Senin, 10 Dec 2018
radarmadura
 
icon featured
Cerpen

Tareka Se Maha Agung

Minggu, 18 Mar 2018 16:40 | editor : Abdul Basri

ilustrasi

ilustrasi

Carpan Mudhar CH.*

GENNA’ tello are se tapongkor, Iddris, lakena Ningrum, mangkat ka Mekka kaangguy alaksana’agi ebada umro. Ningrum gun neng kadibi’ e bengkona. Bengko kontra’an teppa’ e adha’na masegit. Ta’ biyasana Ningrum asapowan taneyan. Sabab se biyasa asapowan taneyan Iddris. Mon gu-laggu Ningrum biyasana ta-maranta e dhapor. Saellana Ningrum edina Iddris ka Mekka ta’ pate bannya’ atogu dhapor.

Ningrum babine’ dhari Jombang se 14 taon badha e Madura saellana ekabin reng lake’ se anyama Iddris. Ningrum ejuduwagi ban Iddris aropa’agi pamondhut dhari keyae kennengnganna Ningrum mondhuk. Akmal, ana’ lake’ settong kabbiyanna gantongan atena la epamondhuk ka keyae se ajuduwagi. E bengkona Ningrum gun neng kadibi’.

Iddris alaksana’agi umro ka Mekka ta’ bannya’ bala tangga se tao. Sanajjan aba’na reng Madura asli, tadha’ camporanna sakale, Iddris ta’ noro’ lampa se kappra. Iddris ta’ jang-onjang. Iddris ta’ aberri’ tao ka reng-oreng. Gun reng kadhuwa tatanggana Iddris se tao ja’ Iddris aumro, iyya areya tatangga kangan kacerra bengkona.

Ta’ jang-onjangnga Iddris ka bala tangga badha pan-barampan sabab. Settong, Iddris ta’ kellar jang-onjang. Iddris aumro ollena ja-ngaja. Iddris ta’ andhi’ bandha bannya’ kaangguy mabadha salamettan. Se kapeng dhuwa’, Iddris aromasa ta’ parlo mabadha salamettan, ngonjang bala tangga. Sabab aba’na ebada ta’ kodu ekataowe oreng bannya’. Enga’ jareya la elakone Pa’ Ehlas bakto ahajji taon se jung adha’an se bengkona teppa’ e budhina masegit. Oca’na Iddris, ebada umro aropa’agi lekkenna aba’na sareng Se Amorba Jagat.

Kare paddu morlao’ Ningrum se asapowan, o-tao badha nyapa, ”Ma’ buruwanna dika asapowan dibi’, Le’ Rum? Gu’emma se lake’?”

”He, enggi, olle apello,” Ningrum ajawab kalaban sanggit. Oca’ Madurana paggun rassa Jaba.

”Enten ta’ biyasana. Bula lebat ban are, buru nengale sanonto. Ba’ari’ ban dhumalemmanna tadha’ reng asapowan. Se lake’ tadha’, dika tadha’,” Errus, reng ajuwal juko’ se paleng careme nyander ka Ningrum se asapowan.

Eentare Errus, Ningrum molae ta’ nyaman. Sabellunna mangkat Iddris la le-male, ja’ mon Ningrum ta’ olle abala ka sapa-sapa. Ningrum paggun ekala’ asapowan. Ta’ ajawab enja’ ta’ ajawab iyya.

”Badha juko’en, Rus? Ajuwal juko’ apa? Mon badha melleya,” Bu’na Marni kalowar dhari romana.

”La tadha’, Buk Ni. Juko’ bulus keng gun sakone’. Bannya’ reng ta’ alako, Buk. Angen tandhes, tera’an pole.”

”Ningrum melle barampa?”

”Enja’ ta’ melle, keng engko’ atanya, ma’ asapowan dibi’. Se lake’ dha’ emma?”

”Oooo, se lake’ jareya ka Mekka. Kenneng amba’ le-ollena.”

”Ka Mekkasan ya, Buk? Hahaha...”

Ningrum gun kes-malekes. Aba’na reng Jaba amoso Errus pajuko’an se lengngo’ jilana, tepes bibirra, ban lanjang le’erra. Ningrum ta’ kera ka adha’. Errus lakar la kalonta caleper, baranca, ban bannya’ caca. Ca’na oreng, se melle reya rato tape mon Errus se ajuwal, Errus paggun ratona.

***

Molae mangkat, abidda sapolo are, Iddris ta’ toman nelpon ka Ningrum. Bariya keya Ningrum. Sateya Ningrum arassa sengka se moleya ka roma kontra’anna. Pata lema are dhari mangkatta se lake’ Ningrum ta’ mole ka bengkona. Ningrum gun pe-ngampe ka bengkona ca-kancana se padha alako neng e swalayan.

”Engko’ ta’ mole ka roma. Sengka! Tatangga bannya’ colo’. Molae dhari ta’ ametta ba’na sampe’ ka pesse se epaumro olle dhimma? Senga’ ollena...,” monye SMS-sa Ningrum ka Iddris. Iddris ta’ ajawab mera otaba biru. Ban Iddris eanggep angen lebat. Otaba eanggep tadha’ angen. Tadha’ pa-apa.

