu’ dhimensi dunnya tor akherat.
Filosofi ”bajjra” se daddi tojjuwan odhi’na manossa Madura paneka se eonjuk sareng Binar Junior High School (Binar JHS otaba SMP Binar) e Malem Nerter Kakancengan (haflah akhirissanah) se elampa’agi are Juma’at malem 1 Dzulhijjah 1445 H. Malem se ekancae cajana bulan e Taneyan Creative Hub, Sumenep, daddi momen sakral kaangguy ngarong red-mored kapeng settong se ampon lastare aproses ajar tello taon neng SMP Binar. Bajjrana sadaja lulusan SMP Binar daddi du’a pangarep dhari sadaja bangaseppo se rabu e malem tera’ tar-kataran gapaneka.
SMP Binar ebabarragi sareng Yayasan Binar Sokkla Atena. Eseppowe sareng se molja Ebu Hj Noviana Citrayati, yayasan ka’dhinto epaddek song-osong sakanca’an, para kanthe, tor se kapencot atena malanggeng andhap esor se sokkla wabil khusus e Madura. Yayasan Binar Sokkla Atena aesse manossa-manossa e konco’ temor Polo Madura se gadhuwan pamerte se raja e dhalem pendidikan mandhap tor panengnga. Banne coma se ngastane guru, reng-oreng yayasan jugan ngastane barna barne: dhukter, ponggaba, akademisi, wartawan, dagang, tor jugan keyaji. Sadajana gadhuwan pangarep se same: masanat generasi anom Madura se mabuga tor mabinar bala tangga.
Binar agandhu’ ma’na se nyonar ngarenap se cajana ekabuto ummat (basa Indonesia: bercahaya, bersinar penuh nur). Sokkla agandhu’ arteya akadi kasocceyan tor lembu’na ate. Kalaban filosofi se dhalem ka’dhinto, Yayasan Binar Sokkla Atena ngagunge pangarep se raja kaangguy mangadek sakola’an se masanat red-mored nyoppre nyonar tor sokkla atena. Andhap asor otaba tengka eburukkagi banget etembang ”semata-mata” elmo pangaonengan. Jajarba’an kona dhari agama: ”adab kodu ngontap dhari elmo”, daddi lalampan se eagem sareng sadaja bangaseppo yayasan.
SMP Binar JHS kasebbut lembaga se mamolan dhari yayasan. Manabi Allah se morba jagat ngedine, yayasan insya Allah jugan badhi ngadek pendidikan se langkong tenggi (SMA) tor jugan TK sareng SD. Kurikulum SMP Binar ajunjung mabecce’ partengkan se molja (akhlaqul karimah). Sorot sanderra oca’, tengka, tor sadaja lalampan odhi’ daddi bab se kenthel e dhalem pangajaran sabban arena.
Kurikulum se eagem SMP Binar badha tello barna. Se kapeng settong bab kurikulum nasional se ampon ejudai sareng pamarenta. Nangeng padhapa’na dha’ mored langkong jangkep dhari se laen amarga badha palappa genna’na. Red-mored ta’ coma ajar jimet jatmeka e kellas. Red-mored eocol toron ngaonenge sadaja se kalampan e magarsare. Toron apanggi manossa laen e bala tangga, jugan abakte ararenggane asrena dunnya kalampa mingguan otaba bulanan.
Saterrosepon, pangajaran ebulangngagi kalaban 17 bab panonjul daddi panduman se eajarragi menorot tojjuwan se kasebbut e dhalem SDGs (sustainable development goals). Tong-settongnga bul-ombul e SDGs ekae’agi dha’ essena pangajaran e pangajaran (tematis, ta’ spesifik settong pangajaran bisaos). Sabban bul-ombul dhari tong-settongnga pangajaran jugan rabu dhari oreng se lakar penal. Elmo ta’ rabu namong dhari guru kelas. Mored eparenge elmo sareng para ahli se gadhuwan elmo tor ampon alampa’agi e dhalem praktik sanyatana. Dhari konsep gapaneka, red-mored kengeng elmo se ngaonenge eterrappagi e dhalem konteks ponapa.
