Senin, 10 Dec 2018
radarmadura
 
icon featured
Cerpen

Carpan Madura: Pana

Minggu, 11 Mar 2018 14:49 | editor : Abdul Basri

Ilustrasi : berta Sofyan L D/Radar Madura/Jawapos.com

Ilustrasi : berta Sofyan L D/Radar Madura/Jawapos.com

CARPAN HASAN BASHRI*

BADHA sonar abarna koneng ra-mera narabas pettengnga malem. Lebat rong-lorong ta’ paddhang ban ta’ pasera’a bisaos bisa nangale ka sonar ka’dhissa’, salaenna reng-oreng peleyan kalaban kamampowan e lowar bates manossa biyasa. Sonar ka’dhissa’ maleccet akantha bigina paser maso’ ka dhem-ondhem se kandel. Terros temmo gaggar ta’ etemmo ka ka’dhimma buruna.

E nalekana saratos meter e attassa tana, sonar ka’dhissa’ elang. Ta’ kalaban adina lampat pan-ponapan. Pola, sonar ka’dhissa’ bintang gaggar otaba meteor se gaggar nembus langnge’. Tape ta’ bisa nyedding ka bume. Menangka ekeskes angen malem se tennang, tape matako’an.

Ban bila nyedding ka kole’ maka bakal nembus-masok lebat lobangnga kole’ sampe’ sakabbina badan ecapo’. Saenggena badan  arassa cellep, tape panas e nalekana esedding badan laen.

Otaba sonar koneng ra-mera ka’dhissa’ settong careta kona se ombar e masyarakat. Ca’na, sonar ka’dhissa’ aesse rang-barang se tajem se ekerem oreng dha’ ka tatanggana otaba oreng jau se ta’ settong jalan pamekkeranna kalaban aba’na. Gampangnga, oreng se ekabaji’i polana ta’ senneng otaba sabab laen. Bikan.

Ce’ bannya’na petanya e dhalem cethak bula, e nalekana sonar ka’dhissa’ onggu elang ta’ alampat. Bula ngabas lonceng se badha e tanang. Ta’ ekarassa temmona ampon pokol 00.45. Rasa kasambu’ ban terro taowa dha’ sonar ka’dhissa’ gi’ paggun badha.

Bannya’ tandha tanya atoles e dhalem cethak bula se ampon bindheng polana katondhu. Dhari ka’dhimma dhatengnga sonar ka’dhissa’? Pasera se ngerem? Ban se paleng dhasar ka’dhissa’ sonara ponapa? Tape diggal bai, sonar ka’dhissa’ ampon elang. Pole sobung ontongnga ka bula. Tedhunga bai, maelang katondhu se molae gella’. Ma’ olle laggu’ bisa ajalane kalakowan.

***

Sowara enger reng-oreng aganggu katennanganna bakto laggu ban bula se ju’-toju’ e terassa roma. Kalaban ekancae sacangker biddang ben salencer roko’ Dji Sam Soe. Bula nyergu’ rokok, ta’ nganggep sowara enger reng-oreng tokang ganggu katennangan. Saterrossa bula makalowar okossa roko’ dhari colo’ saenggana bunter bangonna. Sowara enger sajan ranyeng kaedhinganna. Rassana ce’ semma’na ka romana bula.

Bandher onggu sangka’anna bula. Bannya’ oreng lebat e taneyan adha’na roma se aropa’agi lorong.  Ban se adaddiyagi bula tacengnga’, e antarana oreng se bannya’ badha settong oreng se ta’ ngangguy kalambi. Pera’ calana se notope badanna. Napepole dhari bibirra kalowar dhara maske ta’ agili, tape cokop agabay se ngabas neser. Banne gun ganeko loka e badanna, tape mowana ampon ta’ aropa mowa. Bannya’ bara se abarna biru.

Rassa terro taowa dhateng ka pekkeran. Bula manjeng kaangguy nyosol reng-oreng bannya’ ban se anger-enger. ”Ka’,” bula ngolok sala settonga oreng paleng budhi. Se eolok ambu ajalan keng ta’ makalowar sowara kaangguy ajawab ologan bula.

”Neka badha ponapa gi, ma’ maenger e jalan?”

”Oh.. ka’dhissa’ ca’na dhukon tokang seher se malemma etemmo parappa’na alako.”

”Tokang seher, Ka’?” bula langsung enga’ ka se malemma, dha’ sonar se ta’ etemmo ja’ sonarra ponapa. Bendher sangka’anna bula ja’ saongguna sonar ka’dhissa’ pana. Tape bula arassa gi’ bak ragu dha’ oca’na.

”Napa pon onggu paddhang kadaddiyanna, Ka’? Badha oreng se nangale napa?” Bula atanya kalaban mowa ta’ partaja ja’ oreng se egiba bi’ oreng bannya’ ka’dhissa’ se kalaban badan possa’ ka-loka ban ta’ akalambiyan tokang seher.

”Enggi, Le’, ampon jellas ca’na. Ja’ se nangale banne gun settong oreng.”

”Ma’ ta’ epega’ malemma mon jadan pon etangale parappa’ana alako? Kan pon ta’ kadibi’an se nangale, male sakabbinna oreng ce’ partajana.”

