Jumat, 19 Oct 2018
radarmadura
icon featured
Cerpen

Edina Abakalan

Carpan Endy S. Johan*

Minggu, 16 Sep 2018 20:36 | editor : Abdul Basri

Edina Abakalan

SAMARENA sobbu Hendi ta-maranta marengkes kalambina asabab are sanonto pon dhapa’ dha’ moleyan pondhuk karana tellasan Idhul Adha. Samarena marengkes kalambina, Hendi bakal amet mole dha’ keyaena. Rassa kerrongnga ka reng towana la paddhang e adha’anna. Ta’ loppa pole dha’ Ayda se ekajembar dhalem atena.

”Assalamu’alaikum,” oca’na Hendi neng e adha’anna dalemma keyaena se ameda mole.

”Waalaikumsalam, badha apa ya?” saodda keyaena kalaban masang pejina.

”Abdina nyo’ona edi.”

”Dha’emma’a ya?” tanyana keyae.

”Abdina palemana, amarga sakola’an paraiyan.”

”Oh, sakola’anna la paraiyan? Ya dina sa’ la te-ngate neng e jalan ban senga’ pateppa’ pola tengkana dila badha e romana.”

”Enggi. Assalamu’alaikum,” kalaban nyeyom astana keyaena.

Samarena amet, Hendi langsung mole dha’ romana e Kombang kalaban ajalan soko dhari Gappora sampe’ dha’ Palabbuwan Talango karana eppa’na ta’ andhi’ sapedha lengkap kaangguy ngone’e Hendi se badha e pondhugan Gappora. Gun coma andhi’ sapedha Legenda se la’a ta’ lengkap. Eppa’na coma bisa ngamba’ Hendi neng e palabbuwan sabban Hendi moleyan pondhuk.

Sabban jalan se elebadi aromasa ta’ egarassa kepagga. Sabab dhari ce’ sennengnga atena ta’ aromasa ja’ temmo dhapa’ dha’ Kaliyanget. Monyena sampan ban tongkang magundhek atena amarga molae badha e pondhuk se terro moleya alebbar kakerrongan ka reng towana ban gantongan atena. Iya areya Ayda, babine’ se ella ekapacaran molae gi’ kellas dhuwa’ tsanawiya. Sampe’ sanonto Hendi ampon kellas tello’ aliya ban samarena lulus dhari aliya Hendi ban Ayda ajanji bakal odhi’ apolong saomorra.

”Alhamdulillah, dhapa’ onggu ka Kaliyanget,” sowarana se lere sambi ngabas Palabbuwan Talango dhari Kaliyanget.

Saamponna ngabas palabbuwan, Hendi ongga ka tongkang ban entar ka attas sambi ngabasagi sapedha ban mobil ongga. Dhari banya’na pedirra sapedha se ongga ka tongkang ma’ atena Hendi tacengnga’ ngombarra babine’ akodhung pote ban akalambi celleng. Ya areya Ayda se akentelan ban oreng lake’.

Atena Hendi aromasa jembar bisa nangale gantongan atena. Gi’ molae mondhuk se ta’ nangale sakale ban buru sanonto se atemmo salerana Ayda. Atena nyapa’a aromasa todhus. Gun coma bisa ngabas dhari attas. Tongkang ampon mangkat. Hendi paggun mandeng robana Ayda se ce’ raddinna se badha neng e baba. E teppa’na tongkang ampon ngandhek ka Palabbuwan Talango, Hendi toron dhari attas tongkang ban nyander ka Ayda.

”Assalamu’alaikum, Ayda,” sapana Hendi se lere sambur sem­-mesem konco’.

”Waalaikumsalam. Bah Hendi?” saodda Ayda tacengnga’. ”Ampeyan paleman pon dhari pondhugga?” tanyana.

”Enggi. Ampeyan molae gella’ badha ka’emma ma’ kaula ta’ nangale?”

”Hmmm badha e attas,” jawabba Hendi sambur mesem.

”Oh...”

”Ampeyan sareng pasera?” tanyana Hendi pole.

”Sareng kaka’. Enggi dina gi, kaula palemana kadha’.”

”Enggi, te-ngate e jalan.”

Samarena nyator ban Ayda, Hendi entar ka eppa’na se molae gella’ tos-antosan e lao’na palabbuwan kalaban sapedhana. Saamponna dhapa’ ka eppa’na, Hendi nyeyom tanangnga ban eppa’na atanya.

”Sapa gella’ rowa, Cong?”

”Ayda.”

”Oreng dhimma?”

”Oreng Galise’.”

”Oh, ya dina mara ongga,” eppa’na nyoro Hendi ongga ka sapedhana.

