Rabu, 17 Oct 2018
radarmadura
icon featured
Cerpen

Se Asmana Herman

Carpan Taufik Rahman*

Minggu, 13 May 2018 23:43 | editor : Abdul Basri

Se Asmana Herman

PADHANA malem-malem se tapongkor, Herman ta’ pegga’ dhari kahoso’an dikker-dikker se ekhusussagi dha’ Pangeranna. Herman nondhu’ ta’dzim samarena alaksana’agi dhuwa’ raka’at salat Tahajjud ban salat Tasbih. Nga-ngenga’e sabban-sabban dusa se ella elakone sabellunna. Dikker se ebaca tadha’ laen sopaja Pangeranna nyapora kasala’anna.

Mon e ker-pekker pole, sabellunna Herman ta’ perna ngalakone nga’ reya. Ma’ taker ngalaksana’agi salat Tahajjud, kadhang salat Sobbu bai Herman talebat sampe’ metto are. Mangkana, Herman reya santre se odhi’ e pondhuk. Kaangguy ngalakone ebada tanto lebbi gampang katembang na’-kana’ se ta’ mondhuk.

”Mak buruwanna ya? Ta’ biyasana!” Kancana Herman akasa’ ka kancana se laen.

Lakar ekataowe, sabellunna Herman ekennal kalaban santre se meller ban lako alanggar. Tadha’ oreng se ekala’ oca’na. Maske se adhabu reya keyae, Herman ta’ gep-nganggep. Apapole gun sakadar pangurus pondhuk se aberri’ babulangan, sakone’ lekka’ ta’ eedhingagi. Sajan gun oca’na ca-kancana, enga’ abu se elang eserrop angin.

Perna kadaddiyan, Herman agabay karedhuwan kalaban mokol sala settong pangurus pondhuk. Mon ta’ sala’a nyamana Ustad Luthfi. Herman mokol pangurussa teppa’ e matana se kacer. Sampe’ matana ta’ bisa nengale pan-barampan are polana bara. Tadha’ se ngataowe sabab kadaddiyan jareya. Tape, sala settong santre se nengale kadaddiyan reya ngoca’, sabellunna Herman moso Ustad Luthfi atokar, kadhuwana atokar caca e budhiyanna kamar.

Ta’ paddhang sapa se amolae. Herman temmo-temmo mokol Ustad Luthfi. Marena jareya, Ustad Luthfi jaga pas tokar e antarana kadhuwana ta’ bisa epesa. Tadha’ se bangal entar. Sabab se kadhuwa oreng se ekatako’e. Ustad Luthfi iya areya koordinator pangurus kaamanan ban katarteban (kamteb) se ekennal kalaban songar. Herman santre meller se ta’ tao ka tatakrama. Sampe’ aherra Ustad Luthfi robbu samarena pokolanna Herman ta’ bisa etangkes.

Marena jareya, Herman eteret ka kantor pondhuk. Herman eurus moso sakabbiyanna pangurus. Tadha’ se tao apa se kadaddiyan e kantor pondhuk. Saellana kera-kera saejjam, Herman kalowar kalaban mowa se ta’ kala remmok moso mowana Ustad Luthfi gella’. Paleng Herman mare epokol moso pangurussa ban ta’ kera lopot Herman la mare etandu’ ban etamper.

Dhapa’ ka kamar, ca-kancana atanya arapa ma’ sampe’ Herman reya andhi’ masala ban atokar moso pangurus kamteb. Herman ta’ ajawab. Ta’ kalowar oca’ maske gun sakeccap. Kancana ta’ maksa Herman kaangguy ajawab, lakar ngarte ja’ Herman reya ta’ pate senneng ka pangurus e pondhuk. Herman arassa pangurussa gun tao nyoro, tape ta’ tao alaksana’agi apa-apa se ewajibbagi ka santre-santrena. Bakto jareya, kancana coma bisa neng-enneng ban abarenge Herman se eabassagi gi’ peggel ka pengurussa.