”Maskena kalema’an, Le’, tape paggun takko’. Pole ta’ bi-nyambi pa-napa.”

”Oh, terros egiba’a ka kamma ka’dhissa’?”

”Ka lapangan, Le’. Kan ka’dhissa’ jadan kennengngan se biyasa egabay mon badha perkara.”

”Gi dinggal pon. Kalangkong, Ka’.”

”Enggi, Le’, padha, tore mon noro’a ka lapangan,” ta’ kalaban ngantos bula ajawab, laju ajalan majau dhari bula. Nabang rombonganna reng-oreng. Bula bingong. Napa noro’a otaba paleman bai. Tape rassa terro taowa lebbi kowat katembang paleman ka roma. Bula ajalan noro’e rombongan se ampon bak jau, ta’ etangale bi’ matana bula.

Bula atengka’ nabang reng-oreng kalaban berka’ tanggung. Ta’ buto bakto abit se dhapa’a ka lapangan. E lapangan eksekusi cem-macemma kasala’an se elakone. Langkong dhari oreng se azina se ekenneng tangkep pa’-rappa’na ru-serruna ngalakone kalakowan se elanglang agama, sampe’ maleng se ngeco’ pesse lema ebu ropeya daddi bagiyan dhari se ngarassa’agi kaserremmanna lapangan.

E kennengngan ka’dhissa’ ampon possa’ kalaban reng-oreng. Akantha badha konser artis internasional otaba daddi supporter Real Madrid alaban Barcelona se ce’ malaratta kaangguy nenggu langsung. Lapangan ka’dhissa’ ta’ kala katembang sadajana se esebbut buru. Kaangguy reng-oreng se ampon ce’ ngoso’na, eksekusi ka’dhinto settong kasennengngan, bur-leburan se ta’ olle talebat kaangguy nenggu.

Badan se ampon towa langsung esothok salar-kellar. Karana ta’ alaban maka langsung robbu nyeyom tana. Ban gi’ badha se dhateng pas langsung nandu’ badan towa ka’dhissa’. Salastarena tobuk nokol ban nandu’ oreng se andhi’ badan towa epajaga ban ekeba ka teyang eksekusi, etale’e ce’ serredda. Ta’ nyangka ropana eksekusi otaba bur-leburan kaangguy reng-oreng se ta’ tao ka neser paneka eobbar.

Apoy ampon epaodhi’ ka kaju se e konco’on badha rambing se ampon ebegga ka bensin. Dhari badan se ta’ ngangguy kalambi ban possa’ kalaban loka, aserro anyo’on sapora. Rassana bula ta’ tega ngabas badan se ampon towa anase’ e dhalem apoy. Serrona ce’ marengessa tape reng-oreng enga’ tadha’ se ngedhinga se ampon para’ mateya, otaba keng jadan dhing-mata’ngedhing. Napa rassa neser ban bellas ampon tadha’ e atena manossa saengga serro se ce’ marengessa akantha soarana angen se seggut ekaedhing.

Badan se ampon towa possa’ kalaban loka eserame bensin. Bauna pon ce’ ekarassana ka elong, atabuyan man-kamman agabayan reng-oreng notop elongnga. ”Gabay apa notop elong, ja’ paddhangan serro se nyengsara etorot,” bula akarettek.

E nalekana badan towa se possa’ kalaban ka-loka ka’dhissa’ etale’e ka teyang besse kalaban tanang ekalenthong ka budhi. Nyambellut ka teyang e semma’e apoy temmo serrona ambu. Mowana nondhu’ ngabas tana se bannya’ dharana aba’na dibi’. Apoy jan semma’ ka badanna. Terro rassana bula nolonga, nyambellut ka badana se possa’ kalaban ka-loka arangkol kalaban rassa bellas. Akantha eppa’ se ngapenge ana’ tong-settongnga. Tape bula ta’ andhi’ kakowatan, bula banne malaikat se ce’ kowadda. Otaba macan se ta’ andhi’ parasa’an tako’ ngadhebbi babaja.

Tape badan towa ka’dhissa’ enga’ se ta’ buto bantowan dhari bula. Otaba pasera bai se amaksod daddiya pahlawan e seddi’na pate. Sabab dhari bibirra, bula nangale parappa’na mesem, ce’ tepessa mesemma saenggana ta’ kera etangale matana sapa bai se ampon ngoso’. Pola pon pasra dha’ sadajana se bakal teba dhaggi’. Otaba keng pon nangale gambarra sowarga. Karana bisa bai sakabbina sangka’an reng-oreng coma fitna. Bikan.

E nalekana eksekusi ampon amolae ban apoy ngello’ dha’ badanna. Bula coma bisa ngabas kalaban tanang notop mowa. Enga’ mata se ta’ sanggup ngabassaggi badan towa possa’ kalaban ka-loka anase’ kalaban agalubuk. (*)

*Pengurus perpustakaan PPA. Lubangsa Selatan asal Rajun.

(mr/*/bas/JPR)

Jawa Pos Digital
E-Paper
Most Read
 TOP
Artikel Lainya
 
 
 

Subscribe

E-Paper
Follow us and never miss the news
©2017 PT Jawa Pos Group Multimedia