Kapeng dhuwa’ tor tello’ se abida’agi sareng sakola’an se laen enggi paneka kurikulum adab tor minat bakat. Sakola’an se gadhuwan motto ”mengokohkan adab & mengembangkan bakat” paneka gu-onggu mamaso’ bab akhlak tor minat bakat sabban bakto. Akhlak epondhut dhari pathena agama (akidah Islam) tor budhaja (Madura). Adab dha’ Allah, buppa’ babbu’, guru, tor oreng se langkong seppo eajarragi kalaban istiqomah. Bab minat bakat jugan epagumbus jenno molbul kalaban malanggeng sangkolan aromat budhaja Madura. Saloka asteng dhari bangaseppo (tamaso’ bab seni, tradisi, tor tengka) daddi binarengnga red-mored daddi biyonto. Sangkolan kabudhajan (Madura, jugan Islam) paneka daddi ramo’ se bakal daddi sasaka parjalanan odhi’na na’-kana’ SMP Binar.
Sadaja pangarep tor ikhtiar molja se ampon elampa’agi sareng sadaja etojjuwagi apareng sango se cokop dha’ red-mored, kong-langkong se bakal wisuda e taon samangken. Angkatan se kapeng settong paneka bakal ababbar lajarra kalaban ”abantal syahadat asapo’ iman apajung Allah” e dhalem ngaronge sagara kaodhi’an.
Papanggiyan e Malem Nerter Kakancengan gapaneka daddi tatengnger visi misina sakola’an se eromat sareng Yayasan Binar Sokkla Atena. Se jugan parlo ekaonenge, tong-settongnga mored esangowe kerres (e dhalem barang sanyatana se ebadhi Empo Basi). Sumenep kalonta kasebbut Kottha Kerres. Red-mored SMP Binar kodu ngaonenge bab kerres kalaban pangarteyan se sokkla. Mela dhari ka’dhinto, sadaja mored se ampon kengeng kakancengan esangkole kerres se bakal daddi kaca kebbangnga otaba bajangan dhari kamampowanna bang-sebang. Kalaban sangkolan kerres ka’dhinto, sadaja alumni salanjangnga edu’aagi terrosa enga’ dha’ sadaja pangajaran odhi’ se sae tor parjuga se ampon eburuk sareng ru-guruna. Akerres sareng pangesto, paneka pangarep sadaja para rabu dha’ sadaja alumni SMP Binar.
Pan-ponapan careta se ejarba’agi e attas malar mandar daddiya babulangan jugan dha’ lembaga laennepon tor sadaja magarsare. Saestona, pendidikan se otama tor sokkla enggi paneka pangajaran andhap asor tor tengka. Akhlak dha’ Pangeran, Allah SWT, ebu bapa’, guru, nagara, tor lingkungan sadajana parlo ekagali salanjangnga odhi’.
Saterrossepon, minat tor bakat sabban manossa tanto bida menorot kajunelan se ampon epondhi. Badha se penal e matematika eatore. soka’ dha’ nganggit careta sastra kasokanna. Namong manabi badha mored se ta’ penal dha’ pangajaran umum ja’ duli epaciri. Lantaran sadaja elmo kengeng daddi sango ajalane odhi’. Kalaban paemodan kadi ka’dhinto, malar moga sadaja mored kengenga bunga bilaepon. Asakola kengeng magumbus minat tor bakattepon papareng dhari Se Kobasa.
Waba’du, sadaja ikhtiar pendidikan se ampon kalampan paneka epongkase kalaban du’a pangarep se otama: malar mandar sadajana daddiya oreng se bajjra, pojur, salamet e dunnya kantos akhirat. Samoga. Amin. (*)
Baca artikel dan berita menarik dari RadarMadura.id lainnya di Google News
Editor : Hera Marylia Damayanti