***

Saminggu reya, Herman lakar ta’ padha ban biyasana. Sepat angko ban bengnges se sabellunna ekaandhi’ Herman elang sakalangadha’. Mala’a, sateya Herman daddi santre se sanget patot tor ta’at. Lebur ban laba ka ca-kancana. Mesem balibis ta’ perna loppa epatao ka oreng-oreng se etemmone. Banne gun jareya, sateya Herman ce’ akrabba moso Ustad Luthfi se daddi mosona molae lamba’. Apapole, Herman reya ta’ sesep alaksana’agi salat jama’ah genna’ moso qabliyah-ba’diyah-na, sartana ta’ kalopae kaangguy alaksana’agi salat Tahajjud.

Sampe’ sateya tadha’ se tao sabab aobana Herman se nyakaleyan. Ca-kancana Herman banne ta’ parcaja dha’ hidayana Pangeran se bisa mabiluk kabula kalaban kakowasa’an-Na.

”Tape, ma’ pas sakalengadha’?” ca’na ca-kancana Herman e kamarra. Ca-kancana se laen terro taowa dha’ se nyebabbagi aobana Herman daddi patot tor ta’at. Saengga badha se bangal atanya dibi’ ka Herman maske badha rassa sengka e dhadha.

”Herman, engko’ sabellunna sapora. Engko’ sakanca’an terro atanya’a kabadha’anna ba’na se aoba daddi bagus enga’ reya. Banne engko’ ta’ senneng, mala engko’ bunga mon ba’na daddi oreng se ta’at,” oca’na santre se apolong moso Herman.

Herman mesem ngaedhing totorra kancana. Herman ta’ kose getton mon etanya’agi enga’ jareya. Herman lakar apangrasa ja’ aba’na daddi oreng se ta’ meller dhalem bakto se ta’ esangka-sangka. Herman ngala’ nyaba dhari elong pas epakalowar re-lere lebat colo’na. Mesem balibis abarengnge oca’na Herman kaangguy ajawab kakabateranna ca-kancana.

”Sabellunna sapora dha’ kasala’an ban kakalerowan engko’ molae lamba’. Jujur, engko’ kasta ban apangrasa. Enga’ ka oca’na ba’na se gi’ buru, engko’ terro acareta’a,” Herman ambu sakejja’ pas eterrossagi, ”Mon ta’ sala’a satengnga bulan se gi’ buru, engko’ kalowar pondhuk. Engko’ ta’ amet ka pangurus. Neyadda moleya ka roma, polana engko’ la busen ban sompek badha e pondhuk. Tamba are acora’ tamba ancor.

”Ba’na kan tao ja’ engko’ reya ce’ baji’na ka pangurus pondhuk se gun tao nyoro reya ban reya, tape ta’ tao alako ka se esorowagi ka santrena. Mon badha santre se meller, iya se esala’agi santre jareya. Pangurus ta’ tao apangrasa ja’ ban-sabban santre se epasra’agi ka pondhuk reya tadha’ laen kaangguy daddi oreng se bagus. Ban tugassa pangurus areya mabagus santre-santre jareya. Banne guna lako agigir ban nyala’agi santre.

”Cong, pola ba’na kodu tao. Awalla, tojjuanna engko’ meller ban lako alanggar ka paratoran pondhuk tadha’ laen terro maenga’a pangurus. Ban pole, engko’ ta’ senneng nengale santre se ngala’ karebba dibi’; kalowar-maso’ pondhuk baktona jam aktif, mole ta’ amet, ban salaenna. Tape, ba’na la tao, engko’ banne sapa-sapa. Ma’ taker mateppa’a ban maenga’a na’-kana’ se meller, mala’a tamba are engko’ tanoro’ ka ca-kanca se korang bagus tengka gulina padhana se la kadaddiyan molae bilan.

