Rabu, 17 Oct 2018
radarmadura
icon featured
Cerpen

Odhi’ Nyangsara

Carpan Andy FR.*

Minggu, 22 Apr 2018 15:52 | editor : Abdul Basri

Odhi’ Nyangsara

SENGAA bisa. Andina manossa reya bisa agugat apa se etepteppagi Guste Pangeran. Paleng Ke Emmat bisa daddi oreng se ce’ pantessa kaangguy ngalakone jareya. Anggebban jareya banne ta’ kalaban alasan. Kaodhi’an se bannya’ kakoranganna daddi buktena. Salaenna roma bidhik aokoran empa’ kale lema’ meter se e dhalemma coma badha settong kamar, Ke Emmat la ta’ andhi’ barang arga maske settong. Kalambi coma kare salambar. Sala bariya jareya se eangguy sateya: kalambi bathek agambar bang-kembang se possa’ kalaban jai’an-jai’an ta’ kaator, ban-saromban. Calana pandha’ se eangguy padha kare settong keya, saragamma sakola’an SMP andhi’na lamba’. Padha bai, bannya’ jai’anna se ban-saromban keya.

Mon badha se terro taowa dha’ kabadha’anna, pas coba’ laju pekkere ke’-lake’ towa kalaban omor paleng enja’ la ballung polo taon se andhi’ kole’ so’-kerso’, obu’ pote possa’ bi’ oban, tengnga bungko’, ban gigi se alowang bannya’. Maske omorra se saongguna gi’ ra-kera saeket taon, tape Ke Emmat arassa la towa talebat sabab badanna se ta’ karabat. Etambai pole cem-macem panyake’ se alir-gilir nengga’ e badanna se seppo. Biyasana coma ja’-sakejja’, tape badha keya se nengga’ lebbi abit e badanna. Molae dhari struk ban panyake’-panyake’ laen se Ke Emmat ta’ enga’ ka nyamana bang-sebang se pojurra ta’ pate sara.

Pan-barampan panyake’ jareya ekataowe Ke Emmat saamponna dhubulan se tapongkor etemmo robbu e jalan bi’ reng-oreng se lebet parappa’na ater-poter nyare kalakowan ka bara’ ka temor. Samarena jareya Ke Emmat langsung ebakta ka puskesmas e semma’na kadaddiyan jareya. Dokter se mareksa aberri’ tao ja’ Ke Emmat reya kateba’an panyake’ se ta’ coma settong, tape abak bannya’. Dokter jareya pas aberri’ tao nyama-nyamana panyake’ se esebbut gella’. Ke Emmat mengnga’, arapa panyake’-panyake’ jareya ma’ pas perna e badanna se kotor polana seggut ta’ epandhi’i jareya. Pola lakar kennengngan padana jareya se ekasennengnge? Gaja’na e pekkeranna.

Samarena kadaddiyan jareya, Ke Emmat ta’ bangal pole se kalowara u-jau dhari romana. Coma toju’ ban lebbi seggut dhung-tedhungan agentang se bisa ekalakone e romana se cope’. Sambi dhang-kadhang ngalamon ta’ karowan, tape ta’ tao apa se epekkere. Tadha’ kalakowan laen salaenna jareya. Ke Emmat tako’ bila ajalan jau pole pas robbu e tengnga jalan.

Bila malem dhateng ban la dhapa’ baktona tedhung, Ke Emmat langsung agentang sopaja ceppet tatedhung kalaban alama’ teker ra-kara se eampar ka tana ban abantal leppetan sarong se bau jail. Rombongan rengnge’ paggun ta’ bu-ambu nyaronen kaangguy barengnga tedhung sambi ngabber akalemba’ e seddi’na kopeng. Sakejja’ aggi’, Ke Emmat pas tatedhung amempe kaodhi’an sowarga se nyaman. Kaodhi’an se sakabbina gampang, cokop, ban mewa.

Bila tajaga polana cellep otaba ekekke’ rengnge’, Ke Emmat bakal sanget kaceba asabab tao ja’ jarowa coma mempe kembangnga tedhung. Bisa epekkere baramma malaratta tedhung leplep kalaban coma alama’ teker ra-kara ban abantal leppetan sarong se jau dhari lembu’, adaddiyagi cethak lako sake’ bila tedhung abak abit. Apapole bila angen ser-ngalesser arebbu’ maso’ lebat lobangnga bidhik ban nyapo’ badan se samarena jareya langsung cellep ta kapalang. Pole rengnge’ ta’ dhappor jarowa, aganggu oreng amempe bai lakona.