Oreng padha arasan. Iddris ban se bine’ cora’ ajalan bang-sebang. Mon Iddris ka bara’, Ningrum ka temor. Bariya keya mon Ningrum ka dhaja, Iddris ka lao’. Oreng kadhuwa malarat se katela’a wa’-dhuwa’an. Entar-molena Ningrum alako, abannya’an abareng kancana. Rasanna oreng ta’ samastena reng lake-bine enga’ jareya.

***

Iddris dhateng. Maso’ tengnga malem ka bengkona. Dhateng asapedha motoran ban Ningrum. Ta’ bannya barang se egiba Iddris. Gun ettas endong padhana na’-kana’ jaman sateya mon ajalanan saare dhuware.

”Barang gi’ ta’ ebungkar. Sengko’ ta’ ngantos, terro lekkasa napa’ ka roma.”

”Terros?” Ningrum nyambit sambi ce’-pece’an HP. Tadha’ rassa perak e mowana Ningrum. Mowana ta’ binar. Paggun, la’-mala’a sordhep.

”Kerrong terro lekkasa tatemmo bine,” Iddris mesem sambi alerek maba ka Ningrum. Mowana Iddris semmo binar. Tello bellas are badha e Mekka olle mabinar ka aba’na.

Ta’ padha ban reng-oreng laen, Iddris dhateng aumro ta’ bannya’ se entar. Sanajjan badha reng entar Iddris kabannya’an ta’ nemmone. Kajabana la tajuguk, buru etemmone. Jareya bai korang samporna.

Aba’na aromasa todhus sabab aba’na terro dha’-padha’a ban bala tangga, tape la jareya kabadha’anna Iddris. Iddris aumro banne kellarra dibi’. Tekka hajadda Iddris ka Mekka sabab eajak kancana se sogi. Kancana Iddris se ngajak nanggung sakabbiyanna se-pesseyan. Ongkos entar-molena, lapar-kennyangnga e jalan, le-ollena, ban balijja baragat e budhi etanggung. Tamaso’ Ningrum se edina’agi Iddris, kabutowanna ecokobi ban kancana Iddris.

”Se easemmagi Pa’ Iddris Napa?” sala settong jama’a masegit atanya bakto mare abajang Mangrib.

Iddris ta’ duli ajawab. Aeng matana ngaremmeng. Aonju’ nyaba. Oreng se ngedhingngagi padha melget. Ngantos mettona oca’ dhari Iddris.

”Allah Maha Ase tor Bellas, para ajunan ta’ kera parcaja. Ka’dhinto kobasana Allah. Bagiyan dhari tareka-Na. Kaula namong ngasemmagi pako. Enggi, namong pako.”

Ngedhing jawabanna Iddris jama’a patang tole, saleng jelling, saleng pandeng, ta’ ngarte maksotta Iddris. Oreng anek-garennek badha se agella’ agaliggik. Iddris nerrossagi jejjer caretana ja’ lakar bakto entar ka Pa’ Ehlas se dhateng ahajji, Pa’ Ehlas acareta ja’ mon neng e pangeneppan otaba hotel sakamar ekampae. Daddi mon lake’ bine’-lake’ bine’ biyasana epobuwi bates tabir dhari kaen. Se badha e pekkerra Iddris iyya areya pako ban tale kaangguy masang tabir. Aherra, samolena dhari Pa’ Ehlas, Iddris pas maso’ ka dhapor ngala’ pako dhuwa’an sambi aneyat ja’ entara ka Mekka ban se bine’.

Sabban are, seyang malem Iddris ta’ tobang se anyo’on kaangguy tekkana hajat ka Mekka. Atotor ka Ningrum ja’ la aneyat ka Mekka, Ningrum ta’ ngeddhebbi. Iddris tekka hajat ka Mekka ebada umro ngalebadi kancana se pelak. Se Kobasa ngasokane Iddris ka Mekka kadibi’. Ta’ kenneng kaere sabab apa’a bai aropa’agi tareka Se Maha Agung.

Jama’a padha gu’-onggu’an. Bariya keya Pa’ Ehlas se ngedhingngagi gessana Iddris sambi sem-mesem etoro’e, ”Subhanallah!”. Bakto jareya keya badha motor maso’ ka taneyanna masegit. Kancana Iddris dhateng amotoran bagus. Se budhiyan motor bikep aesse barang ban le-ollena Iddris dhari Mekka. Sabagiyan le-olle terros edu’um ka bala tangga. (*)

*)Guru SMAN 4 Sampang dan Ma’had Al Ittihad Al Islami (MII) Camplong, Sampang.

(mr/*/bas/JPR)

Jawa Pos Digital
E-Paper
Most Read
 TOP
Artikel Lainya
 
 
 

Subscribe

E-Paper
Follow us and never miss the news
©2017 PT Jawa Pos Group Multimedia