”Pas dhapa’ pan-barampan minggu se gi’ buru, engko’ tatemmo moso oreng ngemmes, nyamana Mba Surip. Oreng jareya menta nase’ kaangguy ngesse’e tabu’na se la barampa are ta’ arassae manessa kakanan. Polana ta’ tega, oreng jareya eberri’ nase’ moso engko’. Kakanan se saongguna ekabuka’a bila mangrib. Nase’ jareya ekakan ban badha rassa bunga e ate polana engko’ bisa abanto oreng laen.

”Marena adha’ar, Mba Surip ngoca’ kalangkong ka engko’, ’Kalangkong ya, Cong Herman’. Engko’ takerjat. Dhari dhimma oreng reya tao nyamana engko’. Engko’ pas ajawab, ’Enggi same, Pa’. Ma’ ajunan oneng ka nyamana kaula?’Banne pera’ nyamana ba’na se ekataowe engko’. Pa-apa se epekkere ba’na sateya engko’ tao keya’. Engko’ akaton ta’ parcaja dha’ se eatorragi oreng jareya. Engko’ anya-tanya dhalem ate, apa oreng reya oreng pondhuk se nyamar kaangguy nalektegi santre, otaba oreng jareya lakar sakte se bisa ngataowe essena atena bang-sebang oreng se etemmone. Engko’ arassa bingong bakto jareya.

”Mba Surip pas alonggu e seddi’na engko’. Mesem tatkalana atole ka engko’. Pas atotor, ’Cong, pola ba’na ta’ tao sapa engko’. Tape jareya ta’ parlo kaangguy ekataowe. Se lebbi parlo, ba’na kodu ngedhingagi ban ker-mekker apa se bakal epadhapa’ engko’. ’Engko’ gun bisa aonggu’ ban Mba Surip nerrossagi dhabuna.

’Cong, kadhang, manossa reya galiya’ ban ta’ nyaman rassa bila badha pa-apa e seddi’anna se ta’ masenneng ka pekkeran. Dhari jareya, manossa terro sopaja se badha e seddi’anna ebiluga otaba ngoba sopaja padha ban sonduk moso se epekkere. Ta’ ngabas oreng jareya mampo apa enja’. Cong, lebbi bagus alako se bisa elakone aba’na dibi’. Ja’ endher entar ka oreng laen. Pendha’ oca’, mabagus taneyan dibi’ gallu, pas entar ka taneyanna oreng laen.’ Engko’ gun bisa nondhu’ ngedhingagi tor-atorra Mba Surip. Samarena jareya Mba Surip jaga ban ondur ta’ tao ja’ dha’emma tojjuwanna.

”Awalla engko’ ta’ ngarte ka se etotorragi Mba Surip. Tape, kapan e ker-pekker pole, lakar teppa’. Molae lamba’ engko’ alalakon se engko’ dibi’ gi’ ta’ kelar alako. Mare jareya engko’ apangrasa, ban burung se moleya ka roma. Engko’ abali ka pondhuk, sambi terros nga’-ngenga’e dhabuna Mba Surip gella’. Dhapa’ ka pondhuk engko’ epayakin e dhalem ate kaangguy sajan masemma’ dha’ Se Kobasa ban ajar epabendherra. Ta’ emo’ mateppa’a oreng laen salaggi’ aba’ dibi’ ta’ bisa epateppa’.”

Caretana Herman agabay rassa bunga e atena ca-kancana ban rassa ta’ parcaja. Ca’-oca’ se kalowar dhari Herman akaton camporanna palappa se adaddiyagi sampornana okara. Saengga ca-kancana ta’ kobasa kaangguy agellu’ Herman. 

*)Ketua Komunitas Nyengnger PPA Lubangsa Selatan. Mahasiswa Jurusan Tasawuf dan Psikoterapi di Instik Annuqayah Guluk-Guluk, Sumenep.

(mr/*/luq/bas/JPR)

 TOP
 
 
 

Subscribe

E-Paper
Follow us and never miss the news
©2017 PT Jawa Pos Group Multimedia