Onggu, kennengngan se tadha’ nyamanna sakale. Tape baramma pole, padhana reya la kabadha’anna. Ke Emmat ta’ bisa ngoba bannya’. Apapole bila osomma toron ojan, asabab genteng bannya’ se bella, aeng ojan bakal gampang maso’ ban nyapcape tana se ta’ elester jareya. Daddina? Tana jareya beccer ban Ke Emmat kodu nyegga sopaja aeng ojan ta’ agabay kabadha’an tamba sara, kalaban ngamba’i aeng se nyapcap jareya ngangguy bak-ebbak kene’ se nemmo e pamowanganna sarka.

Sabban are, lapar ta’ toman ta’ dhateng abarengnge tabu’na Ke Emmat. Jujur, kabadha’anna ta’ tao ekakarep. Masalana, tadha’ se bisa egabay pos-apos se kera’a manyengga lapar jareya. Kadhang, lapar ta’ dhateng enga’ biyasana sabab se dhateng reya tatangga se edhep ka Ke Emmat baja laggu, ngeba nase’ sabungkos otaba kellana sabbrang se ekagabay paelang lapar maske sakejja’. E bakto jareya lapar se ta’ dhateng, tape kamalemanna lapar dhateng pole mon tadha’ tatangga se aberri’a essena tabu’ pole.

Lakar, Ke Emmat reya ta’ bakal dhapa’ sampe’ sateya manabi tadha’ petolong dhari sabagiyan sakone’ tatanggana se edhep. Ke Emmat seggut mekker, andina badanna gi’ baras padhana gi’ lamba’ bakal nyare lako. Tape kalakowan enga’ apa se bakal ekalako oreng ta’ asakola ban ta’ andhi’ ijaza. Ataneya ta’ andhi’ tana. Tape saellana kabadha’an la padhana areya. Ta’ bannya’ se bisa ekalako Ke Emmat salaenna agantong ka tatangga.

***

Mata are compet e langnge’ bara’. Bulan coma etangale saparo. E attas lencak e adha’na romana, Ke Emmat toju’ sambi ngalamon. Angen nyerrop obu’na la ta’ toman ecokor. E dhalem atena rassa kerrong ban kaceba paggun cekka’ ta’ elang. Bila enga’ dha' kadaddiyan pan-barampan taon lamba’. Bakto se saongguna sanget cokop kaangguy ngaloppae, tape bariya la kabadha’anna.

Ke Emmat lakar loppa’an, paggun ta’ kenneng aloppae kadaddiyan se ngoba odhi’na. Oreng se Ke Emmat kaneserre, binena, ondur ka kampong se abak jau, noro’ lakena se anyar. Gu-ongguna babine’ amata pesse. Nyare ke’-lake’ se asogiyan polana Ke Emmat korang sogi ca’na. Maske, kaodhi’anna lamba’ reya kenneng koca’ cokop keng ta’ lebbi. Sakeng babine’ rowa se lakar la ta’ esto ka Ke Emmat, daddina paggun se ngoca’ korang.

Dhari kadaddiyan jareya, Ke Emmat odhi’ sang-tasangsang. Salbut ta’ etemmo karowanna. Lakona coma seggut ngalamon e attas lencak adha’na romana. Se aladinana la tadha’. Odhi’ kadibi’ e roma bidhik sabab romana se lamba’ la ejuwal gabay panotop otang.

Bila enga’ ka jereya, Ke Emmat pas nekket dhadha se sake’ sakalengadha’. Kadaddiyan jareya adaddiyagi kaodhi’anna lamba’ se cokop aoba nyangsara. Onggu, kadhang Ke Emmat ta’ narema dha’ kateptepanna Guste Pangeran se enga’ reya. Huh!

Mon Ke Emmat gut-seggut gallu mekkere jareya, dhaggi’ Ke Emmat bisa gila kaelangan pekkeranna se baras. Ke Emmat lakar kaceba, tape ba’ teppa’a mon sampe’ manglo guste pangeran? Maske sanyatana terro alakowa jareya, Ke Emmat mekker, Guste Pangeran maste andhi’ pangara se lebbi bagus. 

*)Santre Pondhuk Annuqayah Lubangsa Lao’ dhari Mandhala, Rubaru.

(mr/*/bas/JPR)

 TOP
 
 
 

Subscribe

E-Paper
Follow us and never miss the news
©2017 PT Jawa Pos Group Multimedia