Kamis, 18 Oct 2018
radarmadura
icon featured
Cerpen

Carpan Madura: Pocang

Musyfiqur Rozy*

Minggu, 25 Feb 2018 16:53 | editor : Abdul Basri

Carpan Madura: Pocang

LAMON sampeyan entara ka compo’, bila ampon dhapa’ ka Pasar Lenteng, e dhajana kantor polisi badha jalan dha’ temor. Ka temor sakone’, badha eddhik. Sampeyan teros noro’e eddhik dha’ temor. Salanjangnga lorong, sampeyan bakal takerjat nangale saba se ampon ngakoneng nandha’agi ja’ sakejja’ aggi’ bala tangga bakal ngare’a padhi.

Salanjangnga lorong, sampeyan bakal tatemmo ban oreng se la padha mangkata ka saba. Badha se ajalan soko, badha se nompa’ sapedha peddhalan. Sampeyan bakal ajalan reng-erengan ban eddhik. Sabab, salanjangnga jalan, salanjangnga eddhik se nojju ka compo’. Aeng benneng se agili. E antarana padhi se nganthang ngakoneng, settong, dhuwa’, tello’, ban ta’ kaetong dalko’ ngabber. Biruna langnge’ sajan nambai ja’ jalan ganeka nojju ka disa. Bida ban e kottha, malarat se nemmowa jalan enga’ ganeka.

Disa Cangkreng nyamana. Tak oneng, sabab ponapa ma’ sampe’ enyamae Disa Cangkreng. Disa Cangkreng neng e tengnga saba. Sampeyan bakal perna mon ampon dhapa’ ka compo’. Kaula yakin ja’ sampeyan terro akelemma. Salanjangnga ma’repat ngoladi, ka dhaja, ka bara’ ka temor ban ka lao’ sampeyan bakal nangale gunong.

Bila ampon mata are para’ compedda, na’-kana’ kene’ se gi’ buru dhateng dhri langgar, ta’ usa mole ka romana. Na’-kana’ kene’ nojju ka songay. Aleggur e songay ban sakanca’na. Amaen ca’-lonca’an dhari bungkana camplong se tombu e penggirra songay. Na’-kana’ buru ambu bila adan e langgar. Mare mandhi, langsung mangkat ka langgar kaangguy ngaji.

Kadhang, na’-kana’ se dhateng dhari langgar mole ka lapangan. Amaen ebbal soko satobugga. Bila ampon adan e langgar, nandha’agi ja’ maen la mare. Badha se langsung alonca’ ka songay, badha se gi’ emo’ ban se moleya ka romana kaangguy asalenan kalambi ban sarong.

Kaula ta’ acareta’a na’-kana’ kene’ se sabban sore aseram e songay. Kaula acareta’a ja’ e Disa Cangkreng badha Kampong Pocang. Mon se ecareta’agi sareng embu’ ban rama, e Kampong Pocang tadha’ oreng sogi. Napapole raddin. Oreng-oreng se badha e Kampong Pocang ganeka sa-biyasa. Ta’ raddin, ta’ juba’. Ta’ sogi, ta’ mesken.

Mon caretana, lamba’ badha oreng Pocang se talebat sogi. Akadi se ecareta’agi, lake-bine ganeka se lake’ gantheng ban se bine’ raddin. Se lake’ neka tokang juwal rambing. Banne gun sa-Madura. Oreng ganeka lako ongga toron dhari jaba. Ajaja daganganna ka Jaba. Nyamana Bukat ban se bine’ anyama Sirmuna.

Maskeya odhi’ polowan taon, Sirmuna ta’ gellem ngagunge pottra. Badha sala settong dhukon adhabu, ”Sampeyan neka ta’ bakal ngagunge poto.”

Sirmuna tacengnga’, atena takerjet. Sabban malem, Sirmuna lako nyo’on ka Pangeran mandar moga ceppet ngagunge poto. Sakabbina oreng terro andhi’a poto. Sakeng terrona, kadhang Sirmuna e bakto lakena ongga ka Jaba, ma’le ta’ seppe Sirmuna mapolong na’-kana’ kene’ kaangguy amaen e romana.

Lakena, Bukat, ta’ tao ja’ binena sabban arena apangrasa seppe e bakto aba’na ajaja dagangan. Kadhang, badha na’-kana’ ajar ngaji ka Sirmuna. Maskeya la sogi, Sirmuna lebur ibada. Lebur malae na’-kana’ ngaji.

E settong bakto, lakena nganthang curiga ka binena e bakto lakena nangale bucengnga roko’ e pakarangan romana. Bukat ta’ ca’-ngoca’ ka Sirmuna. Curigana gella’ etorot sampe’ Bukat mangkat pole ka Jaba.

Sirmuna orengnga lebur ibada. Sabban malem, ta’ tobang awirid ka Pangeran. Abajang malem ban samacemma. Kadhang, mon tadha’ lakena, Sirmuna lako apasa Sennin ban Kemmis.

Saampona dhateng pole dhari Jaba, Bukat sajan curiga polana bucengnga roko’ e pakaranganna atamba. Polana badha oca’ se ta’ nyaman, Sirmuna atanya ka lakena maksod se ekoca’agi gella’.