Hendi pas aongga ka sapedhana nojju dha’ romana e Kombang. Sadhapa’na e                                                                                                                                                                                                                                                       romana badanna aromasa roga kabbi karana molae lamba’ lorong se rongke’ ta’ duli epateppa’. Dhari ce’ lempona Hendi pas tedhung.

***

Kalagguwanna, e bakto gu’-laggu mano’ koju’ ban mano’ ola’ ngakaleccok e bungkana tarebung, agabay atena Hendi jembar ta’ re-mare. Are se ngombar e attassa ambunten daddi katongga’an odhi’ se ta’ perna erassa’agi sabban arena. Hendi pas jaga dhari tedhungnga entar ka temoranna romana ban terro ngabasagiya are ngombar. Dhari geddebba sonar are etemmo jang-bajangan Ayda tera’ dhalem matana.

”Adhu, Ayda, dika tonggal odhi’ ate bula se bakal daddi bentalla pate,” karettegga atena Hendi sambur ngabas are ngombar.

Dhari ce’ abidda ngabas Hendi kose ta’ ngedhing jha’ eppa’na lok-ologan e langgar.

”Cong, Cong.”

”Ka’into, Pa’.”

”Ya’ dha’enja lu.”

”Enggi,” sambi nyander ka eppa’na se badha e langgar.

”Ba’na dhaggi’ kol petto’ entar ka onjangan ya. Ka bengkona Saleman e Galise’. Engko’ ta’ enneng ja’, polana sapena tadha’ pakanna sakale.”

”Onjangan napa ganeka, Pa’?”

”Ca’na, pabakalanna ana’na.”

”Enggi pon. Tape kaula ta’ oneng ka compo’na.”

”Dina abareng pamanna. Sa’ dhi-mandhi, aban kedhi’.”

Dhari pakonna eppa’na, Hendi ajalan ka dhalem romana ngala’ sabun ban terros mandhi ka somorra. Samarena mandhi, pamanna temmo dhapa’ ju’-toju’ e langgarra, tandhana mangkada ka konjangan. Hendi duli-duli ngala’ kalambi ban terros mangkat.

Sadhapa’na e romana Saleman, Hendi tacengnga’ karana roma onjangan pabakalan ganeko teppa’ ka romna Ayda ban sambur atanya ka pamanna. ”Man, onjanganna ka bengkona Ayda gi?”

”Iya, Ayda sateya abakala ban oreng Lembana.”

Ngedhing oca’na pamanna atena Hendi aromasa ancor. Janji lamba’ se kaoca’agi Ayda bakal odhi’ apolong saomorra, sanonto akantha janji jang-bajangan se coma lebat e dhalem mempe. Dhari ta’ kowat ngampet sake’ atena, aeng matana ngalocor, nyapcaba ka dhadhana. Hendi atengka’ mole ka bengkona polana ta’ kowat ngabasagi Ayda asandhing ban reng lake’ laen.

E bakto Hendi atengka’ mole, suara Ayda lok-ologan dhari adha’anna romana. ”Hendi, Hendi,” Ayda berka’ tanggung, nyander.

”Napa?” balessa Hendi se lere kalaban mowana nondhu’ sabab Ayda tako’ nangale ja’ Hendi nyapcap aeng mata.

”Kaula nyo’on sapora ngengkare janji se eator kaula ban ampeyan,” oca’na Ayda sambur mangalocor aeng mata.

”Diggal ta’ aponapa.”

”Kaula abakal karana reng towa,” kalaban ngala’ tanangnga Hendi.

”Enggi diggal ta’ anapa. Samoga’a ampeyan ban bakalla judhu saomorra ban insyaallah kaula rida’ ngocol ampeyan e dhalem atena kaula,” balessa Hendi se alos.

”Kaula nyo’on sapora. Ampeyan nyare babine’ se lebbi bagus ban se sholeha dhari kaula.”

”Ampeyan gampang ngoca’ nga’ ganeka. Reng bine’ neka bannya’ e dunnya neka. Tape nyare se cocok ka ate neka malarat. Gi diggal gi kaula palemana,” sambi tanangnga ngosap aeng matana.

Hendi langsong ka’-berka’ mole kalaban ate ancor. Ngalocorra aeng matana abanjiri kalambina sabab se earep Hendi mole dhari pondhugga coma terro kabungaan se bajjra. Tape sanonto coma daddi peddina lokana atena se ta’ earep.

Battangan, 2018

*)Siswa MA Nasya’atul Muta’alimin Gapura asal asal Kombang. Aktif di Komunitas Sanggar Biru Laut dan Komonitas Asap.

(mr/*/bas/JPR)

 TOP
 
 
 

Subscribe

E-Paper
Follow us and never miss the news
©2017 PT Jawa Pos Group Multimedia