Senin, 19 Nov 2018
radarmadura
 
icon featured
Puisi

Puisi Madura Moh. Dasuki*

Minggu, 01 Apr 2018 19:45 | editor : Abdul Basri

Puisi Madura Moh. Dasuki*

Arena engko’ elang sengsal

Are ngodhana engko’ nyengga

Sateya petteng dhateng e pekkeran

Omor towa ta’ bisa etola’

Engko’ entheng e bakto ngodha

Sateya odhi’ daddi raconna ate

Mesken elmo, mesken dunnya

Apa gunana engko’ makasta

Kasta e tempona toa tadha’ gunana

Gun nambai lokana sokma

Ka se ngodha engko’ ngarep

Ator odhi’ molae dhari laggu

Nojju dha’ manossa se bagus

.......................

Seksa

E nalekana monyena soko

Atengka’ nojju dha’ bengko

Munkar ban Nakir dhateng

Nyambi cem-macemma tanya

”Sapa pangeranna?”

”Sapa imamma?”

”Sapa nabbina?”

Ban samacemma

Mayyit terros ngetter

Jawabba ta’ bendher

Gada ban kol-pokol

Marre dha’ mayyit

Aorak, acerreng, aserro

E nalekana jasad remmok

..........................

Maloppa

Ojan mesem

E adha’anna keddhebba mata

Angen akanca

Nyapo’e sakabbiyanna badan

Tana sorem

E bakto ate dika didda’

Kalaban didda’an se peddi

Ja’ saongguna e dhinna’ bula apekker

Settong rassa

Edhinna’ bula apekker

Taresna dika se ta’ cekka’ esto e dhalem ate bula

Tadha’ bintang

Tadha’ bulan

Se ngancae

E bakto malem

bula apekker

Sakabbiyanna ella mapeddi

Ka jalanna dhara e ate

Se ta’ agiba taresna

Se ta’ agiba esto

Dhalem kasempatan

Ate acaca

Bakal maloppa saterrossa

Kaangguy mamoncar mesemma dika

Maske banne etojjuwagi dha’ ka bula

............................

Tokar

Dhadha onga’

Mata mekkar

Tanang ngarkar

Ora’ malantar

Sadaja setan ban napso acampor

Bala tangga daddi songar

Oreng-oreng padha enger

Saengga aganggu tennangnga pekker

...............................

*)Pustakawan PPA Lubangsa Selatan lahir di ujung timur Pulau Madura.

(mr/*/bas/JPR)

Jawa Pos Digital
E-Paper
Most Read
 TOP
Artikel Lainya
 
 
 

Subscribe

E-Paper
Follow us and never miss the news
©2017 PT Jawa Pos Group Multimedia