”Maksodda sampeyan ponapa, Ka’?” Sirmuna atanya ka Bukat. Bukat paggun jeng-manjeng e seddi’na pagar.

”Dina, pangarte dibi’.”

Sirmuna sajan ta’ ngarte ka cacana lakena. Eker-pekker pole oca’na lakena. Paggun, Sirmuna sajan posang.

”Ba’na mamaso’ oreng lake’ ka roma,” jawabba Bukat kalaban sowara se tenggi. Tanangnga ngetter ta’ kowat nahan peggel e dhalem atena. Atena ngoso’ polana aba’na akaton eco-koco ban binena. Dibi’na alako teng-tabanteng ka lowar Madura, binena e budhi bur-leburan ban lalake’ laen.

”Ma’ saka’dhinto? Kaula ta’ oneng mamaso’ oreng laen ka ka’dhinto. Enggi gun sampeyan, Ka’.”

”Lecek! Engko’ la ta’ partaja pole ka ba’na. Areya apa?” oca’na pole sambi matao bucengnga roko’ se ekala’ e taneyan. ”Kan ba’na tao ja’ engko’ ta’ aroko’. Ma’ badha bucengnga roko’ e dhinna’ mon ta’ keng badha lalake’ laen se entar dha’ enna’?”

Gan mare atokar, Sirmuna ta’ kalowaran. Atena apangrasa ce’ sake’na polana lakena nyangka Sirmuna bur-leburan ban lalake’ laen. Saengga, e settong bakto, lakena nyompae lamon jat Sirmuna ta’ madhateng oreng laen onggu.

”Mara, ba’na asompa pocong mon jat ta’ bur-leburan ban oreng laen.”

”Napapole gun asompa pocong, sampeyan mate’na kaula, kaula bangal, Ka’,” oca’na sambi nabbu dhadhana nandha’agi ja’ atena la ta’ kowat.

Juma’at gu-laggu, oreng sadisa seyal polana Sirmuna se lebur ibada esangka bur-leburan ban lalake’ laen. Oreng la padha akompol kabbi e penggir songay kaangguy nyakse’e ja’ Sirmuna bakal ebelliya ban lakena.

Sirmuna kalowar dhari romana ngangguy ruku. Socana mera, aeng matana terros agili ta’ ambu sakale. Sirmuna bakal epate’e ban lakena teppa’ neng e songay. Badha sala settong tatangga se ta’ mangga kaangguy ngabassagi Sirmuna.

”Dina, Bing, ba’na la-ngalae. Maskeya ta’ ongguwan, ba’na la-ngalae ma’le ta’ enga’ reya,” oca’na sambi ngosot bun-embunna Sirmuna.

”Ta’ bisa, Bi’, kaula keng ce’ ta’ kowatta onggu,” oca’na sambi nyandharragi cethagga ka bibbi’na.

Bukat la padha ranta kaangguy nyambelli binena. Tanangnga se kangan neggu’ are’. Se kadhuwa la padha toron ka songay. Tape, sabelluma Sirmuna eketthok le’erra, Sirmuna ngoca’ ka oreng-oreng se padha nyakse’e, ”Sakse’e ya, lamon dharana engko’ ames, maka engko’ reya ongguwan bur-leburan ban oreng lake’ laen. Tape, lamon dharana engko’ reya ro’om, maka sengko’ bendher. Ja’ arep, na’ poto e kampong reya badha oreng sogi ban oreng bine’ raddin. Jareya bakal ta’ abit odhi’ e dunnya.”

Saamponna Sirmuna adhabu, ta’ abit, Bukat maddang le’erra Sirmuna. Dhara nampes ka man-dhimman. Bannya’ oreng se aberruy ta’ tega ngabassagi Sirmuna epate’e lakena dibi’. Aeng songay se asalla benneng, ngamera kalaban dharana Sirmuna.

Bannya’ oreng se aberruy ta’ tega. Lakena se neggu’ are’ ngangkes badanna binena, agili dhara ka sakabbinna badanna. Tadha’ bau ames. Dhara se agili aoba ro’om kembang malathe.

Sajan abit sajan ro’om. Bukat apangrasa sala dha’ binena. Mangken aba’na kasta nyangka binena bur-leburan ban oreng lake’. Napa se okoca’agi binena bendher ja’ binena ta’ perna mamaso’ oreng lake’ laen ka dhalem romana.

Sampe’ mangken, e Kampong Pocang, Disa Cangkreng, tadha’ oreng sogi ban oreng bine’ se raddin. Polana ta’ abit odhi’na e dunnya. Ganeka ampon bala’ dhari pangeran Se Maha Kobasa. 

*)Mahasiswa Instik Annuqayah jurusan Ilmu Quran dan Tafsir. Tinggal di Annuqayah Daerah Lubangsa Utara (Lubtara).

(mr/*/bas/JPR)

 TOP
 
 
 

Subscribe

E-Paper
Follow us and never miss the news
©2017 PT Jawa Pos Group Multimedia